ރާއްޖޭގެ އަތޮޅުތަކުގައި އިއުލާން ކުރެވި ކުރިއަށް ގެންދިއުމަށް ހަމަޖެހިފައިވާ ހައުސިން މަޝްރޫއުތަކަށް ކޮންޓްރެކްޓަރުން ހޯދުމަށް އަންނަ ހަފްތާގެ ތެރޭގައި ހުޅުވާލުމަށް ތައްޔާރުވަމުންދާކަމަށް ހައުސިން މިނިސްޓަރު ޑރ. އަބްދުﷲ މުއްތަލިބް ވިދާޅުވެއްޖެއެވެ.
ކ.ގުޅީގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައި ރައީސް ވަނީ ސަރުކާރުން އަތޮޅުތަކުގައި ހިންގެވުމަށް ކަނޑައަޅުއްވާފައިވާ ބޯހިޔާވަހިކަމުގެ ހުރިހާ މަޝްރޫއެއްގެ އަމަލީ މަސައްކަތް ފެށުމަށް ކޮންޓްރެކްޓަރުން ހޯދަން މިމަހު އިއުލާންކުރައްވާނެކަމަށް ވިދާޅުވެފައެވެ.
މި މަސައްކަތާއި ގުޅޭ ގޮތުން މިނިސްޓަރު ވިދާޅުވީ ތައްޔާރުވަމުންދަނީ އެއްފަހަރާ އެތަށް ހާސް ހައުސިން ޔުނިޓް ތަރައްގީކުރުމުގެ މަޝްރޫއުއަށް ކޮންޓްރެކްޓަރުން ހޯދުމަށްކަމަށެވެ. މިކަމާ ގުޅޭ ޓެކްނިކަލް މަސައްކަތްތައް ފިނޭންސް މިނިސްޓްރީއާއެކު ކުރަމުންދާކަން ހާމަކޮށް މިނިސްޓަރު ވިދާޅުވީ އަންނަ ހަފްތާގައި ކޮންޓްރެކްޓަރުން ހޯދުމަށް ހުޅުވާލުމަށް ތައްޔާރުވަމުންދާކަމަށެވެ.
މީގެ އިތުރުން މިނިސްޓަރު ވިދާޅުވީ މި މަޝްރޫއުގެ މަސައްކަތްތަކަށް ދިވެހި ކުންފުނިތަކާ އަދި ބޭރުގެ ކުންފުނިތަކަށްވެސް ހުޅުވާލާނެކަމަށެވެ. އަދި ޕްރޮޖެކްޓްތަކަށް ހުޅުވާލާނީ، ފައިނޭންސިންގެ އެކިއެކި ސްކީމްތަކުގެ ތެރެއިންކަމަށް މިނިސްޓަރު ވިދާޅުވިއެވެ.
ބޯހިޔާވަހިކަމުގެ މައްސަލައަށް ހައްލު ގެނައުމަށް، ރައީސްގެ ވައުދުފުޅުތަކުގެ ތެރޭގައި ރާއްޖޭގެ އުތުރުގައި 20000 ހައުސިން ޔުނިޓް އަދި ދެކުނުގައި 20000 ހައުސިން ޔުނިޓްގެ މަޝްރޫއު ހިންގެވުން ހިމެނެއެވެ.
