ސްކޫލު ދުވަސްވަރުވެސް އެއްތަނެއްގައި މާގިނަ އިރު ހުރުމަކީ އޭނާއަށް އުދަގޫކަމެކެވެ. އަބަދުވެސް އާ ކަންތައްތައް ހޯދާ، އާ ކަންކަން ތަޖުރިބާކުރުމަކީ އޭނާގެ އާދެއެވެ. މިހެން އުޅުމުގެ ތެރޭގައި ވަރަށް ގިނަ ފަހަރު އަދަބުވެސް ލިބުނެވެ. 'މަޑުން ނުހުރެވޭ ކުއްޖެއް'ގެ ލަގަބުވެސް ލިބުނެވެ. އެ ދުވަހު ލިބުނު ތަޖުރިބާ އާއި އަދަބާ، ދިރިއުޅުމުގައި ދަސްވި ފިލާވަޅުތަކާއެކު މިއަދު އޭނާ އަކީ ޒިންމާދާރު ޒުވާނެކެވެ. އުފަން ފަސްގަނޑުގައި، އެ ރަށް ކުރިއެރުވާ ތަރައްގީކުރުމަށް މަސައްކަތްކުރާ ހީވާގި އާރުކާޓީއެކެވެ. މި ދައްކަނީ އެންމެންނާވެސް ގުޅޭ ޒުވާނެއްގެ ވާހަކައެވެ. އައްޑޫ ސިޓީ މީދޫ ހުދުވިލާގެ އަފްޒަލް ރަޝީދު (އައްޕޯ) ގެ ވާހަކައެވެ.
އޭނާގެ ކުޑައިރުގެ ދުވަސްތަކާ، ސްކޫލުގެ ދައުރުގެ ހަނދާންތައް އެހާ ފޮނި ނުވިޔަސް، އޭނާގެ އަމިއްލަ މަސައްކަތާއެކު މުސްތަގުބަލަށް ދެކޭ ހުވަފެންތައް ވަރަށް ފޮންޏެވެ. ހެޔޮއެދޭ ރަހްމަތްތެރިންނާ، އެކުގައި އުޅުނު ބައިވެރިންގެ ރަނގަޅު ނަސޭހަތާ، އެހީތެރިކަމާއެކު މިއަދު އޭނާއަކީ މީދޫގައި ފާހަގަކޮށްލެވޭ މަސައްކަތްތެރި ޒުވާނެކެވެ.
އައްޑޫ ސިޓީ މީދޫގައި ދިރިއުޅެމުން އަންނަ އައްޕޯ މިވަގުތު ކުރާ މަސައްކަތަކީ އަމިއްލަ ޓްރެވެލް އެޖެންސީއެއް ހިންގާ ފެތުރުވެރިން ގެނައުމުގެ މަސައްކަތްތެވެ. ރާއްޖޭގެ އެކި ހިސާބުތަކަށް އޭނާގެ އެޖެންސީ މެދުވެރިކޮށް ފަތުރުވެރިން ފޮނުވުމުގެ ބަދަލުގައި މި ވަގުތު އޭނާގެ އަމާޒަކީ ހަމަ އެކަނި އައްޑޫއެވެ. މި ވަގުތު ގިނަ ގޮންޖެހުންތައް ހުރި ނަމަވެސް އެ ސިޓީގެ ފަތުރުވެރިކަން ޕްރޮމޯޓް ކުރުމެވެ.
"އެންމެ ބޮޑު އިސްކަމެއް ދެނީ ފަސޭހައިން އައްޑޫ އާއި ހަމައަށް ދަތުރުކުރެވޭނެ މަގުފަހި ކޮށްދިނުމަށް. އައްޑޫ އަށް އަންނަން ބޭނުންވާ ފަތުރުވެރިން މާލޭގައި މަޑުކޮށްފައި އަންނަން ވުމުން ޓްރާންސިޓް ބޮޑުވުމުގެ މައްސަލަ ދިމާވާތީ މިހާރު ސްރީލަންކާ ބަޔަކާ ގުޅިގެން އެ ގައުމުގަ މަޑުކޮށްފަ ސީދާ އައްޑޫ އަށް އާދެވޭ ގޮތަށް މިހާރު މި ހަދަނީ، އެހެން ހެދުމުން ފަތުރުވެރިންނަށްވެސް ވަރަށް ބޮޑު ފަސޭހައަކަށް ވެގެންދޭ" އައްޕޯ ބުންޏެވެ. މި ވަގުތު ފުވައްމުލައް ސިޓީ އާއި މީދޫ އަށް ފަތުރުވެރިން ގެނައުމުގެ މަސައްކަތް ކުރަމުން އަންނައިރު، އޭގެ ތެރެއިން 90 ޕަސެންޓު ފަތުރުވެރިން ގެންނަނީ މީދޫއަށް ކަމަށް އައްޕޯ ވަނީ ބުނެފައެވެ.
އައްޑޫ ނާސް ޝާކް ސެންކްޗުއަރީ ގެ ފައުންޑާ މެންބަރެއްގެ އިތުރުން މީދޫ ސްޓިންގްރޭ ބީޗް ހެދުމުގައި ވެސް އިސް ދައުރެއް އަދާކުރި އައްޕޯ އަކީ ދުނިޔޭގެ އެންމެ ބޮޑު ދެ ޑައިވް އެސޯސިއޭޝަން ޕަޑީ އަދި އެސްއެސްއައި ގެ ޑައިވް އިންސްޓްރެކްޓެރެކެވެ. ރިސޯޓުގައި މަސައްކަތްކުރި ދުވަސްވަރު މީހުން ޑައިވީނަށް ދާ މަންޒަރާ، އެމީހުންގެ ވާހަކަތައް އަޑު އިވި އެކަމަށް ޝައުގުވެރިކަން އުފެދުނު ގޮތަށް އޭނާއަކަށް މަޑަކުން ނުހުރެވުނެވެ.
އޭރު މަސައްކަތްކުރި ރިސޯޓުގެ ޑައިވިން ސްކޫލަށް ކޮންމެ ދުވަހަކު ދާންޖެހުމާއެކު އަބަދުވެސް އެތާ މެނޭޖަރާ ވާހަކަދެކެވި، އެކަމާއި ގުޅޭ ގިނަ މައުލޫމާތުތައް ހޯދުމުގެ ނަތީޖާއަކީ އޭނާއަށް ޑައިވީނަށް ދިއުމުގެ ފުރުސަތު ލިބުމެވެ. އެންމެ ފުރަތަމަ ޑައިވީނަށް ދިޔަ ދުވަހު އޭނާގެ ހިތް ކަނޑު އަޑިއަށް ދޫވެއްޖެއެވެ. ކަނޑު އަޑީގެ ރީތިކަމާ، ހަމަހިމޭންކަމުގެ ޖާދޫގައި ޖެހި އެ ދާއިރާއިން ކުރިއަށް ދިއުމަށް ވަރުގަދަ އަޒުމެއް ކަނޑައެޅިއެވެ. ނަތީޖާވެސް ފޮންޏެވެ. މިހާރު އޭނާއަކީ ޕަޑީގެ މާސްޓާސް ސްކޫބާ ޑައިވާ ޓްރެއިނާ އިންސްޓްރެކްޓަރެއްގެ އިތުރުން އެސްއެސްއައި ގެ ޑައިވް މާސްޓާސް އިންސްޓްރެކްޓާ އަދި އީއެފްއާރް ގެ އިތުރުން ރިއެކްޓް ރައިޓް އިންސްޓްރެެކްޓަރެކެވެ.
އައްޕޯ މިހާ ހިސާބުންވެސް ނިންމާލީއެއް ނޫނެވެ. ކިޔަވައިގެން އައިސް އޭނާއަށް ދަސްވި އެއްޗެއް އެހެން މީހުންނަށްވެސް ދަސްކޮށްދޭން ބޭނުންވިއެވެ. "އެންމެ އުފާވަނީ މިދާއިރާއިން މީދޫގެ ޒުވާނުން މާސްޓާސް ލެވެލްއަށް ތަމްރީނު ކުރެވުމުން، މިހާރު ރާއްޖޭގެ އެންމެ ގިނަ ޑައިވް މާސްޓާސް ތިބި ރަށަކަށް މީދޫވުމަކީ ލިބޭ ފަހުރެއް" އައްޕޯ ބުންޏެވެ. އައްޕޯގެ ދަރިވަރުން މިހާރު ތިބީ ދާއިރާއިން ތަމްރީންވެ ވަޒީފާގައެވެ. އައްޕޯގެ އެންމެ ބޮޑު އުއްމީދަކީ އައްޑޫ ސިޓީގެ ޓޫރިޒަމް މެދު އުޑުގައި ފިޔަޖަހަން ފަށާ ހިސާބުން އެ ފަސްގަނޑުގެ ދަރީން ފަތުރުވެރިކަން ކުރިއެރުވުމަށް ނުކުތުމެވެ.
އައްޑޫގެ ފަތުރުވެރިކަން ކުރިއަރުވުމަށް ހުރި ގޮންޖެހުންތަކުގެ ވާހަކަ ގިނައެވެ. އެހެންނަމަވެސް އައްޕޯ ދެކޭ ގޮތުގައި އެ ގޮންޖެހުންތަކަށްވެސް މަޑުމަޑުން އެދެވޭ ހައްލުތައް ދަނީ ލިބެމުންނެވެ. އައްޑޫ އަށް އިންޓަނޭޝަނަލް ފްލައިޓް ޖައްސާ އަދަދު އިތުރުކުރެވެން އޮތީ އެ ވަރުގެ ޑީމާންޑެއް ލިބިގެންކަމަށް އައްޕޯ ގަބޫލުކުރެއެވެ. އެ ޑިމާންޑް ލިބެން އޮތީ އައްޑޫގެ ބެޑް ކެޕާސިޓީ އިތުރުވެގެން ކަމަށްވެސް އައްޕޯ ގަބޫލުކުރެއެވެ. އައްޕޯ ގަބޫލުކުރާ ގޮތުގައި މިހާރު މޯލްޑިވިއަން އިން ދެކުނު ހަތަރު އަތޮޅު ގުޅުވާލުމަކީ ބެޑް ކެޕޭސިޓީއަށް ދިމާވެފައިވާ މައްސަލައަށް ލިބޭނެ ވަރަށް ބޮޑު ހައްލެކެވެ. ދެކުނުގެ ހަތަރު އަތޮޅު ގުޅުވާލުމުގެ ނަތީޖާއެއްގެ ގޮތުން ގަމަށް އިންޓަނޭޝަނަލް ފްލައިޓްތައް ފެށުމާއެކު، ހުވަދޫ އާއި ފުވައްމުލައް ސިޓީއަށް ފަތުރުވެރިން ފޮނުވުމުގައި ދިމާވާ ދަތިތަކަށް ހައްލުކުރެވިގެންދާނެކަމަށް އައްޕޯ ބުންޏެވެ.
އައްޕޯ ގަބޫލުކުރާ ގޮތުގައި ބޮޑު އިންވެސްޓެއްކޮށް ގެސްޓު ހައުސްތަކާއި ޑައިވް ސެންޓަރުތައް ނުވަތަ އެކްސްކާޝަން ސެންޓަރުތައް ކުރާއިރު ރަނގަޅު އިންވެސްޓެއްކޮށް، ރަނގަޅަށް މާކެޓް ކުރެވެން ޖެހެއެވެ. އަމިއްލައަށް ސޯޝަލް މީޑިއާއަށް ދޫކޮށްލާ ޕޯސްޓުތަކުގެ ބަދަލުގައި އެއަށްވުރެ ފުޅާކޮށް އެކަން ކުރެވެން ޖެހެއެވެ.. މާކެޓް އެޖެންސީތައް ނުވަތަ އެކަމުގެ ތަޖުރިބާކާރު މާހިރުންނާއި ގުޅިގެން ޕްރޮމޯޓްކުރުމަށް މަސައްކަތްކުރަންޖެހެއެވެ.
"އަމިއްލައަށް ސޯޝަލް މީޑީއާއަށް ކުރާ ޕޯސްޓުތަކުން މި ލިބެނީ ވަރަށް ކުޑަ ޕަސެންޓެއް. މިހާރު އައްޑޫ ޓޫރިޒަމް މިއޮތް ލެވެލް އިން ބޮޑެތި ޓްރެވެލް އެޖެންސީ ތަކާއި ގުޅިގެން މަސައްކަތްކުރަން އެބަޖެހޭ. ރާއްޖެއިން ބޭރަށް ދަތުރުކޮށް ޑީލްތައް ހޯދަން އެބަޖެހޭ." ރާއްޖެއިން ބޭރުގައި ދިރިއުޅޭ އެކުވެރިންގެ އެހީތެރިކަމާއެކު އެކި އެޖެންސީތަކާއި ގުޅިގެން މީދޫ ޕްރޮމޯޓްކުރުމަށް މަސައްކަތްކުރަމުން އަންނަ އައްޕޯ ބުންޏެވެ.
އައްޑޫ ނާސް ޝާކް ސެންކްޗުއަރީ، މީދޫ ސްޓިންގްރޭ ބީޗްގެ މަސައްކަތް މިވަގުތު ހުއްޓިފައިވީ ނަމަވެސް އެމަސައްކަތްވެސް އަލުން ފެށުމަކީ އައްޕޯގެ އުއްމީދެވެ. މީދޫ ކައުންސިލް އިންތިހާބުގައި ވާދަކުރާ އައްޕޯ ބުނީ މިހާރުވެސް އެކަމާއި ގުޅޭ މަޝްވަރާތައް ކުރެވުމުން އަންނަކަމަށާއި ފަތުރުވެރިން މީދޫއަށް ޒިޔާރަތްކުރަން ޖެހޭ ފަދަ ތަނަކަށް އެ ރަށް ހެދުމަށް އަބަދުވެސް މަސައްކަތްކުރާނެ ކަމަށެވެ.
އައްޑޫ އަދި މީދޫގެ ޓޫރިޒަމަށް އައްޕޯ ދެކޭ ހުވަފެންތައް ގިނައެވެ. މީދޫގެ ފަތުރުވެރިކަން ފުޅާވެ، އެކަމުގެ ފައިދާ ރަށުގެ ކޮންމެ ރައްޔިތަކަށް ކުރުމަކީ އޭނާގެ އުއްމީދެވެ. ދަނޑުވެރިންގެ އުފެއްދުންތަކަށް ރަނގަޅު މާކެޓެއް ލިބި، މީދޫގެ ކުދި ވިޔަފާރިތަކާއި، ސްޕީޑް ބޯޓުތައް އިތުރުވެ، ގެސްޓް ޝޮޕްތައް އިތުރުވެގެން ދިއުމަކީ އައްޕޯގެ ހުވެފެނެވެ.
މީގެ އިތުރުން ރިސޯޓްތަކުގައި މަސައްކަތްކުރާ މީދޫ ރައްޔިތުން އެބުރި އަމިއްލަ ވަޒނަށް އައިސް، މީދޫގެ ފަތުރުވެރިކަމަށް އިންވެސްޓްކޮށް މިކަމުގައި ރަށުގެ ހުރިހާ ރައްޔިތުން އަމަލީ ގޮތުން ބައިވެރިވާން އައްޕޯ ބޭނުންވެއެވެ. މީދޫގެ ފަތުރުވެރިކަން އެންމެ އުހަށް ގެންދިއުމަކީ އެންމެން ގުޅިގެން ކޮށްފި ނަމަ ވާނެ ކަމެއްކަމުގައި އައްޕޯ ގަބޫލުކުރެއެވެ.
