އުމްރާއަށް މީހުން ގެންދިއުމުގެ އުސޫލާ ހިލާފުވި 19 ކުންފުންޏެއް ޖޫރިމަނާކޮށްފިއެވެ.
އުސޫލާ ހިލާފުވެފައިވާތީ އެ ކަންކަމުގެ ކުޑަބޮޑު މިނަށް ބަލައި، އެ 19 ކުންފުނި ޖޫރިމަނާކޮށްފައި ވަނީ 5 ހާސް ރުފިޔާއިން ކަމަށް އިސްލާމިކް މިނިސްޓްރީއިން ބުނެއެވެ.
އިސްލާމިކް މިނިސްޓްރީއިން ބުނީ އުމްރާއަށް މީހުން ގެންދިއުމަށް މިނިސްޓްރީއިން ދީފައިވާ ރަސްމީ ލައިސަން ދައްކައިގެން އުމްރާއަށް ފުރަން ކަމަށް ހަދައި އެމްއެމްއޭ އިން ޑޮލަރު ނަގައި، އުމްރާއަށް ނުދިޔަ ކުންފުންޏެއް ވެސް ފާހަގަ ކުރެވިފައިވާ ކަމަށެވެ.
އެހެންކަމުން އެކަން އިތުރަށް ބަލައި މިނިސްޓްރީއަށް އެކަން ސާބިތު ވެއްޖެ ނަމަ އެ ކުންފުނި 30 ހާސް ރުފިޔާއިން ޖޫރިމަނާކުރުމާއެކު ހުއްދަ ހިފަހައްޓައި މައްސަލަ ތަހުގީގުކުރަން ޕޮލިހަށް ހުށަހަޅާނެ ކަމަށް މިނިސްޓްރީއިން ވަނީ ބުނެފައެވެ. ޑޮލަރު ދޫކުރާނީ ފުރުމުގެ ޓިކެޓާއި ޑޮކިއުމެންޓްސް ހުށަހެޅުމުންކަން ފާހަގަކޮށް އިސްލާމިކް މިނިސްޓްރީއިން ބުނީ އެ ކުންފުނިން ފޭކު ޑޮކިއުމެންޓް ހުށަހެޅިކަމަށް ތުހުމަތު ކުރެވޭ ކަމަށެވެ.
އިސްލާމިކް މިިނިސްޓްރީއިން އިތުރަށް ބުނީ އުމްރާއަށް މީހުން ގެންދިއުމުގައި އަމަލުކުރާން ގެޒެޓް ކޮށްފައިވާ އުސޫލަށް އަމަލު ނުކުރާ ހުރިހާ ކުންފުނިތަކަށް ފިޔަވަޅު އަޅާނެ ކަމަށެވެ.
ދިވެހިރާއްޖެއިން އުމްރާއަށް މީހުން ގެންދިޔުމާބެހޭ އުސޫލާ ހިލާފުވެފައިވާތީ އަލްހިޖްރަ ޓްރެވަލް އެންޑް ޓްއާސް ޕްރައިވެޓް ލިމިޓެޑްގެ ހުއްދަ ހިފަހައްޓައި، އެ ކުންފުނި ވެސް ވަނީ 1 ލައްކަ ރުފިޔާއިން ޖޫރިމަނާކޮށްފައެވެ.
