އެކި މީސްމީހުންނަށް އޮޅުވާލައިގެން ވެރިކަން ކުރާ ޕީއެންސީއަށް މީހުން ވައްދަން އަނެއްކާވެސް ތައްޔާރުވަމުންދާ ކަމަށް އެމްޑީޕީގެ ޑެޕިއުޓީ ޗެއާޕާސަން އިބްރާހީމް ވަހީދު (މަދަނަ އިބުރޭ) ވިދާޅުވުމުން ދާހިލީ ސަލާމަތާއި ފަންނިޔަތާ ބެހޭ ވަޒީރު އަލީ އިހުސާން ރައްދު ދެއްވައިފިއެވެ.
އިބުރޭ އެކްސްގައި ހިއްސާ ކުރެއްވި ޕޯސްޓެއްގައި ވިދާޅުވީ، ޑިޕާޓްމަންޓު އޮފް ނޭޝަނަލް ރެޖިސްޓްރޭޝަން (ޑީއެންއާރު) މެދުވެރިކޮށް މިއަހަރު 18 އަހަރުފުރޭ ކުދިންގެ މައުލޫމާތު ހޯދާ، މިނިސްޓަރު އިހުސާންގެ ބެއްލެވުމުގެ ދަށުން އެ ކުދިންގެ ފޯމުތައް ފުރާ 18 އަހަރުވުމުން އިލެކްޝަން ކޮމިޝަނަށް ހުށަހެޅަން ތައްޔާރުކޮށް ޕީއެންސީ އޮފީހުގައި ހުރި ކަމުގެ މައުލޫމާތު އޭނާއަށް ލިބިފައިވާ ކަމަށެވެ.
ނަމަވެސް އެކަމާ ގުޅޭ އިތުރު މައުލޫމާތެއް އިބުރޭ ހިއްސާކޮށްފައި ނުވެއެވެ. އެ ވާހަކަތަކަށް ރައްދު ދެއްވަވާ އެކްސްގައި ހިއްސާ ކުރެއްވި ޕޯސްޓެއްގައި ވަޒީރު އިހުސާން ވަނީ އެމްޑީޕީ ސަރުކާރުން އެގޮތަށް އެކަން ކުރެއްވުމަށް ވިސްނާފައިވޭތޯ ސުވާލު އުފައްދަވާފައެވެ. "މަނިކުފާނުގެ ސަރުކާރުގަ މިކަން ކުރައްވަން މަނިކުފާނު ވިސްނެވީތޯ؟" އިހުސާން ކުރެއްވި ސުވާލުގައި ވެއެވެ.
އިބުރޭގެ އެ ވާހަކަތައް ދޮގުކޮށް އިހުސާން ވިދާޅުވީ އެފަދަ ކަމެއް ކުރުމަށް މިހާތަނަށް ހިޔާލަށްވެސް ނުގެންނަވާ ކަމަށެވެ. އަދި ތިފަދައިން ދައްކާ ކޮންމެ ދޮގު ވާހަކަތަކަކަށް ޖަވާބުދޭނެ ވަގުތު ނުވަތަ ފުރުސަތު ކޮންމެ މީހަކަށް ނުލިބިދާނެކަން ފާހަގަ ކުރައްވާ އިހުސާން ވިދާޅުވީ، ދޮގު އިލްޒާމް ނާޅުވާ އެމްޑީޕީ ސިޔާސަތުތަކުގެ ވާހަކަ ދެއްކުން ރަނގަޅުވާނެ ކަމަށެވެ.
ވަގު ފޯމު ފުރައިގެން އެމްޑީޕީގެ ދަފްތަރުގައި ތިބި މެންބަރުން އެހެން ޕާޓީތަކަށް ވައްދާ މައްސަލައިގައި އިދިކޮޅުން ދަނީ ހިންހަމަނުޖެހުން ފާޅުކޮށް އެކަމާ ދެކޮޅަށް އަޑު އުފުލަމުންނެވެ. މައްސަލައާ ގުޅިގެން ހުރި ކަންބޮޑުވުންތައް އިދިކޮޅު އެމްޑީޕީން ވަނީ މިދިޔަ ހަފުތާގައި އިލެކްޝަންސް ކޮމިޝަނާ ވެސް ހިއްސާކޮށްފައިވެއެވެ.
މި މައްސަލައާ ގުޅިގެން ޕީއެންސީން މިހާތަނަށް ވަކި އެއްޗެއް ބުނެފައި ނުވާއިރު އެކި އެކި އާންމުން ވެސް ދަނީ މިކަމާ ގުޅިގެން ކަންބޮޑުވުން ފާޅު ކުރަމުންނެވެ.
