ދިރިއުޅުމުގައި ކާމިޔާބު މީހަކަށްވުމަށް ބޭނުންވަނީ ހިތްވަރާއި މަސައްކަތްކަން އޭނާ އަބަދުވެސް ގަބޫލުކުރިއެވެ. އެއްވެސް މީހަކަށް ބަރޯސާނުވެ އަމިއްލަ ފައި މައްޗަށް ތެދުވުމަކީ އޭނާގެ އެންމެ ބޮޑު އަޒުމެވެ. އެ އަޒުމާ ހިތްވަރުގައި ފެށި މަސައްކަތަކީ އަބަދުވެސް އަމިއްލަ ވިޔަފާރިއެއް ފެށުމެވެ.
މި ކިޔައިދެނީ އައްޑޫ ސިޓީ ހުޅުދޫ އަށް އުފަން ފާތިމަތު ސާޖިދާގެ ވާހަކައެވެ. އޭނާ އަކީ އެސްޓިއޯ ހުޅުމީދޫ ފާމަސީގެ ހީވާގި ފާމަސިސްޓެކެވެ. ކޮންމެ ދުވަހެއްގެ 8 ގަޑިއިރު ގެ ޑިއުޓީގައި ތަފާތު މިޒާޖުގެ އެތައް ބަޔަކާ ބައްދަލުވެއެވެ. ކަސްޓަމަރުންގެ ޝަކުވާތަކާ ކަންބޮޑުވުންތައް އަހަންޖެހެއެވެ. ބޭސް ދޫކުރާއިރު ފަރުވާތެރިކަމާއެކު ބަލަންޖެހެއެވެ. ބަލި މީހާއަށް ބޭސް ކިޔައިދޭން ޖެހެއެވެ. މިއީ ބުނެލަން ފަސޭހަކަމެއްކަމުގައިވިޔަސް، ކޮންމެ ދުވަހަކު އެތައް ބަޔަކަށް ހިދުމަތްދޭ އިރު މިއީ ކުރަން އެހާ ފަސޭހަކަމެއް ނޫނެވެ. އެހެންނަމަވެސް ކެތްތެރިކަމާއެކު، އޭނާގެ ޒިންމާ ފުރިހަމައަށް އަދާކުރަމުން އަންނަތާ މިހާރު 11 އަހަރުވެއްޖެއެވެ.
ވަޒީފާ އާއި ދަރިފުޅުގެ ކަންތައްތަކުގެ އިތުރުން ސާޖިދާގެ އަމިއްލަ ވިޔަފާރިއަށްވެސް އޭނާ ވަގުތު ހުސްކޮށްލައެވެ. 2022 ވަނަ އަހަރު ފެށި ޒެންގް އިންވެސްޓްމަންޓަކީ ސާޖިދާގެ ކުޑައިރުގެ ހުވަފެނެވެ. އަމިއްލަ ވިޔަފާރިއެއް ފެށުމުގެ ވަރުގަދަ އަޒުމުގެ ނަތީޖާއެވެ. އެންމެ ފުރަތަމަ އޮންލައިން ވިޔަފާރިއެއް ފެށިއިރު އެ ވިޔަފާރި ކާމިޔާބުކުރުމަށް އޭނާ ހުރީ ވަރުގަދަ އަޒުމެއްގައެވެ. "އަބަދުވެސް އަމިއްލަ ބޭނުންތަކަށް ބަލްކްކޮށް އެއްޗެހި ގެންނަން. ދެން ފަހުން ވަރަށް ގިނަ މީހުން އެދެން ފަށައިފި ބޭރުން އެއްޗެހި ގެނެސްދޭން. އެއީ ވިޔަފާރި ފެށުނު ހިސާބަކީ ފަހުން ރީޓައިލްކުރަން ވަރަށް ގިނަ މީހުންގެ ސަޕޯޓް ލިބިގެން މިކަން ކާމިޔާބުކަމާއެކު ކުރިއަށް ދާން ފެށީ. ދެން މިހާރު ހަމަ މަޑުމަޑުން ކުރިއަށް މިދަނީ" ސާޖިދާ ބުންޏެވެ.
މިހާރު ޒެންގް އިންވެސްޓްމަންޓަކީ ހުޅުދޫ އަދި މީދޫގެ ރައްޔިތުންގެ އިތުރުން ރާއްޖޭގެ އެހެން ހިސާބުތަކަށްވެސް އާ ވިޔަފާރިއެއް ނޫނެވެ. ޒެންގް އިންވެސްޓަމަންޓުން ސްކޫލު ކުދިންނަށް ބޭނުންވާ ސާމާނާ، އަންނައުނާ، މޭކަޕްގެ ސާމާނާ، ފައިވާން އަދި ދަބަހުގެ އިތުރުން ވަރަށް ގިނަ މުދާ ވިއްކަމުން ދެއެވެ. އަބަދުވެސް ކަސްޓަމަރުންނަށް އެކަށީގެންވާ އަގެއްގައި މުދާ ވިއްކުމަށް އިސްކަންދޭކަން ފާހަގަކޮށް ސާޖިދާ ބުނީ މުދާ، ކަސްޓަމަރަށް ދޫކޮށްލާއިރު އޭގައި އެއްވެސް ކަހަލަ ޑެމޭޖެއް ހުރިތޯ ވަރަށް ބޮޑަށް ޔަގީންކުރާ ކަމަށެވެ. އަދި ކަސްޓަމަރުން ގަންނަ މުދާ ވީ އެންމެ އަވަހަށް ޑެލިވަރީކޮށްދިނުމަށްވެސް ވަރަށް ބޮޑު އިސްކަމެއްދޭ ކަމަށް ސާޖިދާ ބުންޏެވެ.
ވިޔަފާރިއެއްގެ ކުރިއެރުމަކީ ކަސްޓަމަރުންގެ އިތުބާރާ ހިތްހަމަޖެހުންކަން ފާހަގަކޮށް ސާޖިދާ ބުނީ މި ވަގުތު ވިޔަފާރީގެ ހުރިހާ ކަމެއް ބަލަމުން އަންނަނީ އޭނާ އަމިއްލައަށް ކަމަށެވެ. މުދާ ގެނައުމާ، ސްޓޮކް ބެލެހެއްޓުމާ، އޯޑަރު ނެގުމާ، ޑެލިވަރީކުރުމުގެ އިތުރުންވެސް ވިޔަފާރި އާއި ގުޅުން ހުރި ކަންތައްތަކަށް އޭނާ ވަގުތު ހުސްކުރަނީ އެކަމަށް އުފެދިފައިވާ ޝައުގެއްގެ ބޮޑުކަމުންނެވެ. ދަރިފުޅުގެ ކަންތައްތަކާ ވަޒީފާ އާއި ވިޔަފާރީގެ ކަންތައްތައް އަމިއްލައަށް ބަލަހައްޓަމުން ދިޔަ ނަމަވެސް މިކަން ހުއްޓާލާކަށް ސާޖިދާ ބޭނުމެއް ނޫނެވެ. އޭނާގެ ވިޔަފާރި ކުރިއެރުވުމަށް ކުރާ ޕްލޭންތައް އެއަށްވުރެ ގިނައެވެ.
ކޮންމެ އަހަރެއްގެ ސްކޫލު ސީޒަނަށް ހާއްސަކޮަށްގެން ވެސް ސާޖިދާ އަންނަނީ މުދާ ގެންނަމުންނެވެ. އަދި ސްކޫލް ސީޒަނަށް ގެންނަ މުދާ ހޯލްސޭލްކޮށްވެސް ވިއްކަމުންދާކަން ފާހަގަކޮށް ސާޖިދާ ބުނީ މިކަމަށް ބޮޑު ތަރުހީބެއް ލިބެމުން އަންނަކަމަށެވެ. އަބަދުވެސް ސްކޫލަށް ބޭނުންވާ ތަކެތި ހޯދުމަށް އައްޑޫ ސިޓީގެ ގުޅިފައިވާ ރަށްތަކާއި ވަކިން އޮންނަ ހުޅުދޫ މީދޫ ރައްޔިތުން އުފުލަމުންދާ ބުރައަށް ނިމުމެއް ގެނައުމަކީ ސާޖިދާގެ އުއްމީދެވެ. އޭނާގެ މިހާރުގެ އެންމެ ބޮޑު ޓާގެޓަކީ ކުރިއަށް އޮތް 2027 ވަނަ އަހަރު، ސްކޫލު ކުދިންނަށް ބޭނުންވާ ހުރިހާ ސާމާނެއް ލިބޭނެ ފިހާރައެއް އޭނާގެ އުފަން ފަސްގަނޑުގައި ހުޅުވުމެވެ. އެއްތަނަކުން ސްކޫލް ސާމާން ލިބޭނެ ފިހާރައަށް ހުޅުވުމަށް މިހާރުވެސް އެ މަސައްކަތް ފަށާފައިވާ ސާޖިދާ ބުނީ މިއީ ބެލެނެވެރިންނަށް ލިބިގެންދާނެ ލުއި ފަސޭހައެއް ކަމުގައި ގަބޫލުކުރާ ކަމަށެވެ.
ވިޔަފާރީގައި ފައިދާ އާއި ގެއްލުން އޮންނަކަން ގަބޫލުކުރަންޖެހޭކަން ފާހަގަކޮށް ސާޖިދާ ބުނީ އަލަށް ވިޔަފާރީގެ ތެރެއަށް ވަންނަން ބޭނުންވާ ފަރާތްތަކަށް ދޭން ބޭނުންވާ މެސެޖަކީ ވިޔަފާރީގައި ފައިދާއަށް ފަހު ގެއްލުން ވިޔަސް އުއްމީދު ކަޑާނުލާ މަސައްކަތް ކުރުމެވެ. އަބަދުވެސް 100 ޕަސެންޓް ފައިދާވާނެކަމަށް ގަބޫލުކުރުމުގެ ބަދަލުގައި ގެއްލުންވާ ފަހަރު، އެ ގެއްލުންވި ސަބަބު ހޯދާ ބަލާ އެކަން ހައްލުކޮށް އާ ފެށުމަކުން ފަށަންޖެހޭނެ ކަމެވެ. އަދި ހަމައެއާ އެކު ތިމާކުރާ ވިޔަފާރިއެއް އެހެން މީހަކު ފެށުމަކީ ވިޔަފާރިއަށް ގެއްލުންވާނެ ކަމެއްކަމުގައި ހީވާހީވުން ދޫކޮށްލަންޖެހޭ ކަމަށް ސާޖިދާ ބުންޏެވެ.
ކޮންމެ ކަމެއްގައިވެސް ދަތިތަކެއް ހުންނާނެކަން ފާހަގަކޮށް ސާޖިދާ ބުނީ އަދި ރާއްޖޭގެ ކުދި ވިޔަފާރިތަކަށް ހާއްސަކޮށް ރަށްރަށުގައި ހިންގާ ވިޔަފާރިތަކަށް ހުޅުވިފައިވާ ދޮރުތައް މަދުކަމަށެވެ. ޑޮލަރު ލިބުމުގެ ދަތިތަކާ، ވިޔަފާރިއަށް ރަނގަޅު އިންވެސްޓެއް ހޯދުމާ، މާކެޓިން އަކީވެސް ގޮންޖެހުމެއްކަން ފާހަގަކޮށް ސާޖިދާ ބުނީ މިކަންތަކުން އަރައިގަނެ ރަށްފުށުގައިވެސް ވިޔަފާރި ކުރިއެރުވިދާނެ ކަމަށެވެ. މިކަމަށް ބޭނުންވަނީ ކެތްތެރިކަމާ މަސައްކަތްކަން ސާޖިދާ ފާހަގަކުރިއެވެ.
ވިޔަފާރީގައި ކުރިއަށް ދިއުމަށް ސާޖިދާގެ އެންމެ ބޮޑު އެހީތެރިއަކީ އޭނާގެ ދައްތަކަން ފާހަގަކޮށް ސާޖިދާ ބުނީ ހުރިހާ ކަމެއްގައިވެސް ދައްތަގެ ހިޔަލާ މަޝްވަރާ ލިބޭ ކަމަށެވެ. މީގެ އިތުރުން ސާޖިދާގެ އާއިލާ އާއި އެކުވެރިންނާ އަދި ކަސްޓަމަރުންގެ ފަރާތުން ލިބެމުން އަންނަ އެހީތެރިކަން އޭނާ ވަނީ ފާހަގަކޮށްފައެވެ.
