ބައެއް ވުޒާރާތަކުގެ މަސްއޫލިއްޔަތުތަކަށް ބަދަލު ގެނެސް އަލުން އައްޔަންކުރި ހަތަރު ވަޒީރުންނަށް ރައްޔިތުންގެ މަޖިލީހުން ރުހުންދީފިއެވެ.
މިދިޔަ އަހަރުގެ ފަހުކޮޅު ރައީސް ޑރ. މުހައްމަދު މުއިއްޒު ބައެއް ވުޒާރާތަކަށް ގެންނެވި ބަދަލުތަކަކީ:
- ހައުސިން މިނިސްޓްރީގެ ދަށުގައި އޮތް ޕްލޭނިން ފިނޭންސް މިނިސްޓްރީގެ ދަށަށް ބަދަލުކުރުން
- ކޮންސްޓްރަކްޝަން މިނިސްޓްރީ އާއި ހައުސިން މިނިސްޓްރީ އެއްކޮށްލުން
މީގެ އިތުރުން ހައުސިން މިނިސްޓަރުގެ މަގާމުގައި ހުންނެވި ޑރ. އަލީ ހައިދަރު އަހްމަދު ހަޔާ އެޑިއުކޭޝަން މިނިސްޓަރުގެ މަގާމަށް ބަދަލުކުރައްވައި، ހަޔާ އެޑިއުކޭޝަން މިނިސްޓަރު ޑރ. މަރިޔަމް މާރިޔާ އެގްރިކަލްޗާ މިނިސްޓަރުގެ މަގާމަށް ވެސް ބަދަލުކުރައްވާފައިވެއެވެ.
އެއާއެކު ހައިދަރާއި މާރިޔާގެ އިތުރުން، މިހާރުގެ ފިނޭންސް މިނިސްޓަރު މޫސާ ޒަމީރާއި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވަޒީރުކަމަށް އަލުން އައްޔަންކުރެއްވީއެވެ.
މިއަދު ދައުރުން ބޭއްވި ޖަލްސާގައި ވަނީ ކޮންމެ ވަޒީރަކަށް ރުހުން ދޭން ފެނޭތޯ ވަކިވަކިން ވޯޓަށް އަހައިފައެވެ. ހަތަރު ވަޒީރުންނަށް ރުހުންދޭން ފެނޭތޯ ވޯޓަށް އެހުމުން، ހައިދަރު ފިޔަވައި ދެން ތިއްބެވި ތިން ވަޒީރުންނަށް ވޯޓުގައި ބައިވެރިވި މެންބަރުންގެ އިއްތިފާގުން ވަނީ ރުހުންލިބިފައެވެ. ހައިދަރު އައްޔަންކުރަން ނުފެންނަ ކަމަށް އެމްޑީޕީގެ ހަ މެންބަރަކު ވޯޓު ދެއްވިއެވެ.
މިއީ ވަޒީރުންގެ މަޖިލީހަށް ރައީސް ގެންނެވި ދެވަނަ ބަދަލެވެ.
ވަޒީރުންގެ މަޖިލީހަށް ރައީސް ގެންނެވި ފުރަތަމަ ބަދަލަކީ ކުރީގެ ފޮރިން މިނިސްޓަރުގެ މަގާމު ފުރުއްވި ޒަމީރު ފިނޭންސް މިނިސްޓަރު ކަމަށް ބަދަލުކުރައްވައި، ހެލްތު މިނިސްޓަރުގެ މަގާމު ފުރުއްވި ޑރ. އަބްދުﷲ ޚަލީލް ފޮރިން މިނިސްޓަރު ކަމަށް ބަދަލުކުރައްވައި، ހެލްތު މިނިސްޓަރު ކަމަށް ކުރީގެ ރައީސް އަބްދުﷲ ޔާމީންގެ ސަރުކާރުގައި ވެސް ހެލްތު މިނިސްޓަރުގެ މަގާމު ފުރުއްވި އަބްދުﷲ ނާޒިމް އިބްރާހީމް އައްޔަންކުރެއްވުމެވެ.
