މާލެ ރައްޔިތުންނަށް ބޯހިޔާވަހިކަން ފޯރުކޮށް ދިނުމަށް ފެށި "ގެދޮރުވެރިޔާ" ސްކީމުގެ ދަށުން މިހާރު އިމާރާތް ކުރަމުންދާ 4،000 ފްލެޓު ލިބޭ މީހުންގެ ލިސްޓު އަންނަ ބުރާސްފަތި ދުވަހު އާންމު ކުރައްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނުމިހެން ވިދާޅުވީ، ދ. އަތޮޅަށް ކުރައްވަމުން ދާ ދަތުރުފުޅުގެ ތެރެއިން ދ. ހުޅުދެއްޔަށް ވަޑައިގެން އެރަށުގެ ރައްޔިތުންނާ ބައްދަލުކުރެއްވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ. ރައީސް ވިދާޅުވީ، މާލޭ ރައްވެހިންނަށް ހާއްސަކޮށްގެން ދޭން ނިންމާފައިވާ 4000 ފްލެޓްގެ މައްސަލައަކީ ވަރަށް ގިނަ ރައްޔިތުންތަކެއްގެ ކަންބޮޑުވުން ކަމަށާއި އެ ކަމުގެ ސަރުކާރުގެ ނިންމުން ތަކުރާރުކޮށް ދެންނެވި ކަމުގައި ވިޔަސް ބައެއް މީހުން އެ ވާހަކަތައް ދޮގު ކުރާ ކަމަށެވެ.
ރޯސަ މަސް ފެށެން ގާތްވެފަިއވާ އިރު މި ހަފްތާގައި ދެން ބާކީ އޮތީ ސަރުކާރު ހުޅުވިފައި ހުންނާނެ ދެ ދުވަސް ކަމަށާއި އަންނަ ބުރާސްފަތި ދުވަހު އެ ލިސްޓް އާންމު ކުރައްވާނެ ކަމަށް ރައީސް ވިދާޅުވިއެވެ. ރިޔާސީ ބަޔާން އިއްވެވި ދުވަހު ވިދާޅުވި ފަދައިން ރޯދައިގެ ކުރިން އެ ލިސްޓް އިއުލާން ކުރައްވާނެ ކަމުގެ ޔަގީން ކަން ރައީސް ދެއްވެވިއެވެ.
އެގޮތުން ބުރާސްފަތި ދުވަހު ހައުސިން މިނިސްޓްރީން ބާއްވާ ނޫސްވެރިންގެ ބައްދަލުވުމުގައި އެ ލިސްޓް އިއުލާން ކުރާނެ ކަމަށް ރައީސް ވިދާޅުވިއެވެ. އެ ލިސްޓް ނެރޭ އިރު ލިބުނު ފަރާތްތަކާއި، ނުލިބުނު ބަޔަކަށް ނުލިބުނީ ކީއްވެ ކަން ފެންނަން އޮންނާނެ ކަމަށް ރައީސް ވިދާޅުވިއެވެ. އަދި ފްލެޓް ނުލިބޭ ފަރާތްތަކަށް ޝަކުވާ ހުށަހެޅުމުގެ ފުރުސަތު ވެސް ހުޅުވާލާނެ ކަމަށް ރައީސް ވިދާޅުވިއެވެ.
މިދިޔަ ސަރުކާރުން ފެށި ގެދޮރުވެރިޔާ ސްކީމްގެ ފްލެޓްގެ ދާއިމީ ލިސްޓް އާންމުކޮށްފައި ވަނީ އެ ދައުރު ނިމުމާ ގާތްވެފައި ވަނިކޮށެވެ. އެ ލިސްޓް އާންމު ކުރި އިރު އާންމުންގެ ބޮޑެތި ކަންބޮޑުވުންތަކެއް ހުރެ އެ މައްސަލައިގައި އޭސީސީން ވަނީ ފްލެޓް ލިސްޓްގައި ހުރި މައްސަލަތައް ބަލައި އެ މަސައްކަތް ވަގުތީ ގޮތުން އޭރު ހުއްޓާލުމަށް އެދިފައެވެ. މަސައްލަ ބަލައި ތަހުގީގު ކުރުމަށް ފަހު ހައުސިން މިނިސްޓްރީއާ ރިޕޯޓް ހަވާލު ކުރުމަށް ފަހު ފްލެޓް ލިސްޓް އާންމު ކުރުމަށް އެތައް ތާރީހުތަކެއް މިދިޔަ އަހަރު ތެރޭ ސަރުކާރުން ވަނީ ދީފައެވެ. ނަމަވެސް ލިސްޓް އިއުލާން ނުކޮށް ވަނީ ދިގުދެމިގެން ގޮސްފައެވެ.
މި ލަސްތަކާ ގުޅިގެން އާންމުންގެ ބޮޑެތި ކަންބޮޑުވުންތަކެއް އުފެދި އެތައް ފަހަރެއްގެ މަތިން ފްލެޓް ލިސްޓް އިއުލާން ކުރުމަށް ގޮވާލައި އާންމުން ވަނީ އިހުތިޖާޖު ވެސް ކޮށްފައެވެ. އާންމުންގެ ކަންބޮޑުވުން އިންތިހާއަށް ދިއުމުން ރައީސް މުއިއްޒު ވަނީ ފްލެޓް ލިސްޓް އާންމު ކުރުން ލަސްވަމުންދާ ސަބަބު ވެސް ހާމަ ކުރައްވާފައެވެ.
އެ ގޮތުން މާލެ ސަރަހައްދުން 4000 ފްލެޓް ދޫކުރުމަށް އާންމު ކުރި ފްލެޓް ލިސްޓްގައި ހުރި މައްސަލަތަކުގެ ތެރެއިން އުސޫލާ ހިލާފަށް ކޮށްފައިވާ ކަންކަން ހާމަ ކުރައްވަމުން ރައީސް މުއިއްޒު ވިދާޅުވެފައި ވަނީ، ކުރީގެ ފްލެޓް ކޮމިޓީގައި ހިމެނޭ ފަރާތްތަކަށް ފްލެޓް ލިބޭ ގޮތަށް މާކްސް ބަދަލުކޮށްފައި އެބަހުރި ކަމަށެވެ. އުސޫލާ ހިލާފަށް ކުރީ ސަރުކާރުގެ އިސް ވެރިންނަށް ފްލެޓް ލިބޭ ގޮތަށް ލިސްޓްގައި ހިމަނާފައި އެބަހުރި ކަމަށާއި ނުފޫޒު ބޭނުން ކޮށްގެން އެއް އާއިލާއެއްގެ ގިނަ މެންބަރުންނަށް ފްލެޓް ބަހާފައި އެބަ ހުރި ކަމަށް ވެސް ރައީސް ވިދާޅުވެފައު ވެއެވެ.
އެއަށް ފަހު ރައީސް މުއިއްޒު ވަނީ ރޯދައިގެ ކުރިން ފްލެޓް ލިސްޓް އާންމު ކުރައްވާނެ ކަމަށް ވިދާޅުވެފައެވެ.
މިފަހަރު ފްލެޓް ލިސްޓް އާންމު ކުރާ އިރު ހުރިހާ ފަރާތްތަކުގެ ފޯމްތައް އަލުން އިވެލުއޭޓް ކުރުމުގެ ބަދަލުގައި ނޮވެމްބަރު 15، 2023 ގައި ގެޒެޓް ކޮށްފައިވާ ފްލެޓް ލިބޭ މީހުންގެ ލިސްޓު ވެރިފިކޭޝަން ޕްރޮސެސްއެއް ކުރިއަށް ގެންދިއުމަށް ހައުސިން މިނިސްޓްރީން ވަނީ ނިންމާފައެވެ. އެގޮތުން މި ވެރިފިކޭޝަން ޕްރޮސެސް ކުރިއަށް ގެންދާ އިރު، ބަލާނީ ޖޫން 26، 2022 ގައި ގެޒެޓް ކުރެވުނު ގެދޮރުވެރިޔާ ސްކީމްގެ ދަށުން ގެދޮރު ދޫކުރާ އުސޫލު އަދި އެޕްލިކޭޝަން ހުށަހެޅުމަށް ތައްޔާރު ކޮށްފައިވާ (ހިޔާވަހި) ޕޯޓަލްގައި ދީފައިވާ އިރުޝާދުތަކަށް ކަމަށް އެ މިނިސްޓްރީން ވަނީ ބުނެފައެވެ.
