ރާއްޖޭގެ 57 ރަށެއްގައި 12،000 އަށްވުރެ ގިނަ ހައުސިން ޔުނިޓު އަޅާދޭނެ ފަރާތެއް ހޯދުމަށް ފިނޭންސް މިނިސްޓަރީން ހުޅުވާލައިފިއެވެ.
ފިނޭންސް މިނިސްޓްރީން މިއަދު ކުރި އިއުލާނެއްގައި ބުނީ ހައުސިން މިނިސްޓްރީގެ އެދުމުގެ މަތީން ރާއްޖޭގެ 57 ރަށެއްގައި ޕަބްލިކް ހައުސިިން ޕްރޮޖެކްޓުގެ ދަށުން ބޯހިޔާވަހިކަމުގެ މަޝްރޫއެއް ފެއްޓުމަށް ހަމަޖެހިފައިވާ ކަމަށެވެ. މި މަޝްރޫއުގެ ދަށުން އިއުލާނު ކުރުމަށް ހަމަޖެހިފައިވާ ކޮންޓްރެކްޓްތަކުގެ މަސައްކަތްތައް ކުރިއަށް ގެންދިއުމަށް ހަމަޖެހިފައިވަނީ އިންޓަނޭޝަނަލް ކޮމްޕެޓިޓިވް ބިޑިން (އައިސީބީ) އާއި ނޭޝަނަލް ކޮމްޕެޓިޓިވް ބިޑިން (އެންސީބީ) އުސޫލުތަކާއި، ދައުލަތުގެ މާލިއްޔަތުގެ ގަވާއިދުގެ ބާބު 10ގައި ބަޔާންކުރާ ހަމަތަކުގެ މަތީންކަމަށް ފިނޭންސް މިނިސްޓްރީން ވަނީ ބުނެފައެވެ.
ފިނޭންސް އިން އިތުރަށް ބުނީ މި މަޝްރޫއުގެ މަސައްކަތަށް ޝައުގުވެރިވާ ފަރާތްތަކަށް އެނެކްސް ދޭއްގައި ކަނޑައަޅާފައިވާ ކެޓަގަރީތަކަށް އެކި ބާވަތުގެ ފައިނޭންޝަލް މޮޑެލް އޮޕްޝަންތައް މެދުވެރިކޮށް ބީލަން ހުށަހެޅުމުގެ ފުރުސަތު ދެވޭނެ ކަމަށެވެ. އަދި ފައިނޭންޝަލް މޮޑެލްތަކާއި އެ މޮޑެލްތަކުގެ ތަފްސީލީ މައުލޫމާތު މި މަޝްރޫއުގެ ދަށުން ކުރެވޭ އިއުލާންތަކުގެ ސްޕެސިފިކް ޕްރޮކިއުމަންޓް ނޯޓިސްތަކާއެކު ފޯރުކޮށްދެވޭނެ ކަމަށެވެ.
ރާއްޖޭގެ އަތޮޅުތަކުގައި އިއުލާން ކުރެވި ކުރިއަށް ގެންދިއުމަށް ހަމަޖެހިފައިވާ ހައުސިން މަޝްރޫއުތަކަށް ކޮންޓްރެކްޓަރުން ހޯދުމަށް މިއަދު އިއުލާންކޮށްފައިވާއިރު މީގެ ކުރިން ހައުސިން މިނިސްޓަރު ޑރ. އަބްދުﷲ މުއްތަލިބް ވިދާޅުވީ މި މަޝްރޫއުގެ މަސައްކަތްތަކަށް ދިވެހި ކުންފުނިތަކާ އަދި ބޭރުގެ ކުންފުނިތަކަށްވެސް ހުޅުވާލާނެކަމަށެވެ. އަދި ޕްރޮޖެކްޓްތަކަށް ހުޅުވާލާނީ، ފައިނޭންސިންގެ އެކިއެކި ސްކީމްތަކުގެ ތެރެއިންކަމަށް މިނިސްޓަރު ވިދާޅުވިއެވެ.
ބޯހިޔާވަހިކަމުގެ މައްސަލައަށް ހައްލު ގެނައުމަށް، ރައީސްގެ ވައުދުފުޅުތަކުގެ ތެރޭގައި ރާއްޖޭގެ އުތުރުގައި 20000 ހައުސިން ޔުނިޓް އަދި ދެކުނުގައި 20000 ހައުސިން ޔުނިޓްގެ މަޝްރޫއު ހިންގެވުން ހިމެނެއެވެ.
