އެމެރިކާއާ ދެކޮޅަށް ކުރަމުންދާ ހަނގުރާމަ ނިންމަންވީ ވަގުތު ޖެހިއްޖެ ކަމަށާއި، އީރާން މިހާރު އޮތީ ބާރުގަދަ މަގާމެއްގައި ކަމަށް އެ ގައުމުގެ ރައީސް މަސްއޫދު ޕެޒެޝްކިއަން ވިދާޅުވެއްޖެއެވެ.
ހުކުރު ދުވަހު ޑޮކްޓަރުންނާ އެކު ބޭއްވި ބައްދަލުވުމެއްގައި ޕެޒެޝްކިއަން ވިދާޅުވި ގޮތުގައި، އީރާން ބާރުގަދަ އަދި އިއްޒަތްތެރި މަގާމެއްގައި އޮތް މި ދަނޑިވަޅުގައި ހަނގުރާމަ ނިންމުމަކީ އެންމެ ރަނގަޅު ގޮތެވެ. އަދި އެމެރިކާއިން އީރާނުގެ ސްކޫލްތަކާއި ހޮސްޕިޓަލްތަކާއި އުމްރާނީ ވަސީލަތްތަކަށް ހަމަލާދީފައިވާކަން މުޅި ދުނިޔެ ގަބޫލުކުރާ ކަމަށް އޭނާ ވިދާޅުވިއެވެ. މީގެ އިތުރުން، ޖޫން މަހު އެމެރިކާއާ އެކު ވެފައިވާ އެއްބަސްވުމަށް ފާޑުކިޔާ ފަރާތްތަކަށް ރައްދުދެއްވައި އޭނާ ވިދާޅުވީ، އެ އެއްބަސްވުމުގައި އީރާނުން ދޫދީފައިވާ އެއްވެސް ކަމެއް ނޯންނާނެ ކަމަށެވެ. ޕެޒެޝްކިއަންގެ މައްޗަށް އީރާނުގައި އެންމެ އިސްކޮށް ހުންނަވަނީ އެ ގައުމުގެ އެންމެ އިސް ރޫހީ ލީޑަރު މުޖްތަބާ ހާމަނާއީއެވެ.
އެމެރިކާއާ އެކު ވެފައިވާ އެއްބަސްވުމުގެ މުއްދަތު ހަމަވެފައިވާއިރު، އީރާނުގެ އަސްކަރިއްޔާއިން ވަނީ އާ ނުރައްކާތަކަށް ރައްދުދިނުމަށް ތައްޔާރަށް އޮތް ކަމަށް ބުނެފައެވެ. އީރާނުގެ ހަތިޔާރުއެޅި ބާރުތަކުގެ ޗީފް އޮފް ސްޓާފް މޭޖަރ ޖެނެރަލް އަލީ އަބްދުﷲއީއާ ހަވާލާދީ އެ ގައުމުގެ މީޑިއާތަކުން ރިޕޯޓުކޮށްފައިވާ ގޮތުގައި، އެއްގަމާއި ކަނޑާއި ވައިގެ އިތުރުން ސައިބަރ ސްޕޭސްގައި ވެސް ދުޝްމަނުންނަށް ރައްދުދިނުމުގެ ގާބިލުކަން އީރާނުގެ އަސްކަރިއްޔާއަށް ލިބިގެންވެއެވެ.
އޮމާންގެ ދައުލަތުގެ ނޫސް އޭޖެންސީން ރިޕޯޓުކޮށްފައިވާ ގޮތުގައި، އޮމާން އަދި އީރާނުގެ ހާރިޖީ ވަޒީރުން ވަނީ ހުކުރު ދުވަހު ފޯނުން ގުޅުއްވައި މަޝްވަރާކުރައްވާފައެވެ. މި މަޝްވަރާތަކުގައި، ހޮރުމުޒް ކަނޑުއޮޅީގެ ދަތުރުފަތުރާ ގުޅޭ ކަންކަމާއި، ސުލްހައިގެ ވާހަކަތައް އަލުން ފެށުމަށް މަގުފަހިކުރުމާ ގުޅޭގޮތުން މަޝްވަރާކުރެއްވިއެވެ. އީރާނުން ހޮރުމުޒް ކަނޑުއޮޅީގެ ބައެއް ބަންދުކޮށްފައިވާއިރު، އެމެރިކާގެ ކަނޑުގެ ސިފައިން ދަނީ އެ ސަރަހައްދުން ދަތުރުކުރާ ތެޔޯ ޓޭންކަރުތަކަށް ސިއްރުން ހިމާޔަތް ދެމުންނެވެ. އެމެރިކާގެ މީޑިއާތަކުން ރިޕޯޓުކޮށްފައިވާ ގޮތުގައި، މިގޮތަށް ދޭ ހިމާޔަތުގެ ދަށުން ދުވާލެއްގެ މައްޗަށް ފަސް މިލިއަނާއި 10 މިލިއަނާ ދެމެދުގެ އަދަދަކަށް ފީފާ ތެޔޮ ދަނީ އެކްސްޕޯޓުކުރަމުންނެވެ.
އެމެރިކާގެ ރައީސް ޑޮނަލްޑް ޓްރަމްޕް ވަނީ އީރާނުން އެއްބަސްވުމަކަށް އައުމަށް ބޭނުންވާ ކަމާމެދު ޝައްކު އުފައްދަވާފައެވެ. ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ، އީރާނުން އެއްބަސްވުމެއް ހަދަން ބޭނުންވި ނަމަވެސް، ރަނގަޅު އެއްބަސްވުމަކަށް އައުމަށް އެ ގައުމު އަދި ތައްޔާރު ނޫން ކަމަށެވެ. އަދި އީރާނަށް އެއްވެސް ބާވަތެއްގެ އެހީތެރިކަމެއް ފޯރުކޮށްދޭ ގައުމަކާ ދެކޮޅަށް އިގުތިސާދީ ފިޔަވަޅު އަޅާނެ ކަމުގެ އިންޒާރު އޭނާ ދެއްވިއެވެ.
ހަނގުރާމައަށް ހަ މަސް ފުރެން ކައިރިވެފައިވާއިރު، އެމެރިކާގެ ޓްރެޝަރީ ސެކްރެޓަރީ ސްކޮޓް ބެސެންޓް ވަނީ އީރާނުގެ ސަރުކާރު ވައްޓާލުމަށްޓަކައި ދަތިކުރުމުގެ ފިޔަވަޅުތަކެއް އަޅާނެ ކަމަށް ވިދާޅުވެފައެވެ. ހޯމަ ދުވަހު ބާއްވާ ނޫސްވެރިންގެ ބައްދަލުވުމެއްގައި މި ފިޔަވަޅުތައް އިއުލާންކުރާނެ ކަމަށް ބެލެވެއެވެ. މިއީ އަސްކަރީ ބާރުގެ ބަދަލުގައި އިގުތިސާދީ ގޮތުން ފިއްތުންތައް ކުރިމަތިކުރުމަށް ޓްރަމްޕްގެ ސަރުކާރުން ގެންގުޅޭ ސިޔާސަތަށް އައި ބަދަލެއް ކަމަށް ރިޕޯޓުތައް ބުނެއެވެ.
މިކަމާ ގުޅިގެން އީރާނުގެ ހާރިޖީ ވުޒާރާއިން ބުނީ، އެމެރިކާގެ މި ނިންމުމަކީ އިގުތިސާދީ ޓެރަރިޒަމް ކަމަށާއި، މިކަން ރާވާ ފަރާތްތަކަށް އަދަބު ލިބެންޖެހޭނެ ކަމަށެވެ. ޗައިނާގެ ހާރިޖީ ވުޒާރާގެ ތަރުޖަމާނު ލިން ޖިއާން ވެސް ވަނީ އެމެރިކާގެ ފިޔަވަޅުތަކަށް ފާޑުވިދާޅުވެފައެވެ. އޭނާ ވިދާޅުވި ގޮތުގައި، ދަތިކުރުމުގެ ފިޔަވަޅުތަކުން މައްސަލައަށް ހައްލެއް ނުލިބޭނެއެވެ. އަދި ސިޔާސީ އަދި ޑިޕްލޮމެޓިކް އުސޫލުތަކުގެ ތެރެއިން މައްސަލަ ހައްލުކުރުމަށް ހުރިހާ ފަރާތްތަކަށް އޭނާ ގޮވާލެއްވިއެވެ.
