މި ހަފްތާ އެއްކޮށް ވިއްސާރަ ވާނެ ކަމަށް ލަފާކޮށް މޫސުމާ ބެހޭ ގައުމީ އިދާރާއިން ނެރުނު ބަޔާނާ ގުޅިގެން ފެނަކައިގެ އެމެޖެންސީ ރެސްޕޮންސިވް ޓީމުތައް ރަށްރަށުގައި ހަރަކާތްތެރި ވަމުންދާނެ ކަމަށް އެ ކުންފުނިން ބުނެފިއެވެ.
އެ ކުންފުނިން ނެރުނު ބަޔާނެއްގައި ބުނީ، ވިއްސާރަވާނެ ކަމަށް ލަފާކޮށްފައިވުމުން ދިމާވެދާނެ ކަންކަމަށް ދުރާލާ ތައްޔާރުވުމަށް ފެނަކައިގެ ބްރާންޗުތަކުގައި އެކުލަވާލާފައިވާ ކުއްލި ހާލަތްތަކަށް އިޖާބަދޭ ޓީމްތައް ރަށްރަށުގައި ހަރަކާތްތެރިވާ މުއައްސަސާތަކާ ގުޅިގެން ހަރަކާތްތެރިވަމަށް ތައްޔާރީ ހާލަތުގައި ތިބި ކަމަށެވެ.
އަދި އެ ކުންފުނިން ހިދުމަތް ދެމުންދާ 151 ރަށުގައި މިފަދަ ކުއްލި ހާލަތަށް އިޖާބަދޭ ޓީމުތައް އެކުލަވާލާފައިވާކަން ހާމަކޮށް ފެނަކައިން ބުނީ، އެ ޓީމްތަކުގައި ޖުމްލަ 2311 މެންބަރުން ހަރަކާތްތެރިވަމުންދާނެ ކަމަށެވެ.
އަދި މިފަދަ ކޮންމެ ހާލަތެއްގައި ވެސް ރައްޔިތުންނާއެކު ދެމިތިބޭނެ ކަމުގެ ޔަގީންކަން އަރުވަމުން އެ ކުންފުނިން ބުނީ ރައްޔިތުންގެ ސަލާމަތާއި ރައްކާތެރިކަމަށް އިސްކަންދީ ކުއްލި ހާލަތުގައި އެހީތެރިކަން ފޯރުކޮށްދިނުމަކީ ފެނަކައިން އިސްކަންދޭނެ ކަމެއް ކަމަށެވެ.
ކުރިއަށް އޮތް ދުވަސްތަކަކީ ވިއްސާރަ ދުވަސްތަކެއް ކަމުން ދުރާލާ ތައްޔާރުވުމަށް މޫސުމާ ބެހޭ ގައުމީ އިދާރާއިން ވެސް ވަނީ ލަފާ ދީފައެވެ. މެޓްއިން ބުނީ ރާއްޖޭގެ އިރުން ހުޅަނގުދެކުނު ބޭ އޮފް ބެންގާލްގައި ކޮޅިގަނޑެއް އުފެދި، އެ ކޮޅިގަނޑު ހުޅަނގަށް ޖެހި ރާއްޖޭގެ ސަރަހައްދުގައި ބޯ ވިއްސާރަ ވިލާ އުފެދުމުގެ ފުރުސަތު ބޮޑުވާނެ ކަމަށް ލަފާ ކުރެވޭ ކަމަށެވެ.
އެހެންކަމުން މިއަދުން ފެށިގެން އަންނަ ހޮނިހިރު ދުވަހުގެ ނިޔަލަށް ރާއްޖޭގެ ބޮޑު ސަރަހައްދަކަށް ގުގުރުމާއެކު ބޯކޮށް ވާރޭ ވެހޭނެ ކަމަށް އެ އިދާރާއިން ވަނީ ލަފާކޮށްފައެވެ. އަދި އާންމުވައި ގަދަވެ، ކަނޑުތައް ގަދަވާނެ ކަމަށާއި، އުތުރާއި މެދުރާއްޖެތެރޭގެ ރަށްތަކަށް އުދައިގެ އަސަރު ކުރުމުގެ ފުރުސަތު އޮތް ކަމަށްވެސް އެ އިދާރާއިން ބުނެފައިވެއެވެ.
