މާލެއިން ހުޅުމާލެއަށް ދާ ހައިވޭ ލޭންގެ 4 ލޭން ނިމޭ ހިސާބުގައި އެކްސިޑެންޓެއް ހިނގާ ދެ މީހަކަށް އަނިޔާވެއްޖެއެވެ.
ފުލުހުން ބުނީ ސައިކަލަކާއި ޕިކަޕެއް ޖެހި އެކްސިޑެންޓުވެފައިވާ ކަމުގައި މައުލޫމާތު މިއަދު 09:00 ހާއިރު ފުލުހުންނަށް ލިބިފައިވާ ކަމަށެވެ.
މި އެކްސިޑެންޓުގައި އަނިޔާވީ ސައިކަލު ދުއްވަން އިން 28 އަހަރުގެ ދިވެހި ފިރިހަނަކަށާއި ސައިކަލު ފަހަތުގައި އިން 22 އަހަރުގެ އިންޑިއާ އަންހެނަކަށް ކަމަށް ފުލުހުން ވަނީ ބުނެފައެވެ. ދެ މީހުންނަށްވެސް އައިޖީއެމްއެޗްގައި ފަރުވާ ދެމުން ދާކަމަށް ފުލުހުން ވަނީ ބުނެފައެވެ.
މީގެ އިތުރުން ފުލުހުން ބުނީ މި އެކްސިޑެންޓުގައި ފިރިހެން މީހާގެ ކަނައަތު ކޮޑުހުޅު ނެއްޓި އެކިވަރުގެ އަނިޔާވެފައިވާކަމަށެވެ. އަދި އެކްސިޑެންޓުވި އަންހެން މީހާ ގައިގެ އެކި ތަންތަނުން މަށައިގެން ގޮސް އެކިވަރުގެ އަނިޔާވެފައިވާކަމަށް ފުލުހުން ވަނީ ބުނެފައެވެ.
މި މައްސަލަ ފުލުހުން ދަނީ ތަހުގީގުކުރަމުންނެވެ.
