އަންހެނުންގެ ތަރައްގީ އަށް މަސައްކަތްކުރާ ކޮމިޓީތަކުގެ މެންބަރުންނަށް ދޭ އިނާޔަތަށް މުސާރައިގެ ހައިސިއްޔަތު ދީ ރޯދަ އިނާޔަތް ލިބުމުގައި ހުރި ހުރަސްތައް ނައްތާލުމަށްޓަކައި ރައްޔިތުންގެ މަޖިލީހުގެ މި ފެށޭ ދައުރުގައި ސަރުކާރުން އިސްލާހެއް ހުށަހަޅުއްވާނެ ކަމަށް، ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ގދ. ވާދޫގެ ރައްޔިތުންނާ ބައްދަލުކުރައްވައި ރައީސް ވިދާޅުވީ، އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ މެންބަރުންގެ އިނާޔަތަށް މުސާރައިގެ ހައިސިއްޔަތު ދީ ރޯދަ އިނާޔަތް ލިބުމުގައި ހުރި ހުރަސްތައް ނައްތާލަން ސަރުކާރުން ވީ ވައުދު ފުއްދުމަށްޓަކައި މަޖިލީހުގެ މި ފެށޭ ދައުރުގެ ފުރަތަމަ ހަފްތާގައި ވަޒީފާ އާ ބެހޭ ގާނޫނާއި ލާމަރުކަޒީ ގާނޫނު އިސްލާހުކުރުމަށް މަޖިލީހަށް ހުށަހަޅުއްވާނެ ކަމަށެވެ.
"މިހާރު އެ ލިބޭ އެލަވަންސަށް މުސާރައިގެ ސްޓޭޓަސް ދެނީ، އެލަވަންސް ބޮޑުކުރާ ވާހަކައެއް ނޫން، އެލަވަންސެއް ގޮތުގަ އޮވެގެންނެއް ރޯދަ މަހުގެ އިނާޔަތެއް ނުދޭ މިހާތަނަށް އައިއިރުގަ، ބޭންކަކުން ލޯނެއް ނުނެގޭ، ވިހެއުމުގެ ޗުއްޓީއެއް ނުލިބޭ، މިކަހަލަ އެއްވެސް ކަމެއް ނުވޭ،" އެމަނިކުފާނު ވިދާޅުވިއެވެ.
ރައީސް ވިދާޅުވީ ރައްޔިތުންގެ މަޖިލީހުގެ މި ފެށޭ ދައުރުގައި ގާނޫނުތައް އިސްލާހުކުރުމުން އަންނަ ރަމަޟާން މަހުން ފެށިގެން ކޮންމެ ރަމަޟާން މަހަކު އަންހެނުންގެ ކޮމިޓީތަކުގެ މެންބަރުންނަށް ރޯދަ އިނާޔަތް ލިބި، ކޮމިޓީތަކުގެ މެންބަރުންނަށް މިހާރު ލިބޭ އިނާޔަތަށް މުސާރައިގެ ހައިސިއްޔަތު ލިބޭނެ ކަމަށެވެ. އެހެން ނަމަވެސް އަންހެނުންގެ ކޮމިޓީތަކުގެ މެންބަރުން ފުލްޓައިމްކޮށް ވަޒީފާއަށް ނުކުންނަން ނުޖެހޭނެ ކަމަށާއި މިހާރު ވެސް މަސައްކަތްކުރާ އުސޫލުން މަސައްކަތްކުރުމުން އެ އިނާޔަތްތައް ލިބޭނެ ކަމުގެ ޔަގީންކަން ރައީސް ދެއްވިއެވެ.
ސަރުކާރުގެ ސިޔާސަތަކީ އިސް މަގާމުތަކުގައި އަންހެނުންނަށް ޖާގަ ދީ އަންހެނުން ކުރާ މަސައްކަތްތަކުގެ އަގުވަޒަން ކުރުން ކަމަށް ރައީސް ވިދާޅުވިއެވެ.
މިދިޔަ ސަރުކާރުތަކާ އަޅާ ބަލާއިރު މި ސަރުކާރުގައި ކުންފުނިތަކުގެ ވެރިންނާއި އެހެނިހެން އިސް މަގާމުތަކުގައި އަންހެނުން ގިނަ ކަމަށާއި، އެގޮތުން މީގެ ކުރިން އަންހެން ބޭފުޅުން ނުތިއްބަވާ މަގާމުތަކުގައި މި ސަރުކާރުގައި ތިއްބަވާ ކަމަށް އެމަނިކުފާނު ވިދާޅުވިއެވެ.
