އާންމުކޮށް ގަބޫލުކުރެވިފައި އޮންނަ ގޮތުގައި އުމުރުން ދުވަސްވުމަކީ ހަށިގަނޑާއި ސިކުނޑީގެ ބާރު ދެރަވެ، އެކި ކަހަލަ ބަލިތަކާ ކުރިމަތިލާންޖެހޭ އަދި ދުވަހެއް ދުވަހަކަށް ބަލިކަށިވަމުންދާ މަރުހަލާއެކެވެ. ނަމަވެސް، މިއީ ކޮންމެހެން ވާންޖެހޭ ގޮތެއް ނޫން ކަމަށާއި، އުމުރުން ދުވަސްވުމާމެދު މީހާ ދެކޭ ގޮތަކީ އޭނާގެ ސިއްހަތު ރަނގަޅުވުމަށް ނުވަތަ ދަށްވުމަށް މެދުވެރިވާ އެންމެ ބޮޑު އެއް ސަބަބުކަން އެމެރިކާގެ ޔޭލް ޔުނިވަރސިޓީން ދާދިފަހުން ކުރި ދިރާސާއަކުން ވަނީ ހާމަވެފައެވެ. މި ދިރާސާއިން ދައްކާ ގޮތުގައި، އުމުރުން ދުވަސްވުމަކީ ހަޔާތުގެ ރަނގަޅު މަރުހަލާއެއް ކަމަށް ދެކޭ މީހުންގެ ސިއްހަތަށް ވަގުތާއެކު ހެޔޮ ބަދަލުތަކެއް އާދެއެވެ.
'ޖެރިއެޓްރިކްސް' ޖާނަލްގައި ޝާއިއުކޮށްފައިވާ މި ދިރާސާގައި އިސްކޮށް ހަރަކާތްތެރިވި ޔޭލް ސްކޫލް އޮފް ޕަބްލިކް ހެލްތުގެ ޕްރޮފެސަރ ޑރ. ބެކާ އާރް. ލީވީ ފާހަގަކުރެއްވި ގޮތުގައި، އުމުރުން 65 އަހަރުން މަތީގެ މީހުންގެ ތެރެއިން ގާތްގަނޑަކަށް ދެބައިކުޅަ އެއްބައި މީހުންގެ ސިކުނޑީގެ މަސައްކަތްތަކަށާއި ހަށިގަނޑުގެ ހަރަކާތްތަކަށް ވަގުތާއެކު ކުރިއެރުން ލިބިފައިވާކަން ވަނީ ފާހަގަކުރެވިފައެވެ. އޭނާ ވިދާޅުވި ގޮތުގައި އުމުރުން ދުވަސްވުމަކީ ހަމައެކަނި ގާބިލުކަން ގެއްލިގެންދާ ދިއުމެއް ކަމަށް ގިނަ ބަޔަކު ގަބޫލުކުރި ނަމަވެސް، ދިރާސާއިން ފެނުނީ މުސްކުޅި އުމުރުގައި ސިއްހަތު ރަނގަޅުވުމަކީ މަދުން ނޫނީ ނުފެންނަ ކަމެއް ނޫން ކަމާއި، އެއީ އާންމުކޮށް ވެސް ހިނގާ ކަމެއް ކަމެވެ.
މިކަން ދެނެގަތުމަށްޓަކައި ދިރާސާ ޓީމުން ވަނީ 11،000 އަށްވުރެ ގިނަ މީހުން ބައިވެރިކޮށްގެން 12 އަހަރު ދުވަހުގެ މުއްދަތަކަށް އެ މީހުންގެ ސިއްހަތު މޮނިޓަރކޮށްފައެވެ. މިގޮތުން ސިކުނޑީގެ މަސައްކަތްތައް ހުރި ނެތްގޮތާއި، ހިނގުމުގެ ސްޕީޑަށް އަންނަ ބަދަލުތައް ވަނީ ބަލާފައެވެ. ދިރާސާގެ ނަތީޖާ ދައްކާ ގޮތުން، ބައިވެރިންގެ ތެރެއިން 45 އިންސައްތަ މީހުންނަށް މި ދެ ކަމުގެ ތެރެއިން ކޮންމެވެސް އެއް ކަމަކުން ކުރިއެރުން ލިބިފައިވެއެވެ. އޭގެ ތެރޭގައި ސިކުނޑީގެ ގާބިލުކަން އިތުރުވި 32 އިންސައްތަ މީހުންނާއި، ހަށިގަނޑުގެ ހަރަކާތްތެރިކަން އިތުރުވި 28 އިންސައްތަ މީހުން ހިމެނެއެވެ.
ޑރ. ލީވީގެ ޓީމުން ފާހަގަކުރި ގޮތުގައި، މި ކުރިއެރުންތައް ސީދާ ގުޅިފައިވަނީ ބައިވެރިން އުމުރުން ދުވަސްވުމާމެދު ދެކޭ ގޮތާއެވެ. އުމުރުން ދުވަސްވުމަކީ ތަޖުރިބާއާއި ހިކުމަތް އިތުރުވާ ދުވަސްވަރެއް ކަމަށް ގަބޫލުކުރާ މީހުންގެ ހިނގުމުގެ ސްޕީޑާއި ސިކުނޑީގެ މަސައްކަތްތައް ރަނގަޅުވާކަން ވަނީ ފާހަގަކުރެވިފައެވެ. މީގެ އިދިކޮޅަށް، މުސްކުޅިވުމަކީ ހަމައެކަނި ބަލިކަށިވުން ކަމަށް ގަބޫލުކުރާ މީހުންގެ ސިއްހަތު ދިޔައީ ދަށްވަމުންނެވެ. އަދި ކުރިން ކުރެވިފައިވާ ދިރާސާތަކުން ދައްކާ ގޮތުގައި، ނެގެޓިވްކޮށް ވިސްނާ މީހުންގެ ހަނދާން ބަލިވުމާއި، ހިތުގެ ބަލިތަކަށް ހުށަހެޅުމުގެ ފުރުސަތު ބޮޑުވެއެވެ.
ޑރ. ލީވީގެ 'ސްޓީރިއޯޓައިޕް އެމްބޮޑިމެންޓް ތިއަރީ' އަށް ބިނާކޮށް މި ދިރާސާއިން ދައްކައިދެނީ، މުޖުތަމައުއާއި ސޯޝަލް މީޑިއާގެ ޒަރީއާއިން އުމުރުން ދުވަސްވުމާމެދު ފެތުރިފައިވާ ނުރަނގަޅު ތަސައްވުރުތައް މީހުންގެ ސިކުނޑިއަށް ނަގައިގަނެވުމުން، އޭގެ ނޭދެވޭ އަސަރު ހަށިގަނޑަށް ކުރާ ކަމެވެ. ނަމަވެސް، އޭނާ ވިދާޅުވި ގޮތުގައި އުމުރުން ދުވަސްވީ ދުވަސްވަރުގައިވެސް ސިއްހަތު ރަނގަޅުކުރުމުގެ ގާބިލުކަން އިންސާނާގެ ހަށިގަނޑުގައި ހުރެއެވެ. މިއީ މީހާގެ އަމިއްލަ ވިސްނުން ބަދަލުކޮށްގެންނާއި، މުޖުތަމައުގެ ފެންވަރުގައި ކުރެވޭ މަސައްކަތްތަކުން ހާސިލުކުރެވިދާނެ ކަމެއްކަން އޭނާ ފާހަގަކުރެއްވިއެވެ.
މި ދިރާސާއިން ފާހަގަވި އަނެއް މުހިންމު ކަމަކީ، މިފަދަ ކުރިއެރުންތައް ފެނިފައިވަނީ ހަމައެކަނި ކުރިން ބަލިވެ އުޅުމަށްފަހު ރަނގަޅުވި މީހުންގެ ކިބައިން ނޫން ކަމެވެ. ދިރާސާ ފެށިއިރުވެސް ސިއްހަތު ރަނގަޅަށް ހުރި މީހުންގެ ތެރެއިންވެސް ގިނަ ބަޔެއްގެ ސިއްހަތު ވަގުތާއެކު އިތުރަށް ރަނގަޅުވެފައިވާކަން ދިރާސާކުރި ފަރާތްތަކުން ވަނީ ހާމަކޮށްފައެވެ. އެހެންކަމުން، އުމުރުން ދުވަސްވުމާމެދު އަޅުގަނޑުމެން ގެންގުޅޭ ވިސްނުމަކީ ބަދަލުކުރެވިދާނެ ކަމަކަށް ވާއިރު، ޕޮޒިޓިވް ވިސްނުމެއް ގެންގުޅުމަކީ އުމުރުން ދުވަސްވީ ނަމަވެސް ދުޅަހެޔޮ ސިއްހަތެއްގައި ދެމިހުރުމަށް އެޅޭ ވަރަށް މުހިންމު ފިޔަވަޅެކެވެ.
