ދިވެހިރާއްޖޭގައި އުޅެމުންދާ ބިދޭސީންގެ މައުލޫމާތު އެއްކުރުމަށް ފަށާފައިވާ "އޮޕަރޭޝަން ކުރަނގި"ގެ ބޮޑު ހަރަކާތެއް މިއަދު ފަށައިފިއެވެ.
ގްރޭޓާ މާލޭ ސަރަހައްދުގައި ކުރިއަށް ގެންދާ މި އޮޕަރޭޝަން މިއަދު ހަވީރު 6:00އާ ހަމައަށް ކުރިއަށްދާނެ ކަމަށް ހޯމް މިނިސްޓްރީއިން ބުނެއެވެ.
ހޯމް މިނިސްޓްރީގެ 75 އޮފިޝަލުން މި ހަރަކާތުގައި ބައިވެރިވާނެ ކަމަށް ހޯމް މިނިސްޓްރީއިން ވަނީ ބުނެފައެވެ. މި ހަރަކާތުގައި މިނިސްޓްރީގެ އޮފިޝަލުން މާލޭގެ އިތުރުން، ތިލަފުއްޓާއި ގުޅީފަޅުގައި ހަރަކާތްތެރިވުމަށް ވެސް ވަނީ ހަމަޖެހިފައެވެ.
ހޯމް މިނިސްޓްރީއިން ބުނީ މި ހަރަކާތުގައި އެޑިޔުކޭޝަން ސެކްޓާއަށް ނިސްބަތްވާ މައިގްރެންޓް ވޯކާސްގެ އިތުރުން ބޮޑެތި ބައެއް ކުންފުނިތަކުގެ ބިދޭސީ މަސައްކަތްތެރިންގެ މައުލޫމާތު އެއްކުރުމަށް ހަމަޖެހިފައިވާ ކަމަށެވެ.
އޮޕަރޭޝަން ކުރަނގީގެ ދަށުން މިހާތަނަށް 18،900އަށް ވުރެ ގިނަ ބިދޭސީންގެ ބަޔޯމެޓްރިކް ޑޭޓާ އެއްކޮށްފައިވާ ކަމަށް ހޯމް މިނިސްޓްރީއިން ވަނީ ބުނެފައެވެ. އަދި ރާއްޖޭގެ 194 ރަށެއްގައި މި މަސައްކަތް ފަށައިފައިވާ ކަމަށާއި 50 ރަށެއްގައި މި މަސައްކަތް ނިންމާފައިވާ ކަމަށް ވެސް މިނިސްޓްރީއިން ބުނެއެވެ.
