ހދ. ނޮޅިވަރަމްފަރުގައި ފަތުރުވެރިއަކަށް ޖިންސީ ގޯނާ ކުރި ދިވެއްސަކު ކޯޓު އަމުރެއްގެ ދަށުން ހައްޔަރު ކޮށްފިއެވެ.
ފުލުހުން ބުނީ، ނޮޅިވަރަމްފަރުގައި ފަތުރުވެރިންނަށް ހާއްސަ ކޮށްފައިވާ ސަރަހައްދުގައި ފަތުރުވެރިއަކު އިންދާ އޭނާއަށް ޖިންސީ ގޯނާ ކޮށްފައިވާ މައްސަލައެއް އިއްޔެގެ މެންދުރު ފަހު 2:45 ހާއިރު ރިޕޯޓްކޮށްފައިވާ ކަމަށެވެ.
މި މައްސަލަ އާ ގުޅިގެން ކޯޓު އަމުރެއްގެ ދަށުން ފުލުހުންގެ ބެލުމުގެ ދަށަށް އެމީހާ ގެންގޮސްފައިވާ ކަމަށް ފުލުހުން ބުނެއެވެ. އަދި އެއީ އުމުރުން 30 އަހަރުގެ ދިވެހި ފިރިހެނެއް ކަމަށް ވެސް ފުލުހުން ބުނެއެވެ.
މި މައްސަލައިގައި ޖިންސީ ގޯނާގެ ޝިކާރައަކަށް ވެފައި ވަނީ ކޮން ގައުމެއްގެ ފަތުރުވެރިއެއް ކަން ފުލުހުން ހާމައެއް ނުކުރެއެވެ. މި މައްސަލަ ދަނީ އިތުރަށް ތަހުގީގު ކުރަމުން ކަމަށް ފުލުހުން ބުނެއެވެ.
