ހުއްދަ ނެތި ވިޔަފާރި ކުރަމުންދިޔަ އިތުރު ބިދޭސީންތަކެއް ހައްޔަރުކޮށްފިއެވެ.
މި މީހުން ހައްޔަރުކޮށްފައި ވަނީ ގަވާއިދާ ހިލާފަށް ބިދޭސީން ކުރަމުންދާ ވިޔަފާރިތައް ހުއްޓުވުމަށް ފުލުހުންނާއި އިމިގްރޭޝަނުން ގުޅިގެން ކުރިއަށް ގެންދާ ސިލްސިލާ ރެއިޑް އޮޕަރޭޝަންގެ ތެރެއިންނެވެ.
އެގޮތުން އިއްޔެ ކުރިއަށް ގެންދިޔަ މި އޮޕަރޭޝަންގައި މިނިސްޓްރީ އޮފް އިކޮނޮމިކް ޑިވެލޮޕްމަންޓްގެ ފަރާތުން ވެސް ބައިވެރިވެފައިވާއިރު ފުލުހުން ބުނީ، ހުއްދައެއް ނެތި ވިޔަފާރި އުސޫލުން ރޮށި ފިހެ ވިއްކަމުންދިޔަ ތަނެއްކަން ފާހަގަކުރެވިގެން އެ މަސައްކަތް ހުއްޓުވާފައިވާ ކަމަށެވެ. އަދި ގަވާއިދާ ހިލާފަށް ފިހާރައެއް ހިންގައި، މުދާ ވިއްކަމުންދިޔަކަން ފާހަގަވެ އެ ވިޔަފާރިވެސް ހުއްޓުވާފައިވާ ކަމަށް ފުލުހުން ބުނެއެވެ.
އަދި ހަމަ އެހެންމެ މި ދެ ތަން މިހާރު ބަންދުކޮށްފައިވާއިރު، މި ދެ އިންސްޕެކްޝަނަށްފަހު ޖުމްލަ 15 ބިދޭސީ ފިރިހެނުން އިމިގްރޭޝަންގެ ބެލުމުގެ ދަށަށް ގެންގޮސްފައިވާ ކަމަށް ވެއެވެ.
ބިދޭސީން ހިންގަމުންދާ ވިޔަފާރިތަކުގެ އިތުރުން ސްޕާ އަދި ސެލޫން ފަދަ ތަންތަނުގައިވެސް ފުލުހުން ދަނީ އޮޕަރޭޝަންތައް ހިންގަމުންނެވެ. އަދި އެފަދަ ތަންތަން ގަވާއިދާ ހިލާފުވާނަމަ ބަންދުކުރާއިރު ގިނަ އަދަދެއްގެ ބިދޭސީން ވަނީ ޑީޕޯޓު ވެސް ކޮށްފައެވެ.
ބިދޭސީންގެ މައްސަލައަކީ ގިނަދުވަސްވެފައިވާ މައްސަލައެއް ނަމަވެސް، އެކަމަށް ހައްލެއް ހޯދުމަށް މީގެ ކުރިން މާ ބޮޑެތި މަސައްކަތްތަކެއް ކޮށްފައި ނުވާ ނަމަވެސް މި ސަރުކާރުން މިހާތަނަށް، ބިދޭސީންގެ ތެރެއިން 178،982 މީހެއްގެ މައުލޫމާތު ހޯދައި، ގަވާއިދާ ހިލާފަށް އުޅޭ މީހުންގެ ތެރެއިން ގިނަބަޔަކު ދެނެގަނެ، އެފަދަ 8000 އަށް ވުރެ ގިނަ މީހުން ވަނީ ޑީޕޯޓުކޮށްފައެވެ
