ދުނިޔެއިން އަލަށް ރެކޯޑުކުރެވުނު މަހެއް އަނެއްކާވެސް ރާއްޖެއިން ފެނިއްޖެއެވެ.
މެރައިން ޖާނަލް މޯލްޑިވްސް އިން ބުނީ ދުނިޔެއިން އަލަށް ރެކޯޑުކުރެވުނު މި މަސް ރާއްޖެއިން ފެނިފައިވަނީ ކަނޑުގެ އަޑިން އަލި ފަނޑުވާ ހިސާބުން 100 މީޓަރާއި 125 މީޓަރާ ދެމެދުގެ ފުންމިނަކުން ކަމަށެވެ.
މިމަހަށް ދީފައިވާ ނަމަކީ "ރަކި ބުރެކި" އެވެ. މި މަހަށް ރަކި ބުރެކީގެ ނަމުން ނަން ދެވުނީ މި މަހަކީ ޑައިވަރުންނަށް ފެންނަ އިރަށް ވަރަށް އަވަހަށް ފިލާ މަހެއް ކަމަށް ދިރާސާކުރި ފަރާތްކަކުން ހާމަކުރުމާ ގުޅިގެންކަމަށާއި، މި މަސް އެފަދައިން އަމަލު ކުރަނީ ރަކި ކަމާ ގުޅިގެން ކަމަށް މެރައިން ޖާނަލް މޯލްޑިވްސް އިން ވަނީ ބުނެފައެވެ.
މި މަސް ގިނަ ސަރަހައްދު ތަކަކުން ރެކޯޑުކުރެވިފައިވާކަމަށާއި އެގޮތުން އަރި އަތޮޅު އުތުރު ބުރިން ފެށިގެން ނިލަންދެ އަތޮޅު ދެކުނުބުރީގެ ސަރަހައްދުތަކުން ރެކޯޑުކުރެވިފައިވާ ކަމަށް މެރައިން ޖާނަލް މޯލްޑިވްސް އިން ވަނީ ބުނެފައެވެ.
ފާހަގަކޮށްލެވޭ ރާއްޖޭގެ ކަނޑުން މިދިޔަ އަހަރުގެ ޑިސެމްބަރު 7 ވަނަ ދުވަހުވެސް ވަނީ މުޅިން އަލަށް ދުނިޔެއިން ރެކޯޑުކުރެވުނު މަހެއް ފެނިފައެވެ. "ކްރޯމިސް އަބަދަށް" ސައިންޓިފިކް ނަމަކަށް ދެވުނު މި މަސް ޖުމުލަ 8 ސަރަހައްދަކުން ފެނިފައިވާ ކަމަށާއި، އެއީ ފާދިއްޕޮޅުން ފެށިގެން ނިލަންދެ އަތޮޅު ދެކުނުބުރީގެ ސަރަހައްދުން ކަމަށް މެރައިން ޖާނަލް މޯލްޑިވްސް އިން ވަނީ ބުނެފައެވެ.
6.9 ސެންޓިމީޓަރަށް ބޮޑުވާ ކުޑަކުޑަ މި މަހުގެ އާއިލާގެ އެހެން އެތައް ބާވަތެއް ދިވެހި ކަނޑުފަޅުތަކުން ފެނެއެވެ.
