ހައްޖު މިނިސްޓަރު ޑރ. ތައުފީގު ރަބީއާގެ ދައުވަތަކަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ސައުދީ އަރަބިއްޔާއަށް ވަޑައިގެންފިއެވެ.
އިސްލާމިކް މިނިސްޓްރީ އިން ބުނީ މިނިސްޓަރު ޝަހީމްގެ މި ދަތުރަކީ ހައްޖު މިނިސްޓަރު ޑރ. ތައުފީގު ދައުވަތަކަށް ކުރައްވާ ދަތުރެއްކަމަށާއި މި ދަތުރުގައި ރާއްޖެއާއި ސައުދީ އަރަބިއްޔާއާ ދެމެދު ކޮންމެ އަހަރަކުވެސް ގާއިމު ކުރާ ހައްޖު އެގްރީމެންޓްގައި ސޮއިކުރުމުގެ މަސައްކަތް ކުރިއަށް ދާނެ ކަމަށެވެ.
މީގެއިތުރުން ހައްޖު މިނިސްޓަރާއި ޑރ. ޝަހީމް ބައްދަލުކުރައްވާނެ ކަމަށާއި، 1446 ވަނަ އަހަރު ހައްޖު މިނިސްޓްރީ އިން ބާއްވާ ހައްޖު މައުރަޒުގައިވެސް ޝަހީމް ބައިވެރިވެ ވަޑައިގަންނަވާނެ ކަމަށް އިސްލާމިކް މިނިސްޓްރީ އިން ވަނީ ބުނެފައެވެ.
މިނިސްޓަރު ޝަހީމް ވަނީ މިދިޔަ އަހަރުގެ އޮގަސްޓު މަހުވެސް ސައުދީ އަރަބިއްޔާއަށް ވަޑައިގެންފައެވެ. އިސްލާމީ ކޮންފަރެންސްގައި ބައިވެރިވެ ވަޑައިގަތުމަށް ޝަހީމް ކުރެއްވި އެ ދަތުރުގައި ބައެއް ސެޝަންތަކުގެ ޗެއާކަންވެސް މިނިސްޓަރު ވަނީ ކުރައްވާފައެވެ. އެ ކޮންފެރެންސްގައި ވަނީ އިސްލާމީ އުންމަތުގެ މުހިއްމު މައުޟޫއުތަކަށް އިލްމީ ކަރުދާސްތައް ހުށަހަޅުއްވާފައެވެ.
