ދުންފުހުގެ ސަބަބުން ވައި ނުސާފުވެ ހަމަ ލޮލަށް ފެންނަ ދުރުމިން އުތުރުގެ އަތޮޅުތަކުގައި ވަރަށް ބޮޑަށް ދަށަށް ގޮސްފައިވާ ކަމަށް މޯލްޑިވްސް މީޓިއޮރޮލޮޖިކަލް ސާވިސް (މެޓް އޮފީހުން) ބުނެފިއެވެ.
މެޓް އޮފީހުން ބުނީ ވައި ނުސާފުވެ ހަމަ ލޮލަށް ފެންނަ ދުރުމިން އުތުރުގެ އަތޮޅުތަކުގައި 3 ކިލޯމީޓަރަށް ދަށްވެފައިވާކަމަށާއި، މި ހާލަތު މެދުރާއްޖެ ތެރޭގެ އަތޮޅުތަކަށްވެސް ކުރިއަށް އޮތް ދުވަސްތަކުގައި ފެތުރިގެން ދާނެ ކަމަށް ބެލެވޭ ކަމަށެވެ.
މިއާއެކު މެޓް އޮފީހުން ހިއްސާ ކޮށްފައިވާ ފޮޓޯއެއްގައި ވަނީ ހދ. ކުޅުދުއްފުއްޓާއި ގާތްގަނޑަކަށް 7 ކިލޯމީޓަރު ދުރުގައި އޮތް ކޭލަކުނު މިއަދު ދުރުން ފެނުން ގޮތާއި، މިދިޔަ އަހަރުގެ ނޮވެމްބަރު މަހު އެތަން ފެނުން ގޮތް ދައްކާލާފައެވެ.
މެޓް އޮފީހުން އިތުރަށް ބުނީ ދުރު ފެންނަ ނިސްބަތް ބަދަލުވުމުގައި ވައިގެ މިސްރާބާއި ބާރުމިން އަދި ވިއްސާރަވުން މުހިންމު ދައުރެއް އަދާކުރާ ކަމަށެވެ.
ވައި ނުސާފުވުމުގެ ސަބަބުން ފުއްޕާމޭގެ ދާއިމީ ބަލިތައް ހުންނަ ފަރާތްތަކަށް މީހުންނަށް ނޭވާލުމުގައި އުނދަގޫތަކެއް ކުރިމަތިވެދާނެ ކަން ފާހަގަކޮށް އެފަދަ ފަރާތްތަކުން ސަމާލުވުމަށް ވެސް ވަނީ އިރުޝާދު ދީފައެވެ.
