ދިވެހިރާއްޖޭގައި އާޓިފިޝަލް އިންޓެލިޖެންސް ނުވަތަ އޭއައި ތަރައްގީކުރަން އެސްޓޯނިއާ އާއެކު އެމްއޯޔޫއެއްގައި ސޮއިކޮށްފިއެވެ.
ފޮރިން މިނިސްޓްރީ އިން ބުނީ މި އެމްއޯޔޫގެ ދަށުން އިންފޮމޭޝަން ޓެކްނޮލޮޖީ، އާޓިފިޝަލް އިންޓެލިޖެންސް، ސްމާޓް ޓެކްނޮލޮޖީސް އަދި ސައިބާ ސެކިއުރިޓީގެ ދާއިރާއިން އެއްބާރުލުން ދިނުމަށް ދެގައުމުގެ ދެމެދުގައި އެއްބަސްވެވިފައިވާކަމަށެވެ.
މި އެމްއޯޔޫގައި ރާއްޖޭގެ ފަރާތުން ސޮއި ކުރައްވާފައިވަނީ ހޯމްލޭންޑް ސެކިއުރިޓީ މިނިސްޓަރު އަލީ އިހުސާން އެވެ. އަދި އެސްޓޯނިއާގެ ފަރާތުން ސޮއިކުރައްވާފައިވަނީ އެ ގައުމުގެ ޖަސްޓިސް އެންޑް ޑިޖިޓަލް އެފެއާސް މިނިސްޓަރު ލިސާ ލީ ޕޮކޮސްޓާ އެވެ.
އެސްޓޯނިއާއަށް މިހާރު ކުރައްވަމުން ގެންދަވާ ދަތުރުފުޅުގައި އެ ގައުމުގެ ރައީސް ޑރ. އަލާރް ކަރިސްއާއި ބައްދަލުކުރައްވާ ރައީސް ޑރ. މުހައްމަދު މުއިއްޒު ވަނީ ޑިޖިޓަލް ޓްރާންސްފޯމޭޝަނާއި އިނޮވޭޝަންގެ ދާއިރާއިން އެސްޓޯނިއާއިން ހޯދާފައިވަނީ ނަމޫނާ ކާމިޔާބީތަކެއް ކަމަށް ވިދާޅުވެފައެވެ.
އަދި މި ދާއިރާއިން އެހާ ބޮޑެތި ކާމިޔާބީތަކެއް ހާސިލްކުރީ އެ ގައުމުގެ ރައީސް ޑރ. އަލާރް ކަރިސްގެ ދުރުވިސްނުންފުޅާއި އިސްނެންގެވުމާއެކުގައި ކަމަށާއި މިއީ ނަމޫނާ ކާމިޔާބީއެއްކަން ރައީސް ވަނީ ފާހަގަކުރައްވާފައެވެ.
މީގެ އިތުރުން ރައީސް ވަނީ އެސްޓޯނިއާއަކީ ޓެކްނޮލޮޖީގެ ކުރިއެރުންތަކުގެ ޒަރިއްޔާއިން މުޖުތަމައުތައް ބާރުވެރިކުރުމުގެ ލާމަސީލު މިސާލެއްކަން ފާހަގަކުރައްވާ އެ ގައުމުގެ ތަޖުރިބާއިން އިބުރަތް ލިބިގަތުމަށް ޝައުގުވެރިވެވަޑައިގަންނަވާ ކަމުގައި ވިދާޅުވެފައެވެ.
