އަލްހިޖްރަ ޓްރެވަލް އެންޑް ޓްއާސް ޕްރައިވެޓް ލިމިޓެޑްއިން ދިވެހިރާއްޖެއިން އުމްރާއަށް މީހުން ގެންދިޔުމާބެހޭ އުސޫލާ ހިލާފުވެފައިވާތީ އެ ގްރޫޕުގެ ހުއްދަ ހިފަހައްޓައި، 1 ލައްކަ ރުފިޔާއިން ޖޫރިމަނާކޮށްފިއެވެ.
އަލްހިޖްރަ ގްރޫޕުގެ ފަރާތުން މިދިޔަ ޑިސެމްބަރު މަހު އުމްރާ ދަތުރުގައި ދިއުމަށް ހަމަޖެހިފައިވާ އުމްރާވެރިން ދަތުރަށް ފައިސާ ދައްކާފައިވީނަމަވެސް އެ ފައިސާއިން އުމްރާވެރިންގެ ދެކޮޅު ޓިކެޓު ހަމަޖައްސާފައި ނުވާ ކަމަށާއި އެ ފައިސާ ކުންފުނީގެ އެހެން ކަންކަމަށް ބޭނުންކޮށްފައިވާކަމަށް އެ ކުންފުނިން ވަނީ އިއުތިރާފުވެފައެވެ.
މައްކާއިން ރާއްޖެ އައުމަށް ޓިކެޓު ނަގާފައި ނެތުމުގެ ސަބަބުން ރާއްޖެ ނާދެވިގެން އެ އުމްރާވެރިން އިސްލާމިކް މިނިސްޓްރީ އެހީތެރިކަމަށް އެދިފައިވާކަން ފާހަގަކޮށް އިސްލާމިކް މިނިސްޓްރީއިން ބުނީ ހާލުގައި ޖެހިފައި ތިބި 23 އުމްރާވެރިން މޯލްޑިވްސް ހައްޖު ކޯޕަރޭޝަން ލިމިޓެޑުގެ ބެލުމުގެ ދަށަށް މިއަދު ގެނެވިފައިވާ ކަމަށެވެ.
އަލްހިޖްރަ ޓްރެވަލް އެންޑް ޓްއާސް ޕްރައިވެޓް ލިމިޓެޑްއާމެދު އެޅުމަށް ހަމަޖެހިފައިވާ ފިޔަވަޅުތައް:
- ދިވެހިރާއްޖެއިން އުމްރާއަށް މީހުން ގެންދިއުމަށް މިނިސްޓްރީއިން ދޫކޮށްފައިވާ ހުއްދަ ހިފެހެއްޓުން
- އެއްލައްކަ ރުފިޔާއިން ޖޫރިމަނާކުރުން
- އަލްހިޖްރަ ގްރޫޕް އަދި އެ ކުންފުނީގެ އެއްވެސް ހިއްސާދާރެއް ހިމެނޭ އެހެން ކުންފުންޏަކަށް ވެސް އުމްރާއަށް މީހުން ގެންދިޔުމުގެ ހުއްދަނުދިނުން
- އަލްހިޖްރަ ގްރޫޕްގެ ފަރާތުން އުމްރާއަށް ގެންގޮސް ހާލުގައި ޖެހުނު މީހުން ރާއްޖެ ގެނައުމަށް އިސްލާމިކް މިނިސްޓްރީއިން ކުރި ހަރަދު އެ ކުންފިން ހޯދުން
- މި މައްސަލަ ތަހުގީގުކޮށް ގާނޫނީ ފިޔަވަޅު އެޅުމަށް މޯލްޑިވްސް ޕޮލިސް ސާވިސްއަށް ހުށައެޅުން
އަލް ހިޖްރަ ގްރޫޕާމެދު ފިޔަވަޅު އެޅުމަށްޓަކައި އިސްލާމިކް މިނިސްޓްރީއިން އިދާރީ ގޮތުންނާއި ގާނޫނީ ގޮތުން ކުރަން ޖެހޭ އެންމެހައި ކަންކަން ފަސްޖެހުމެއް ނެތި ކުރާނެކަމުގެ ޔަގީންކަން އެ މިނިސްޓްރީއިން ވަނީ ދީފައެވެ.
