އައްޑޫ ސިޓީގައި އަޅާފައިވާ ހަންކެޑެ ބްރިޖު މި ފެށޭ ފެބްރުއަރީ މަހުގެ 1 ވަނަ ދުވަހު ހުޅުވާލާނެކަމަށް މިނިސްޓްރީ އޮފް ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާ އިން ބުނެފިއެވެ.
އައްޑޫ ސިޓީ ލިންކު ރޯޑުގެ ފެންވަރު ދަށްވެ، މަގު ބޭނުންކުރާ މީހުންނަށް ގިނަ ދަތިތަކެއް ކުރިމަތިވެފައިވާއިރު ހަންކެޑެ ބްރިޖު ހުޅުވުން ލަސްވުމާއި ގުޅިގެން އައްޑޫ ސިޓީގެ ރައްޔިތުންގެ އިތުރުން ކައުންސިލުންވެސް ވަނީ ކަން ބޮޑުވުންފާޅުކޮށްފައެވެ. އަދި މި މަގު ބްރިޖު ނުހުޅުވި ލަސްވާންޖެހޭ އެއްވެސް ސަބަބެއް ނެތްކަމަށް އައްޑޫ ސިޓީ މޭޔަރު އަލީ ނިޒާރުވެސް ވަނީ ވިދާޅުވެފައެވެ.
މި ކަންބޮޑުވުންތަކާއެކު، މި މަހުގެ 28 ވަނަ ދުވަހު އައްޑޫ ސިޓީ ހަންކެޑެ ބްރިޖް ހުޅުވުމުގެ ތައްޔާރީތަކާއި ގުޅޭ ގޮތުން މަޝްވަރާ ކުރުމަށްޓަކައި އައްޑޫސިޓީ ކައުންސިލު، ހައުސިން މިނިސްޓްރީ އަދި އައްޑޫސިޓީ ފުލުހުންނާއި އެކު ބައްދަލުވުމެއް ވަނީ ބާއްވާފައެވެ. މި ބައްދަލުވުމުގައި ބްރިޖަށް އަރާ މަގުގައި ޓްރެފިކް ފްލޯ މެނޭޖްކުރުމާއި ގުޅޭ ގޮތުން މަޝްވަރާކޮށްފައިވާއިރު މިއަދު މިނިސްޓްރީން ބުނީ އަންނަ މަހުގެ 1 ވަނަ ދުވަހު އައްޑޫ ސިޓީ ހަންކެޑެ ޑީޓުއާ ލިންކް ރޯޑް އާމުންނަށް ހުޅުވާލާނެކަމަށެވެ.
ހަންކެޑެ ބްރިޖަކީ އައްޑޫ ގައުކެޑި އާއި މަރަދޫ ގުޅާލުމަށް އިންޑިއާގެ އެފްކޮންސް ކުންފުންޏާ ހަވާލުކޮށް ހަދާފައިވާ ބްރިޖެކެވެ.
