2026 ވަނަ އަހަރުގެ އޭޕްރީލް މަހު ބޭއްވުމަށް ހަމަޖެހިފައިވާ ލޯކަލް ކައުންސިލް އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުގެ މަސައްކަތްތަކަށް ބޭނުންވާ މުވައްޒަފުން ހޯދުމަށްޓަކައި އިލެކްޝަންސް ކޮމިޝަން (އީސީ) އިން ބާއްވާ ވޯކް-އިން އިންޓަވިއުގައި 100 އަށް ވުރެ ގިނަ މީހުން ބައިވެރިވެއްޖެއެވެ.
އީސީ އިން ބުނީ އިއްޔެ ކަލާފާނު ސްކޫލްގައި ބޭއްވި ވޯކް-އިން އިންޓަވިއުގައި 100 އަށް ވުރެ ގިނަ މީހުން ބައިވެރިވެފައިވާކަމަށާއި، މިއަދު ހުޅުމާލޭ ދެވަނަ ފިޔަވަހީގައި ހުންނަ ކާމިލް ދީދީ ޕްރައިމަރީ ސްކޫލްގައި އިންޓަވިއުކުރުން ކުރިއަށް ގެންދާކަމަށްވެސް ވަނީ ބުނެފައެވެ.
މިރޭ 22:00 އާ ހަމައަށް އިންޓަވިއުކުރުން ކުރިއަށް ގެންދާނެކަން ފާހަގަކޮށް އީސީ އިން ބުނީ މި އިންޓަވިއުތަކުގައި ގިނައީ އުމުރުން 18 އަހަރާއި 25 އަހަރާ ދެމެދު ޒުވާނުން ކަމަށެވެ. މި އިންޓަވިއުތަކަށް ލިބޭ ތަރުހީބު ބޮޑުކަން ފާހަގަކޮށް އީސީ އިން ބުނީ އެންމެ ގިނައިން ފޯމު ހުށަހަޅާފައި ވަނީ އޮފިސަރުންނަށާއި ސީނިއާ އޮފިސަރުންގެ މަގާމަށް ކަމަށެވެ.
އައިޑީ ކާޑާއި ތައުލީމީ ސެޓްފިކެޓް އަދި ސީވީގެ ކޮޕީއާއެކު އިންޓަވިއުއަށް ދިއުމުން ޝަރުތުހަމަވާ މީހުންނަށް ފޯމު ހުށަހެޅުމާއި ވަގުތުން އިންޓަވިއުކުރުމާއި ޕްރެކްޓިކަލް ޓެސްޓް ހެދުމުގެ އިންތިޒާމްތައް ހަމަޖެހިފައިވާނެކަމަށް އީސީ އިން ވަނީ ބުނެފައެވެ.
އީސީ އިން ވަނީ ވޯކް-އިން އިންޓަވިއުއަށް ފަހު އެ މަގާމުތަކަށް މުވައްޒަފުން ހަމަނުވާ ނަމަ، އިއުލާނުގައިވާ އަދަދަށް މުވައްޒަފުން ހަމަވަންދެން އަންނަ މަހު 1 ފެށިގެން ކޮންމެ 15 ދުވަހަކުން މަގާމަށް ކުރިމަތިލާފައިވާ މީހުން އިވެލުއޭޓްކޮށް މީހުން ނަގަމުން ދާނެ ކަމަށްވެސް ބުނެފައެވެ.
