ރ.ރަސްމާދޫ އަކީ، އެރަށުގައި ފުލުހުން ގާއިމުވެ ތިބޭ، އަދި ފުލުހުންގެ ހިދުމަތްދޭ ރަށަކަށް، ވީހާވެސް އަވަހަށް ހެއްދެވުމަށް ނިންމަވާފައިވާކަމުގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރ. އަތޮޅުގެ ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގައި އެ އަތޮޅު ރަސްމާދޫއަށް ވަޑައިގެން ރައްޔިތުންނާ ބައްދަލުކުރައްވާ ވާހަކަފުޅުދައްކަވަމުން ރައީސް ވިދާޅުވީ އެރަށުގައި ސަރުކާރުން ފަށާފައިވާ، އެހެން ނަމަވެސް ނުނިމި ހުރި ގިނަ މަސައްކަތްތައް އެބަހުރިކަން ފާހަގަކުރައްވާފައެވެ. އެގޮތުން ގެދޮރުގެ ދަތިކަމާއި ތޮއްޖެހުމަކީ، އިޖުތިމާއީ މައްސަލަތަކުގެވެސް މައިގަނޑު ސަބަބުކަން ފާހަގަކުރައްވަމުން ރައީސް ވިދާޅުވީ ރަސްމާދޫއަށްވެސް ދިމާވެފައިވާ މި މައްސަލައަށް ހައްލެއް ހޯދުމުގެ ގޮތުން، ހައުސިން ޔުނިޓު މަޝްރޫއު ކުރިއަށް ގެންގޮސްދެއްވާނޭކަމަށެވެ.
މިހާރު ހުއްޓިފައިހުރި މުހިންމު ކަންކަން ކުރިއަށްގެންދިއުމަށް، މަސައްކަތްތަކެއް ތަރުތީބުކުރައްވާފައިވާކަން ހާމަކުރައްވަމުން ރައީސް ވިދާޅުވީ ހުއްޓިފައިވާ ފެނުގެ ނިޒާމުގެ މައްސަލައަށް އިޝާރާތްކުރައްވާފައެވެ. އެގޮތުން އެ މަސައްކަތް ހަވާލުކުރި ފަރާތުން ރަސްމާދޫ ނޫން ރަށްރަށުގައިވެސް މަސައްކަތް ހުރީ ހުއްޓާލާފައިކަން ފާހަގަކުރައްވަމުން ރައީސް ވަނީ އަލުން އެ މަސައްކަތްތައް ފަށައި، މަސައްކަތް އެއްކޮށް ނިންމަވައިދެއްވާނޭކަމުގައި ވިދާޅުވެފައެވެ.
މީގެ އިތުރުން ރައީސް ވިދާޅުވީ ސްކޫލްގެ މަސައްކަތް، ގޮސްފައިވާ ހިސާބު ދެނެގަނެ، ދެން ނިންމަން ހުރި މަސައްކަތްތައް، ސަރުކާރުން ކުރައްވާނޭކަމަށެވެ. އަދި ކުޅިވަރާއި ހަށިހެޔޮކަމުގެ ދާއިރާއިންވެސް ބޭނުންވާ ކަންކަން ފުރިހަމަކޮށްދެއްވައި، ލެބޯޓްރީއެއް ހިމެނޭ ގޮތަށް ރަށު ސިއްހީ މަރުކަޒުގެ ޖާގަ އިތުރުކޮށްދެއްވާނޭ ކަމަށްވެސް ރައީސް ވިދާޅުވެފައެވެ.
އިތުރަށް ރައީސް ވިދާޅުވީ ރަސްމާދޫ އެންޓަނާ މިހާރު ހުރި ތަނުން ބަދަލުކުރުމާއި، އެކަމުގައި ދޭންޖެހޭ ފައިސާއާ ގުޅޭގޮތުން، އުރީދޫއާ ވާހަކަދައްކައިގެން، ކަމާބެހޭ ވުޒާރާތަކުގެ ތެރެއިން އެކަން ކުރައްވާނެކަމަށެވެ.
