އިދިކޮޅު އެމްޑީޕީ އިން "ގާނޫނުއަސާސީގެ ދިފާއު" ގައި "ފުދިއްޖެ ފުނޑިއްޖެ" ގެ ނަމުގައި އަންނަ ހުކުރު ދުވަހު ބާއްވާ ހިނގާލުން ރޭގަނޑަށް ބަދަލުކޮށްފި އެވެ.
އެމްޑީޕީން ބުނީ މި ހަރަކާތް ހުކުރު ދުވަހުގެ ރޭ 8:00 އަށް ބަދަލުކޮށްފައިވާ ކަމަށާއި މި ހިނގާލުން ފަށާނީ އާޓިފިޝަލް ބީޗް ސަރަހައްދުން ކަމަށެވެ.
އެމްޑީޕީން "ގާނޫނުއަސާސީގެ ދިފާއު" ގައި ޖެނުއަރީ 31 ގައި މަގުމައްޗަށް ނުކުންނަން އެ ޕާޓީގެ ގައުމީ މަޖިލީހުން ފާސްކުރީ މިމަހުގެ އަށް ވަނަ ދުވަހުއެވެ. މިއީ ރައީސް ޑރ. މުޙައްމަދު މުޢިއްޒުގެ ވެރިކަމުގައި، އެމްޑީޕީން ދުރާލާ ރާވައިގެން މަގުމަތީގައި އިހުތިޖާޖުކުރަން ބާއްވާ ފުރަތަމަ ހަރަކާތަށްވާއިރު އެމްޑީޕީން އަންނަނީ މި ހަރަކާތް ވަރަށް ބޮޑަށް ޕްރޮމޯޓުކުރުމަށް މަސައްކަތް ކުރަމުންނެވެ.
އެމްޑީޕީން ބުނީ މި ހަރަކާތް ފަށާފައިވަނީ ރައްޔިތުންގެ މަޖިލީހުގެ މެންބަރެއް ޕާޓީން ވަކިކޮށްގެން ގޮނޑި ގެއްލޭ ގޮތަށް ގާނޫނުއަސާސީއަށް ގެނައި ބަދަލާ ގުޅިގެން ކަމަށެވެ. އަދި މި ބަދަލުތަކަކީ ގާނޫނުއަސާސީގެ ބާރު ކަނޑުވާލާ، ވެރިކަމުގެ ނިޒާމު މަސްހުނިކުރުވާ ބަދަލުތަކެއްގެ ގޮތުގައި އެމްޑީޕީއިން ވަނީ ސިފަކޮށްފައެވެ.
މީގެ ކުރިން ވެސް އެމްޑީޕީން ވަނީ "ގާނޫނުއަސާސީގެ ދިފާއު"ގައި ޑިސެމްބަރު 10، 2024 ގައި ކާނިވާ ސަރަހައްދުގައި ޖަލްސާއެއް ބާއްވާފައެވެ.
