ލަންކާއަށް މިހާރު ކުރިމަތިވެފައިވާ ބާރުގަދަ ތޫފާން 'ދިތުވާ" ގައި މިހާތަނަށް 123 މީހަކު މަރުވެ 130 މީހަކު ގެއްލިގެން ރިޕޯޓު ކޮށްފައި ވާ ކަމަށް އިދާރާތަކުން ބުނެފިއެވެ.
ޖުމްލަ 12 ޑިސްޓްރިކްޓެއްގައި ފެބޮޑުވެފައި ވާއިރު ބިމުގެ އުސް ބައެއް ސަރަހައްދުތަކުން ބިންގަނޑު ކަނޑައިގެން ދިޔުމުގެ އިތުރުން، ބާރު ވަޔާއެކު އަންނަ ވިއްސާރައިގައި ބޯކޮށް ވާރޭވެހި ވަނީ ފެންބޮޑުވެފައެވެ.
ލަންކާ އަކީ މިހާރުވެސް 2000 އެއްހާ ދިވެހިން ދިރިއުޅޭ ތަނަކަށް ވާއިރު، ބައެއް ދިވެހިން މައުލޫމާތު ދީފައި ވާ ގޮތުގައި، ފެންބޮޑުވުމުގެ ސަބަބުން ދަތުރުފަތުރަށް ބުރޫ އަރާ އާންމު ދިރިއުޅުމުގެ ކަންކަން ވަނީ ހުއްޓުމަކަށް އައިސްފައެވެ. އަދި މުވާސަލާތީ ބައެއް ހިދުމަތްތަކަށް ބުރޫއަރާފައި ވުމުގެ ސަބަބުން މައުލޫމާތު ފޯރުކޮށްދިނުމުގައި ވެސް ގޮންޖެހުންތައް ކުރިމަތިވެފައި ވާކަމަށާއި، މަގުތަކުގައި ފެންބޮޑުވެފައި ވުމުގެ ސަބަބުން އާންމު ވިޔަފާރިތައް ބަންދުވެ ކަބޯތަކެތި ވިއްކާ ތަންތަންވެސް ބަންދުވެފައި ވާކަމަށް ބުނެއެވެ.
މޫސުމާބެހޭ ލަންކާގެ އިދާރާތަކުން ބުނާގޮތުގައި ބިންތިރި ސަރަހައްދުތަކަށް ކުރިއަށް އޮތް 24 ގަޑިއިރަކީ ނުރައްކާތެރިކަން ބޮޑުވެދާނެ ވަގުތުތައް ކަމަށް ބަލައިގެން ރައްކާތެރިވެ ތިބެން ޖެހޭ ކަމަށެވެ.
މިވަގުތު ކޮލަމްބޯގައި ތިބި ބައެއް ދިވެހިން ބުނީ، ކޮލަމްބޯއާ ދިމާއަށް ފެންގަނޑު ދަތުރުކުރާ ކަމުގެ މައުލޫމާތުވެސް ލިބެމުން ދާ ކަމަށާއި، އެހެންކަމުން ރައްކާތެރިކަމުގެ ފިޔަވަޅުތައް އަޅަމުން ގެންދާ ކަމަށެވެ.
ލަންކާގެ ތިރި ސަރަހައްދުތައް ކަމަށްވާ 'މަހާ އޮޔާ ބޭސިން' އަށް ކުރިއަށް އޮތް 24 ގަޑިއިރު ނުރައްކާބޮޑެވެ. އުސް ސަރަހައްދުތަކުން ފެންގަނޑު ފައިބައިގެން ދާއިރު ތިރިކޮށް އޮންނަ ސަރަހައްދުތަކުގައި ފެންގަނޑު ބޮޑުވާލެއް އަވަސް ވެއެވެ.
ލަންކާއަށް މިހާރު ކުރިމަތިވެފައި ވާ މި ތޫފާނާ ގުޅިގެން ލިބެމުންދާ ގެއްލުތައް ފޫބެއްދުމަށް އެކުވެރި ދައުލަތްތަކުންނާއި ބޮޑެތި ހިދުމަތްތައް ދޭ ކުންފުނިތަކުން ގެންދަނީ އެހީތެރިކަން ފޯރުކޮށް ދެމުންނެވެ. އެގޮތުން ދިވެހިރާއްހެ، އިންޑިއާ، ޗައިނާ، އެމެރިކާ އަދި އެނޫންވެސް ގައުމުތަކުން ލަންކާއަށް އެހީތެރިކަން ފޯރުކޮށް ދެމުން ގެންދާއިރު މުވާސަލާތީ ވަސީލަތްތަކަށް ހާއްސަ ސްޓާލިންކުން ވަނީ، އަންނަ ޑިސެމްބަރުގެ ނިޔަލަށް މުވާސަލާތީ ހިދުމަތްތައް ހިލޭ ލިބޭނެކަން ހާމަ ކޮށް އިއުލާންކޮށްފައެވެ.
