ގައުމީ ގުރުއާން މުބާރާތަށް ދައުލަތުން ހަރަދުކުރާގޮތަށް ހަމަޖައްސަން ސަރުކާރުން ނިންމައިފިއެވެ.
ދިވެހިރާއްޖޭގައި ބޭއްވޭ އެންމެ ބޮޑު، އެންމެ ގިނަ ދަރިވަރުން ބައިވެރިވާ ގުރުއާން މުބާރާތް ކަމަށްވާ ގައުމީ ގުރުއާން މުބާރާތް މީގެ ކުރިން ބާއްވަމުން އަންނަނީ ތަނަވަސް އެކި ފަރާތްތަކުން ދޭ ފައިސާއިން ހަރަދު ކޮށްގެންނެވެ.
ނަމަވެސް މި އަހަރުން ފެށިގެން ކީރިތި ގުރުއާން ކިޔެވުމުގެ ގައުމީ މުބާރާތަކީ އެންމެ ބޮޑެތި އިނާމުތައް ދީގެން އަދި އެންމެ އިނާމުތައް ގިނަ މުބާރާތްކަމުގައި ހައްދަވާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ މީގެ ކުރިން ވިދާޅުވެފައެވެ.
އެހެންކަމުން ރައީސްގެ މި އަމާޒަށް ވާސިލްވުމަށް މިއަހަރުން ފެށިގެން ކީރިތި ގުރުއާން ކިޔެވުމުގެ ގައުމީ މުބާރާތަކީ ސީދާ ދައުލަތުގެ ބަޖެޓުގައި ލިޔެ، ދައުލަތުގެ ބަޖެޓުން ހަރަދުކޮށްގެން ހިންގާ މުބާރާތަކަށް ހެއްދެވުމަށް އެމަނިކުފާނު ނިންމަވާފައިވާ ކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވިއެވެ.
އަދި ހަމަ އެހެންމެ މިއަހަރުން ފެށިގެން ކީރިތި ގުރްއާން ހިތުދަސްކުރާ ހާފިޒުންގެ ދަސްވެނިވުމުގެ ރަސްމިއްޔާތުގެ ގޮތުގައި ވަކި ހާއްސަ ރަސްމިއްޔާތެއް ބޭއްވުމަށްވެސް ވަނީ ނިންމަވާފައެވެ.
ކޮންމެ އަހަރުކުވެސް މި މުބާރާތް ބާއްވަމުން އަންނައިރު ކީރިތި ގުރްއާން ކިޔެވުމުގެ 36 ވަނަ ގައުމީ މުބާރާތް މިދިޔަ އަހަރު ބާއްވާފައި ވަނީ ޖުލައި މަހުއެވެ. އެ ފަހަރު އެއްވަނަ ހޯދީ، ކެލާ ޔޫތްފޯރަމުގެ ފަރާތުން ބައިވެރިވި ޔައީޝް މުހައްމަދު ނިޔާޒެވެ. ނުބަލައި ކިޔެވުމުގެ ގޮފިން އެއްވަނަ ހޯދީ، ތާޖުއްދީން ސްކޫލުގެ އާއިޝަތު ޝައިބާ އަހްމަދެވެ.
