ބޭރު ފައިސާގެ ގަވައިދުގެ ދަށުން ފުރަތަމަ ފަހަރަށް 40 މިލިއަން ޑޮލަރު ބޭންކުތަކަށް މާރުކުރާނެ ކަމަށް ބެލެވޭކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފިއެވެ.
އެމްއެމްއޭ އިން ބުނީ ފުރަތަމަ ފަހަރަށް 30 މިލިއަން ޑޮލަރާއި 40 މިލިއަން ޑޮލަރާ ދެމެދުގެ އަދަދެއް ބޭންކުތަކަށް މާރުކުރާނެ ކަމަށް ބެލެވޭ ކަމަށާއި، ބޭރު ފައިސާއާ ބެހޭ ގަވާއިދުގެ ދަށުން ޑޮލަރު މާރު ކުރަން ޖެހޭ އެންމެ ފަހު ތާރީހަކީ މި މަހުގެ 28 ކަމަށެވެ.
އެމްއެމްއޭ އިން ވަނީ މިދިޔަ އަހަރުގެ އޮކްޓޫބަރު މަހު 138 ރިސޯޓަކުން ސޭލްސް ރިޕޯޓު އެމްއެމްއޭ އަށް ހުށަހަޅާފައިވާ ކަމަށް ވެސް ބުނެފައެވެ.
ވަކި އަދަދެއްގެ ޑޮލަރު ބޭންކަށް މާރު ކުރަންޖެހޭ ގޮތަށް އެމްއެމްއޭއިން އެކުލަވާލާ ބިލާއެކު ބޭންކިން ނިޒާމުގައި ދައުރުވާ ޑޮލަރު ކުރިން އަންދާޒާކުރި ވަރަށްވުރެ އިތުރުވާނެ ކަމަށް ރައީސް ޑރ. މުހައްމަދު މުއިއްޒު ވަނީ ވިދާޅުވެފައެވެ. ރައީސް ވިދާޅުވީ ޓޫރިޒަމް ނޫން އެހެން ދާއިރާތަކުން ވެސް ވަކި ވަރަކަށްވުރެ ގިނައިން ޑޮލަރު އާމްދަނީ ލިބޭނަމަ، ޑޮލަރު މާރުކުރަންޖެހޭ ގޮތަށް ބޭރު ފައިސާއާ ބެހޭ ބިލުގައި ހިމަނާފައިވައިވުމުން ބޭންކިން ނިޒާމުގައި ދައުރުވާ ޑޮލަރު ކުރިން އަންދާޒާކުރި ވަރަށްވުރެ އިތުރުވެގެންދާނެ ކަމަށެވެ.
ބޭރު ފައިސާއާ ބެހޭ ގާނޫނަށް އަމަލު ކުރަން ފަށާފައިވަނީ މި އަހަރުގެ 1 ވަނަ ދުވަހުއެވެ. މި ބިލު މަޖިލީހުގެ މާލިއްޔަތު ކޮމިޓީން ފާސްކޮށްފައިވަނީ ޑިސެމްބަރު 11 ވަނަ ދުވަހުއެވެ. މި ބިލު ކޮމިޓީ އިން ފާސްކުރި އިރު ބިލުގައި ހިމަނާފައިވާ ބޮލަކަށް 500 ޑޮލަރު މާރުކުރަން ބޭނުން ނޫން ނަމަ ރިސޯޓުގެ ކޮންމެ މަހެއްގެ ޖުމްލަ އާމްދަނީގެ 20 ޕަސެންޓު މާރުކުރެވޭނެ ގޮތަށް ވަނީ ބަދަލެއް ގެނެސްފައެވެ. އެގޮތުން ގެނައި ބަދަލަކީ ރިސޯޓުތަކުގެ މާލީ ދަތިކަން ހުރި ނަމަ އެ އަދަދު 20 ޕަސެންޓަށް ވުރެ ދަށްކޮށް ދައްކަން އެދުމުގެ އިހުތިޔާރު ދިނުމެވެ.
ނަމަވެސް މި ލުއި ދެވޭނީ މާލީ ދަތިކަން ކުރިމަތިވެފައިވާކަން އެ ރިސޯޓަކުންް އެމްއެމްއޭއަށް ސާބިތުކޮށްދިނުމުން ކަމަށް ވަނީ ކަނޑައަޅާފައެވެ. މީގެއިތުރުން ޓޫރިޒަމް ދާއިރާގެ ވިޔަފާރިތައް ނޫން ނަމަވެސް އަހަރެއްގެ ތެރޭގައި 15 މިލިއަން ޑޮލަރަށް ވުރެ މަތިން ބޭރު ފައިސާއިން އާމްދަނީ ލިބޭ ފަރާތްތަކުން އެ އާމްދަނީގެ 20 ޕަސެންޓު މާރުކުރަން މަޖުބޫރުކުރަންވެސް ވަނީ ހިމަނާފައެވެ.
