މ. ގްރީން ބިލްޑިންގު ގައި ރޯވެ ހިނގި އަލިފާނުގެ ބޮޑު ހާދިސާގައި ސަރުކާރުގެ ތިން މިނިސްޓްރީއެއް އެއްކޮށް އަނދާ އަޅިއަށް ވީއިރު، ގެއްލުންވި އެ މިނިސްޓްރީގެ ސާވާތައް ރިކަވާކުރެވޭތޯ ބަލަން ސިންގަޕޫރަށް ފޮނުވަން ނިންމާފައިވާ ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެއެވެ.
މިނިސްޓަރު މުއްތަލިބު މިފަދައިން ވިދާޅުވެފައިވަނީ ގެދޮރުވެރިޔާ ސްކީމާ ގުޅޭ މައުލޫމާތު ހިއްސާ ކުރުމަށް މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ. އެގޮތުން މުއްތަލިބު ވިދާޅުވީ ސާވާތައް ރިކަވާކުރެވޭތޯ ބަލަން ސިންގަޕޫރަށް ފޮނުވަން ނިންމާފައިވާކަމަށާއި ނަމަވެސް ސާވާތަކަށް ހުރީ ވަރަށް ބޮޑަށް އަލިފާނުގެ އަސަރު ކޮށްފައިކަމަށެވެ.
މުއްތަލިބު ވިދާޅުވީ އަލިފާނުގެ ހާދިސާ ހިނގީ، ހުޅުމާލޭގައި ހުންނަ އުމަރު ޒާހިރު އޮފީސް އިމާރާތުގައި ބެކްއަޕް ސާވާ ނިޒާމުތަކެއް ބެހެއްޓުމުގެ މަސައްކަތް ކުރަމުން ދަނިކޮށް ކަމަށާއި އެހެންކަމުން ބޯހިޔާވަހިކަމުގެ ޕޯޓަލްތައް ހުރީ މައިކްރޯސޮފްޓު އަޒުއާގައި ގާއިމްކުރެވިފައި ކަމަށެވެ. ހުރިހާ ޑޮކިއުމެންޓުތަކެއް ވަނީ ސަބްސްކްރިޕްޝަން ދައްކައިގެން ރައްކާކުރެވިފައިކަމަށްވެސް މުއްތަލިބު ވަނީ ވިދާޅުވެފައެވެ.
އަލިފާނުގެ ހާދިސާއާ ގުޅިގެން ގިނަ ބަޔަކު ބޯހިޔާވަހިކަމާ ގުޅޭ މަޝްރޫއުތައް ލަސްވާނެ ކަމުގެ ކަންބޮޑުވުމާއި، އަދި އެ މަޝްރޫއުތައް ކުރިއަށް ނުގެންދާނެ ކަމަށް ބުނެ ސަރުކާރަށް ފާޑުކިޔާފައިވާއިރު މިކަމާ ގުޅިގެން މީގެ ކުރިން މުއްތަލިބު ވަނީ އަލިފާނުގެ ހާދިސާގައި ހައުސިން މަޝްރޫއުތަކާ ގުޅުންހުރި އެއްވެސް މައުލޫމާތެއް ނުގެއްލޭ ކަމަށް ވިދާޅުވެފައެވެ.
ނަމަވެސް އޭރު ހައުސިން މިނިސްޓަރަކަށް ހުންނެވި ހައިދަރު ވަނީ ސާވާތައް ސަލާމަތްނުކުރެވޭބެ ކަމަށް އަންދާޒާ ކުރެވޭ ކަމަށާއި، ސާވާތައް ސަލާމަތް ނުކުރެވިއްޖެނަމަ އަތުގައި ހުރި ހުރިހާ މައުލޫމާތެއް ގެއްލިގެން ދިޔައީ ކަމަށް ވިދާޅުވެފައެވެ. ހުރިހާ މުވައްޒަފުންގެ މައުލޫމާތާއި ކުރަމުންގެންދިޔަ ހުރިހާ މަޝްރޫއުއެއްގެ މައުލޫމާތެއް ވެސް ރައްކާކުރެވިފައި ހުންނާނީ ސާވާގައި ކަމަށް ހަޔާ އެޑިއުކޭޝަން މިނިސްޓަރަކަށް މިހާރު ހުންނެވި ހައިދަރު އޭރު ވަނީ ވިދާޅުވެފައެވެ.
މިދިޔަ ޑިސެމްބަރު މަހުގެ 12 ވަނަ ދުވަހުގެ ހެނދުނު 6:30 ހާއިރު ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ އާއި އެންވަޔަރަމަންޓް މިނިސްޓްރީ އާއި މާލެ ސިޓީ ކައުންސިލްގެ ރަޖިސްޓްރޭޝަނާ ބެހޭ ބައި ހުންނަ ގްރީން ބިލްޑިން ކޮމްޕްލެކްސްގައި ރޯވެ، އެ ތަން ވަނީ ބޭނުންނުކުރެވޭ ވަރަށް އެއްކޮށް އަނދައި ހުލިވެފައެވެ.
އަލިފާންގަނޑު އެއްކޮށް ނިވާލެވުނީ ހާދިސާ ހިނގިތާ ހަތަރު ގަޑިއިރު ވީ ފަހުންނެވެ.
