ކޮންމެ އިންސާނަކީ ވެސް އަމިއްލަ ހުނަރާއި ފަންނުވެރިކަން ކުރިއެރުވުމަށް އެދޭނެ މީހެކެވެ. މިއަދުގެ މުޖުތަމައުގައި ތަފާތު އެކި ދާއިރާތަކުން ޒުވާނުން އަންނަނީ އެމީހުންގެ ހުނަރު ދައްކަމުންނެވެ. މީގެ ތެރެއިންވެސް ކާބޯތަކެތި ތައްޔާރުކުރުމާއި، ވަކިން ހާއްސަކޮށް ކޭކު އެޅުމުގެ ދާއިރާއަކީ ފަހަކަށް އައިސް ވަރަށް ބޮޑު ކުރިއެރުމެއް ހޯދަމުން އަންނަ ދާއިރާއެކެވެ.
މި ދާއިރާގައި ފާހަގަކޮށްލެވޭ ފަދަ ކާމިޔާބު މަސައްކަތްތަކެއް ކުރަމުން އަންނަ އެއް ޒުވާނަކީ، އޭނާގެ ފޮނި އުންމީދުތަކާއެކު މި ދާއިރާގެ އުސްމިންތަކަށް ދަތުރުކުރަމުންދާ ހީވާގީ ޒުނާކެވެ. އެގޮތުން "ދަ ޕްރެސް"ގެ މީހުން ސެގްމެންޓުގައި މިއަދު މި ގެނެސްދެނީ ކޭކު އެޅުމާއި ތަފާތު އެކި ޑެޒާޓްސްތައް ހަދަމުންދާ އުމުރުން 34 އަހަރުގެ އަފާ ޝަފީއުގެ ވާހަކައެވެ.
މި ކާމިޔާބު ދަތުރުގެ ފެށުން އައީ އަފާގެ އުފަން ރަށް އައްޑޫއިން، އާއިލާގެ ގާތުންނެވެ. ކޭކު އެޅުމުގެ ފުރަތަމަ ފިޔަވަޅުތައް އޭނާ އެޅީ ގޭތެރޭގެ ބަދިގޭގައެވެ.
އާއިލާއާއި ރައްޓެހިންނަށް އަޅައިދިން ބްރައުނީސް ބިޒްނަސް އަކަށް
އަފާ ކިޔާދިން ގޮތުގައި ފުރަތަމަ ތައްޔާރުކުރީ ބްރައުނީސް އެވެ. އެއީ އަފާ ބަނޑުބޮނޑު ދުވަސްކޮޅު ފޮނި އެއްޗެއް ކާހިތްވެގެން އަމިއްލަ އަށް ތައްޔާރުކުރި އެއްޗެކެވެ. މި ބްރައުނީ އާއިލާގެ މީހުންނަށް ވަރަށް މީރުވިކަމަށާއި، ވިއްކަން ފަށަން އަފާ އަށް ހިތްވަރު ދިން ކަމަށް އަފާ ބުންޏެވެ.
އާއިލާގެ ފަރާތުން ލިބުނު ހިތްވަރާއި ސަޕޯޓަކީ އޭނާގެ މި ހުނަރު އިތުރަށް ތަރައްގީކުރުމަށް ލިބުނު އެންމެ ބޮޑު ބާރެވެ. ރަށުގައި ހުރެގެން ކުރި މި މަސައްކަތުން، އޭނާގެ އަތްތެރިކަމާއި ރަހަތަކަށް ގިނަ ބައެއްގެ ތައުރީފު ލިބެން ފެށިއެވެ.
އަފާ ބުނި ގޮތުގައި އޭގެ ފަހުން ކޮންމެ އަހަރަކުވެސް އާ އެއްޗެއް ޓްރައި ކުރަން ފެށިއެވެ. އެގޮތުން ކުކީސް، އޭގެ އަނެއް އަހަރު ޗީޒްކޭކް، އަދި ކޭކު އަޅަން ފެށި ކަމަށް އަފާ ކިޔާދިނެވެ. ގުރޭޑު 10 ނިންމި އިރު ބޭސިކް ކޭކު ކޯހެއް ހެދި އަފާއަށް މި މަސައްކަތުގެ ތެރެއަށް ވަދެވުނީ އޭގެ އެތައް ދުވަހެއް ފަހުންނެވެ.
އަފާ ދެކޭގޮތުގައި ކޭކު އެޅުމަކީ ކުރެހުމެއް ކުރެހުން ފަދަ އާޓެކެވެ. ކޭކެއް ފަރުމާކޮށް، އޭގައި ކުލަޖައްސައި، އެކި ޑިޒައިންތައް ކުރަހާއިރު ލިބެނީ ބޮޑު ހިތްހަމަޖެހުމެކެވެ. އިންޓަނެޓާއި ސޯޝަލް މީޑިއާގެ ޒަރީއާއިން ފެންނަ ބައިނަލްއަގުވާމީ ފެންވަރުގެ ކޭކު ޑިޒައިންތަކުން އޭނާއަށް އާ އުކުޅުތައް ދަސްކުރުމުގެ ޝައުގުވެރިކަން އުފެދުނެވެ.
އާއިލާގެ ފަރާތުން ލިބުނީ 100 ޕަސެންޓު ސަޕޯޓެއް
މިފަދަ މަސައްކަތެއް ކުރާއިރު އާއިލާގެ ފަރާތުން ބޮޑު ސަޕޯޓެއް ލިބުމަކީ މަސައްކަތް އެންމެ އެދެވޭ ގޮތުގައި ކުރުމަށް ލިބޭ އެންމެ ބޮޑު ބާރެވެ. މިފަދަ ނަސީބެއް ލިބިފައިވާ އަފާ ކިޔާދިން ގޮތުގައި ހަދާ އެއްޗެހި ވިއްކަން ފަށަން އަފާ އަށް އެންމެ ބޮޑަށް ނަސޭހަތްދިނީ އޭނާގެ ފިރިމީހާއެވެ.
ތަފާތު އެކި ބާވަތުގެ ޑެޒާޓްސް އަފާ ހަދައެވެ. އެގޮތުން ރެޑް ވެލްވެޓް ކޭކް، ޗީޒް ކޭކް، ޗޮކޮލެޓް ކޭކް، ބަޓާ ކޭކް، ވެނީލާ ކޭކް އަދި އެކި ވައްތަރު ކޭކުގެ އިތުރުން ބްރައުނީސް އާއި ތަފާތު ކުކީސް އަފާ ހަދައެވެ. އަފާ ހަދާ ތަފާތު ބާވަތުގެ ކޭކްތަކާއި މިފަދަ ޑެޒާޓްތައް އަފާގެ އިންސްޓަގްރާމް ޕޭޖް "ލައިޓްސް ބައި އަފާ" އަށް ބަލާލުމުން ފެނިގެންދާނެއެވެ.
މީގެއިތުރުން ގިނައިން ނަގަނީ ޕްރީ އޯޑަރުކަން ފާހަގަކޮށް އަފާ ބުނީ ދުވާލެއްގެ މައްޗަށް 4،5 އޯޑަރުވެސް ނަގާ ދުވަސް ދާކަމަށެވެ. އަދި މަހެއްގެ މައްޗަށް 50 އަކަށް އޯޑަރު ލިބޭކަމަށް އަފާ ބުންޏެވެ.
މި ދާއިރާގައި ލިބުނު އެންމެ ބޮޑު ކާމިޔާބީއެއްގެ ގޮތުގައި އަފާ ދެކެނީ އުރީދޫގެ ފަރާތުން ލިބުނު ބޮޑު އޯޑަރެވެ. އެގޮތުން 450 ކޭކްސިކްލްސް ހެދުމަށް އޯޑަަރު ލިބުނުކަމަށާއި ހަފްތާއެއް ތެރޭ މިތަކެތި ހަދާ ނިންމާލެވުނީ ލިބުނު ބޮޑު ކާމިޔާބަކާއި ފަހުރެއް ކަމުގައި އަފާ ބުނެއެވެ.
މަސައްކަތުގައި ދިމާވާ އެންމެ ބޮޑު ގޮންޖެހުން
ކޮންމެ މަސައްކަތެއްގައިވެސް ގޮންޖެހުންތަކެއް ހުންނާނެ ފަދައިން، މި ދާއިރާގައިވެސް އަފާއަށް ގިނަ ހުރަސްތަކެއް ކުރިމަތިވެއެވެ. އޭގެ ތެރެއިން އެންމެ ބޮޑު އެއް ކަމަކީ ކޭކު އެޅުމަށް ބޭނުންވާ ފެންވަރު ރަނގަޅު ސާމާނާއި ރޯ މެޓީރިއަލްސް ހޯދަން އުނދަގޫވެފައި ތަކެތި އަގު ބޮޑުވުމެވެ.
މީގެއިތުރުން މިދިޔަ އަހަރު މާލެ ބަދަލުވުމާއި ގުޅިގެން މާލޭގައި ބިޒްނަސް އަދި ރަނގަޅަށް އެސްޓަބްލިޝް ނުކުރެވޭ ކަމަށްވެސް އަފާ ބުންޏެވެ. އަދި ޑެލިވަރީ ކުރުމަކީ ދިމާވާ ބޮޑު ގޮންޖެހުމެއް ކަމުގައިވެސް އަފާ ބުނެއެވެ.
މިފަދަ މަސައްކަތެއް ފަށަން ބޭނުންވާ ފަރާތަކަށް އަފާގެ ހާއްސަ މެސެޖެއް
އަފާ ބުނި ގޮތުގައި އެއްވެސް މަސައްކަތެއްގެ ކާމިޔާބަށް ވާސިލުވެވޭނީ އެ މަސައްކަތެއް ކުރާ ހިތުން އެކަމަކަށް ޕެޝަނޭޓް ވެގެން ކުރުމުންނެވެ. ހަމައެކަނި ރުފިޔާ ހޯދުމުގެ މަގުސަދުގައި ކުރުމުގެ ބަދަލުގައި އެކަން ކުރާހިތުން ކުރުމަކީ މަސައްކަތުގެ ފެންވަރުވެސް ރަނގަޅުވެ ކަސްޓަމަރުން އެކަން ބަލައިގަންނާނެ ގޮތް ކަމުގައި އަފާ ބުނެއެވެ.
އަފާގެ ދަތުރަކީ ހިތްވަރުގަދަ ކޮންމެ މީހަކަށްވެސް ކާމިޔާބީއާ ހަމައަށް ވާސިލްވެވިދާނެކަމުގެ ދިރިހުރި މިސާލެކެވެ. ރަށުގެ ކުޑަ ބަދިގެއަކުން ފެށި މި މަސައްކަތް މިއަދު މިވަނީ ފުޅާވެ، ގިނަ ބައެއްގެ މަގުބޫލުކަން ހޯދާފައެވެ. ގޮންޖެހުންތަކާ ކުރިމަތިލާ ކެތްތެރިކަމާއެކު މަސައްކަތް ކޮށްފިނަމަ، ކޮންމެ މީހަކަށްވެސް އެމީހެއްގެ ދާއިރާއިން ވިދާލެވިދާނެކަން ކަށަވަރެވެ.
