މާލެ ސިޓީ ކައުންސިލުން މާފަންނު ސަހަރާ ކޮނެފައިވަނީ ޒިންމާދާރުކަން ކުޑަކޮށްކަމަށާއި މި މަސައްކަތް ކުރި އިރު ފެންހިންދަން ބޭނުންކުރާ ޕަންޕުގެ ބައެއް ވަނީ ނަގާފައިކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވިދާޅުވުމާ ގުޅިގެން އެކަމަށް މާލެ ސިޓީގެ މޭޔަރު އާދަމް އާޒިމް ރައްދު ދެއްވައިފިއެވެ.
އާޒިމް ވިދާޅުވީ މާފަންނު ސަހަރާ ކޮނުމުގެ މަސައްކަތް ކުރިއިރު އެތަނުގައި ހުރި ޕަންޕުތަކަކީ ހަލާކުވެ މަސައްކަތް ނުކުރާ ޕަންޕުތަކެއް ކަމަށާއި، އެ ޕަންޕް ސްޓޭޝަނުގައި ހަރުކުރެވިފައިވާ ކަރަންޓު ތަކެތިވެސް ވަނީ ހަލާކުވެފައިކަމަށެވެ. މީގެއިތުރުން މި ޕަންޕު ސްޓޭޝަން ފާއިތުވި 5 މަސްދުވަހު ވަނީ ބޭނުން ނުކޮށް ހުއްޓިފައިކަމަށްވެސް އާޒިމް ވަނީ ވިދާޅުވެފައެވެ.
މިއާއެކު އާޒިމް ވަނީ 25 ޑިސެމްބަރު 2024 ގައި އާޒިމް ސޮއި ކުރައްވާ ކޮންސްޓްރަކްޝަން މިނިސްޓްރީ އަށް ފޮނުއްވި ސިޓީއެއްވެސް ހިއްސާ ކުރައްވާފައެވެ. އާޒިމް ވިދާޅުވީ މާފަންނު ސަހަރާގައި ހުރި ސްޓޯމް ވޯޓާ ޕަންޕުތައް ކުރިން މެއިންޓެއިން ކުރަމުން އައި އެމްޑަބްލިއުއެސްސީ އާއެކު ނަމަވެސް އެ އެގްރީމެންޓުގެ މުއްދަތު ހަމަވުމާއެކު ޕަންޕުތަކުގެ މެއިންޓެނެންސް ބަލަހައްޓާނެ ފަރާތެއް ނެތް ކަމަށް ސިޓީގައި ފާހަގަކުރައްވާފައިވާކަމަށެވެ.
މީގެއިތުރުން އާޒިމް ވަނީ މި އަހަރުގެ ޖެނުއަރީ 8 ވަނަ ދުވަހުވެސް ކޮންސްޓްރަކްޝަން މިނިސްޓްރީ އަށް ފޮނުއްވި ސިޓީއެއްވެސް ހިއްސާ ކުރައްވާފައެވެ. އެގޮތުން އެ ސިޓީގައި ވަނީ ސްޓޯމް ވޯޓާ ޕަންޕުތައް މެއިންޓެއިން ކުރުމުގެ މަސައްކަތް އެ މިނިސްޓްރީ އިން ކުރާނެ ކަމަށް ވިދާޅުވުމާ ގުޅިގެން އެ މަސައްކަތް ކުރެވޭ ގޮތުގެ ރިޕޯޓެއް ހުށަހެޅުމަށް އެދިފައެވެ.
އާޒިމް ވިދާޅުވީ ފެން ހިންދުމުގެ މައްސަލަތައް ހައްލުކުރުމަށް ސިޓީ ކައުންސިލުން ވާނީ މާފަންނު ސަހަރާ ސާފުކުރުމަށްފަހު އެ ޖާގައިގެ ބައެއް މި ބޭނުމަށް ބޭނުންކުރުމަށް ނިންމާފައިވާކަމަށެވެ.
މީގެ އިތުރުން ޕަންޕު ސްޓޭޝަންތައް މަރާމާތުކުރުމަށް ބޭނުންވާ ފިޔަވަޅުތައް އެޅުމަށް އެދި މިނިސްޓްރީއާ އެކު ކުރިންވެސް މުއާމަލާތުކުރެވިފައިވާކަން ފާހަގަކުރައްވަމުން އާޒިމް ވިދާޅުވީ މިފަދަ މައްސަލަތައް ހައްލުކުރުމަށް އެއްބާރުލުން ދެއްވާނެ ކަމަށާއި ރައްޔިތުންނަށް އެކަށީގެންވާ ހިދުމަތް ފޯރުކޮށްދިނުމުގައި ދެމި ހުންނަވާނެ ކަމަށެވެ.
