އަލްހިޖްރަ ޓްރެވަލް އެންޑް ޓްއާސް ޕްރައިވެޓް ލިމިޓެޑްގެ ހަވާލުގައި އުމްރާގެ އަޅުކަން އަދާކުރުމަށް ގޮސް ރާއްޖެ ނާދެވި މައްކާގައި ތާށިވެފައި ތިބި ދިވެހި އުމްރާވެރިން ހޮނިހިރު ދުވަހު މާލެ ގެނެވޭނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ޝަހީމް ވިދާޅުވީ ހިޖުރަ ކުންފުނީގެ ހަވާލުގައި ދިޔަ އުމްރާވެރިން މިހާރު އިސްލާމިކް މިނިސްޓްރީގެ އިރުޝާދުގެ ދަށުން ހައްޖު ކޯޕަރޭޝަންގެ އުމްރާވެރިން ތިބި ހޮޓަލަށް ބަދަލުކޮށްފައިވާ ކަމަށެވެ.
އެ އުމްރާވެރިން އަންނަ ހޮނިހިރު ދުވަހު ހެނދުނު 8:10 ގައި ގަތަރު އެއާވޭސްގެ ފްލައިޓަކުން މާލެ ގެނެވޭނެ ކަމަށް ވެސް ޝަހީމް ވަނީ ވިދާޅުވެފައެވެ.
އަލްހިޖްރަ ގްރޫޕުގެ ފަރާތުން މިދިޔަ ޑިސެމްބަރު މަހު އުމްރާ ދަތުރުގައި ދިއުމަށް ހަމަޖެހިފައިވާ އުމްރާވެރިން ދަތުރަށް ފައިސާ ދައްކާފައިވީނަމަވެސް އެ ފައިސާއިން އުމްރާވެރިންގެ ދެކޮޅު ޓިކެޓު ހަމަޖައްސާފައި ނުވާ ކަމަށާއި އެ ފައިސާ ކުންފުނީގެ އެހެން ކަންކަމަށް ބޭނުންކޮށްފައިވާކަމަށް އެ ކުންފުނިން ވަނީ އިއުތިރާފުވެފައެވެ.
އަލްހިޖްރަ ގްރޫޕުގެ ފަރާތުން އުމްރާއަށް ތިޔަ 23 އުމްރާވެރިން ރާއްޖެ ނާދެވި މައްކާގައި ތާށިވެފައި ތިބިއިރު، އޭގެތެރޭގައި 12 އަހަރުގެ 3 ކުޑަކުދިން ވެސް ހިމެނެއެވެ.
ދިވެހިރާއްޖެއިން އުމްރާއަށް މީހުން ގެންދިޔުމާބެހޭ އުސޫލާ ހިލާފުވެފައިވާތީ އިސްލާމިކް މިނިސްޓްރީއިން ވަނީ އެ ގްރޫޕުގެ ހުއްދަ ހިފަހައްޓާފައެވެ. އަދި 1 ލައްކަ ރުފިޔާއިން ޖޫރިމަނާކޮށް، އަލްހިޖްރަ ގްރޫޕް އަދި އެ ކުންފުނީގެ އެއްވެސް ހިއްސާދާރެއް ހިމެނޭ އެހެން ކުންފުންޏަކަށް ވެސް އުމްރާއަށް މީހުން ގެންދިޔުމުގެ ހުއްދަނުދިނުމަށް ވެސް އިސްލާމިކް މިނިސްޓްރީއިން ވަނީ ނިންމާފައެވެ.
މީގެއިތުރުން އަލްހިޖްރަ ގްރޫޕްގެ ފަރާތުން އުމްރާއަށް ގެންގޮސް ހާލުގައި ޖެހުނު މީހުން ރާއްޖެ ގެނައުމަށް އިސްލާމިކް މިނިސްޓްރީއިން ކުރި ހަރަދު އެ ކުންފިން ހޯދުމަށާއި މި މައްސަލަ ތަހުގީގުކޮށް ގާނޫނީ ފިޔަވަޅު އެޅުމަށް މޯލްޑިވްސް ޕޮލިސް ސާވިސްއަށް ހުށަހެޅުމަށް ވެސް އިސްލާމިކް މިނިސްޓްރީއިން ނިންމާފައިވެއެވެ.
