އީރާނުގެ ދެކުނުގައި އޮންނަ ސީރިކް ކައުންޓީގައި ކުރިއަށްދިޔަ ކައިވެނި ޕާޓީއަކަށް އެމެރިކާއިން ހަމަލާދީ، ކުޑަކުއްޖަކު ހިމެނޭ ގޮތަށް ފަސް މީހުން މަރާލާފައިވާ ކަމަށް އީރާނުން ބުނެފިއެވެ.
އީރާނުގެ ހާރިޖީ ވުޒާރާގެ ތަރުޖަމާނު އިސްމާއީލް ބަގާއީ ވިދާޅުވި ގޮތުގައި، ބުދަ ދުވަހުގެ ފަތިހުގެ ވަގުތެއްގައި މި ހަމަލާ ދީފައިވަނީ ކޫހެސްތާކް ސިޓީގައި ހުރި ގެއަކަށެވެ. ސީރިކް ކައުންޓީގެ ގަވަރުނަރު ރޭޒާ ޝާހިދިޔާން އީރާނުގެ ދައުލަތުގެ މީޑިއާއަށް މައުލޫމާތު ދެއްވަމުން ވިދާޅުވީ، މި ހަމަލާގައި 63 މީހުން ޒަހަމްވެފައިވާ ކަމަށާއި، އޭގެ ތެރެއިން 50 މީހުންނަކީ އަންހެނުންނާއި ކުޑަކުދިން ކަމަށެވެ. ޒަހަމްވި އެންމެންނަށް މީނާބް ސިޓީގެ ހޮސްޕިޓަލެއްގައި ފަރުވާދެމުން އަންނަ ކަމަށާއި، އެންމެންގެ ހާލުވެސް ސްޓޭބަލް ކަމަށް އޭނާ ވިދާޅުވިއެވެ.
އީރާނުގެ ޕްރެސް ޓީވީން ރިޕޯޓުކޮށްފައިވާ ގޮތުގައި މި ހަމަލާގައި މަދުވެގެން ފަސް މީހުން ވަނީ މަރުވެފައެވެ. އީރާނުގެ ސިއްހަތާ ބެހޭ ވުޒާރާގެ އޮފިޝަލެއް ކަމަށްވާ ހުސައިން ކަރްމަންޕޫރް އެކްސްގައި ލިޔުއްވާފައިވާ ގޮތުގައި، މަރުވި މީހުންގެ ތެރޭގައި ކުޑަކުއްޖަކު ހިމެނެއެވެ. އަދި އެ ސަރަހައްދުން ކަރަންޓާއި ފޯނުގެ ހިދުމަތް ކެނޑިފައިވާ ކަމަށް އޭނާ ފާހަގަކުރެއްވިއެވެ. އީރާނުގެ ރެޑް ކްރެސެންޓް ސޮސައިޓީން އާންމުކުރި ވީޑިއޯތަކުން ފެންނަ ގޮތުގައި، ހަމަލާ އަމާޒުވި އިމާރާތުގެ ފާރުތަކާއި ކުޑަދޮރުތައް ވަނީ ހަލާކުވެފައެވެ. މީގެ އިތުރުން، ހޮސްޕިޓަލުގައި ކުޑަކުދިންތަކަކަށް ފަރުވާދެމުންދާ މަންޒަރު ފެންނަ ފޮޓޯތަކެއްވެސް އެ ޖަމާއަތުން ވަނީ އާންމުކޮށްފައެވެ.
އީރާނުގެ ފާރްސް ނިއުސް އެޖެންސީން ވަނީ ހަމަލާގައި ސަލާމަތްވި ކުޑަކުއްޖެއްގެ ވާހަކަތައް ހިމެނޭ ވީޑިއޯއެއް އާންމުކޮށްފައެވެ. އެ ކުއްޖާ ބުނި ގޮތުގައި، ޕާޓީ އޮތް ތަނަށް ދެވުމުގެ ކުރިން ފައިޓަރ ޖެޓުތަކުގެ އަޑު އިވުނެވެ. އަދި އެ ތަނަށް ދެވުނުތަނާ ބާރުގަދަ ގޮވުމެއް ގޮވި ކަމަށާއި، ގާގަނޑުތަކާއި ސިމެންތި އޭނާގެ މޫނާއި ބޮލުގައި ޖެހުނު ކަމަށް އެ ކުއްޖާ ބުންޏެވެ. އެ ތަނުގައި ތިބީ އާންމު ރައްޔިތުން ކަމަށްވެސް އެ ކުއްޖާ ބުނެފައިވެއެވެ.
މި ހަމަލާތަކުގެ ރިޕޯޓުތައް އާންމުވެފައިވަނީ، އީރާނުގެ އަސްކަރީ އަމާޒުތަކަކަށް ހަމަލާދީފައިވާނެ ކަމަށް އެމެރިކާގެ އަސްކަރިއްޔާއިން އިއުލާންކޮށްފައިވާ ދަނޑިވަޅެއްގައެވެ. އެމެރިކާއިން ބުނި ގޮތުގައި މި ހަމަލާތައް ދިނީ، ހޮރުމުޒް ކަނޑުއޮޅިން ދަތުރުކުރާ ވިޔަފާރި ބޯޓުފަހަރަށް އީރާނުގެ ރިވޮލިއުޝަނަރީ ގާޑް ކޯޕްސް (އައިއާރްޖީސީ) އިން ހަމަލާދޭން މަސައްކަތްކުރުމާ ގުޅިގެންނެވެ. އެމެރިކާގެ އަސްކަރިއްޔާއިން ބުނެފައިވަނީ އީރާނުގެ ވައިގެ ދިފާއީ ނިޒާމުތަކަށާއި، ރޭޑަރ ސިސްޓަމްތަކަށާއި، ކަނޑުގެ ވަސީލަތްތަކުގެ އިތުރުން މުވާސަލާތީ މަރުކަޒުތަކަށް ހަމަލާދީފައިވާނެ ކަމަށެވެ.
މި ހަމަލާތައް ބަދަލުކޮށްފައިވަނީ، ފެބްރުއަރީ 28 ވަނަ ދުވަހު އެމެރިކާއާއި އިސްރާއީލުން އީރާނާ ދެކޮޅަށް ފެށި ހަނގުރާމައާ ގުޅިގެން އީރާނުން ހޮރުމުޒް ކަނޑުއޮޅި ބަންދުކޮށްފައިވާ މައްސަލައިގައި ދެ ފަރާތުގެ ދެމެދުގައި ހަމަނުޖެހުންތައް ހިނގަމުންދާ ދުވަސްވަރެއްގައެވެ. އީރާނުގެ އަސްކަރިއްޔާއިން ބުނި ގޮތުގައި، އެމެރިކާގެ ހަމަލާތަކަށް ރައްދުދިނުމުގެ ގޮތުން އުރުދުން، ބަހްރެއިން އަދި އިރާގުގައި ހުރި އެމެރިކާގެ އަސްކަރީ މަރުކަޒުތަކަށް ވަނީ ހަމަލާދީފައެވެ. މީގެ އިތުރުން، ޑްރޯންތަކަކާއި މިސައިލްތަކެއް ވައްޓާލާފައިވާ ކަމަށް ކުވައިތުންވެސް ވަނީ ރިޕޯޓުކޮށްފައެވެ.
އީރާނުގެ ހާރިޖީ ވުޒާރާގެ ތަރުޖަމާނު ބަގާއީ ވަނީ މިކަމާ ދެކޮޅަށް ބައިނަލްއަގުވާމީ ފެންވަރުގައި ފިޔަވަޅު އެޅުމަށް ގޮވާލައްވާފައެވެ. އޭނާ ވިދާޅުވި ގޮތުގައި، ހަނގުރާމައިގެ ފުރަތަމަ ދުވަހު އެމެރިކާގެ ސިފައިން ވަނީ މީނާބްގައި ހުރި ޕްރައިމަރީ ސްކޫލަކަށް ހަމަލާދީ 150 އަށް ވުރެ ގިނަ މީހުން މަރާލާފައެވެ. އަދި ލާމެރްދުގައި ހުރި ކުޅިވަރު ހޯލަކަށް ދިން ހަމަލާއެއްގައި މަދުވެގެން 21 މީހުން މަރާލާފައިވާ ކަމަށްވެސް އޭނާ ފާހަގަކުރެއްވިއެވެ. މި ހަމަލާތަކަށް އީރާނުން ހަރުކަށި ރައްދުދޭނެ ކަމަށް ބަގާއީ ވިދާޅުވިއެވެ. ކޫހެސްތާކްގެ އިތުރުން، އީރާނުގެ އައްސޭރިފަށުގެ އެހެން ބައެއް ސިޓީތައް ކަމަށްވާ ކޮނާރަކް، ބަންދަރް އައްބާސް، ޖާސްކް، އަސަލޫޔެ އަދި އަހްވާޒްގެ އިތުރުން ގޭޝްމް ރަށުގައިވެސް ގޮވުންތަކެއް ގޮވާފައިވާ ކަމަށް ތަސްނީމް ނިއުސް އެޖެންސީން ވަނީ ރިޕޯޓުކޮށްފައެވެ.
