ހަމަލާ ބަދަލުކުރުން ހުއްޓާލަން ޔަހޫދީ އިޒްރޭލުން އެއްބަސްވެފައިވާ ތާވާ އެއްގޮތަށް ކަންކަން ކުރަމުން ނުގެންދާއިރު އިތުރު ބަހަނާތަކެއް ފެންމަތިކޮށްފިއެވެ.
ސުލްހައިގެ މަރުހަލާގެ ތެރޭގައި މިސްރާއި ގާޒާ ގުޅޭ ރަފާ ދޮރާށި ހުޅުވަން އެއްބަސް ވެފައި ވީ ނަމަވެސް އިޒްރޭލުން މިހާރު ބުނަމުން ދަނީ އެ ދޮރާށި ހުޅުވޭނީ ހަމާސް އިން އިޒްރޭލަށް ހަމަލާދިން ދުވަހު ރަހީނު ކުރި މީހުންގެ ތެރެއިން މަރުވެދިޔަ މީހުންގެ ހަށިގަނޑުތައް ހޯދާ ނިމުމުން ކަމަށެވެ.
ހޯދަންމުންދާ ހަށިގަނޑުތަކުގެ ތެރެއިން ނުފެންނަ އަދި އެކަކު ވާ ކަމަށް އިޒްރޭލުން ބުނެއެވެ.
އިޒްރޭލުން މިވާހަކަ އާންމު ކުރި މިވަގުތަކީ, އިއްޔެ އިޒްރޭލުން ގާޒާއަށް ހަމަލާދީ 3 މީހަކު ޝަހީދުކޮށްލުމުގެ ހިތާމަ ގާޒާގައި ފާޅުކުރަމުން ދިޔަ ވަގުތެކެވެ. އޭގެ ކުރިން ނިމިދިޔަ ހަފްތާގައި ވެސް އިޒްރޭލުން ވަނީ ގާޒާއަށް ހަމަލާދީ 6 މީހަކު ޝަހީދު ކޮށްލާފައެވެ. އޭގެ ތެރޭގައި ނޫސްވެރިންގެ 3 މީހަކުވެސް ހިމެނެއެވެ.
ރަފާ ދޮރާށި ހުޅުވުމަކީ ނިމިދިޔަ އޮކްޓޯބަރުގައި ސުލްހައަށް އެއްބަސްވި މަރުހަލާތަކުގެ ތެރެއިން ފުރަތަމަ މަރުހަލާގައި ކުރަން އެއްބަސްވި ކަމެކެވެ. އިޒްރޭލުން ބުނަނީ, މިވަގުތަށް އެ ދޮރާށިން އެއްވެސް ބާވަތެއްގެ މުދަލެއް, ކާބޯތަކެއްޗެއް ނުވެއްދޭނެ ކަމަށާއި ނަމަވެސް މީހުން ނިކުތުމަށް ފުރުސަތު ދޭނެ ކަމަށެވެ. ނަމަވެސް އެއީ ބޭނުންވެއްޖެ ހިނދެއްގައި ކުރާނެ ކަމެއް ކަމަށް ބުނެ އިޒްރޭލު ސިފައިން ތިބީ އެ ދޮރާށި ބަންދުކޮށް ގާޑުކޮށްގެންނެވެ.
މި ކަމަކާ ގުޅިގެން ހަމާސް އިން ބުނެފައިވަނީ ރަހީނުން ތިބި ތަންތަނުގެ މައުލޫމާތު އެއްވެސް ފޮރުވުމެއް ނެތި އިޒްރޭލާ ހިއްސާކޮށްފައި ވާނެ ކަމަށާއި, އެއީ ސުލްހައިގެ އެއްބަސްވުމަށް ހަމާސްއިން އިޖާބަދޭ ކަމުގެ ހެއްކެއް ކަމަށެވެ. އަދި ހަމާސް އިން މިހާރު ބޭނުންވަނީ, ދާއިމީކޮށް މައްސަލަ ހައްލުވާން ކަމަށް ވެސް ބުނެފައި ވެއެވެ.
ރަފާ ދޮރާއްޓަކީ ގާޒާގައި އުޅެމުން ދިޔަ 2 މިލިއަނެއްހާ މީހުންގެ ޒަމާންވީ ހަމައެކަނި ދޮރާއްޓެވެ. ގާޒާއިން މިސްރަށް, މިސްރުން ގާޒާއަށް ވަދެނިކުމެ އުޅުމަށް ބޭނުން ކުރި ދޮރާއްޓެވެ. އެހެން ހުރިހާ ދިމާއެއްގައި ހުރި ދޮރާށިތަކަކީ އިޒްރޭލުން ދަނގަޑު ގޭޓުލައި, ތޭރި ބަރި ހަދައިގެން ބަލަހައްޓަމުން ގެންދާ ދޮރާށިތަކެވެ.
