ވިޔަފާރިއާއި، ޓެކްނޮލޮޖީގައި އެމެރިކާ އާ ވާދަކުރާ ޗައިނާއަށް އަމާޒުކޮށް އެމެރިކާ އަށް އެތެރެ ކުރާ މުދަލުން ނަގާ ޓެރިފް 10 ޕަސެންޓަށް ބޮޑުކުރަން އެމެރިކާއިން ނިންމައިފިއެވެ.
އެމެރިކާގެ އާ ރައީސް ޑޮނާލްޑް ޓްރަމްޕް ވިދާޅުވީ އަންނަ ފެބްރުއަރީ މަހުގެ 1 ވަނަ ދުވަހުން ފެށިގެން ޓެރިފް ބޮޑުވާނެ ކަމަށެވެ.
ސަބަބު ދައްކަވަމުން އޭނާ ވިދާޅުވީ، ޗައިނާއިން ގެންދަނީ ފެންޓަނީލް ނަމަކަށް ކިޔާ ޑްރަގެއް މުޅި ދުނިޔެއާއި އެމެރިކާއަށް ފޯރުވަމުން ކަމަށާއި މެކްސިކޯއާއި ކެނެޑާގެ ތެރެއިންވެސް އެ ޑްރަގް އެމެރިކާއަށް ފޮނުވާ ކަމަށެވެ.
އެއާއެކު ޓްރަމްޕް ވަނީ މެކްސިކޯ އާއި ކެނެޑާއަށް ވެސް އިންޒާރު ދެއްވާ، މެކްސިކޯގެ ޑިއުޓީ 25 ޕަސެންޓަށް ބޮޑުކޮށް ކެނެޑާގެ ޑިއުޓީވެސް ބޮޑުކުރައްވަން ޖެހިވަޑައިގެންފާނެ ކަމަށް ވިދާޅުވެފައެވެ. އޭނާ ވިދާޅުވާ ގޮތުން އެގައުމުތަކުން ވަގަށް އެމެރިކާއަށް މީހުން އެތެރެ ވުމާއި ޗައިނާގެ ބޭސް އެމެރިކާއަށް ވައްދައެވެ.
އެމެރިކާއިން މި މޭރުމުން ވާހަކަ ދައްކާފައިވާ އިރު، އެމެރިކާގެ ނަން ވިދާޅުނުވެ ޗައިނާގެ ވައިސް ޕްރިމިއާ މިދިޔަ އަންގާރަ ދުވަހު ވިދާޅުވީ، ޗައިނާއިން ބަލަމުން ދަނީ ވިން ވިން (ދެފަރާތަށް ވެސް ކާމިޔާބު) ހައްލެއް ކަމަށެވެ.
ޓްރަމްޕް ވިދާޅުވާ ގޮތުން އެ ފިޔަވަޅުތައް އަޅުއްވަނީ އެމެރިކާގެ އިގްތިސޯދު ކޮޅަށް ޖެހުމަށެވެ. ނަމަވެސް ވިޔަފާރި އެނަލިސްޓުން ބުނަނީ، އެ ފިޔަވަޅުތަކުގެ ސަބަބުން މުދަލުގެ އަގު އުފުލި އެމެރިކާގެ އާންމު ރައްޔިތުންނަށް ތަކުލީފަކަށް ވާނެ ކަމަށެވެ.
