ރާއްޖޭގެ ރިސޯޓެއްގައި އަމިއްލައަށް މަރުވި އިންޑިއާ މީހެއްގެ މައްސަލަ، އޭނާގެ އާއިލާއިން އިންޑިއާގެ ހަރްޔާނާގެ ފުލުހުންނަށް ހުށަހަޅައިފިއެވެ.
އާއިލާއާ ހަވާލާދީ އިންޑިއާގެ ނޫހަކުން ބުނެފައި ވަނީ ހަރްޔާނާ ސްޓޭޓުގެ ޖަގްދަރީއަށް ނިސްބަތްވާ ރަވިންދަރު ސަހާނީ (32އ) މީގެ ދެ އަހަރު ކުރިން ރާއްޖެ އައީ ވަޒީފާއެއް ހޯދުމަށް ކަމަށެވެ. އަދި ރާއްޖޭގެ ރިސޯޓެއްގައި މަސައްކަތް ކުރި ރަވިންދަރު، މިދިޔަ ޑިސެމްބަރު މަހުގެ 10 ވަނަ ދުވަހު އާއިލާ ގާތަށް ޒިޔާރަތް ކުރުމަށްފަހު އެނބުރި ރާއްޖެ އައީ މިދިޔަ ޑިސެމްބަރު މަހުގެ 24 ވަނަ ދުވަހު ކަމަށް އޭނާގެ ބައްޕައާ ހަވާލާދީ ބުނެފައި ވެއެވެ.
ރަވިންދަރު މަރުވި ކަމުގެ ހަބަރު އާއިލާއަށް ލިބުނީ ޑިސެމްބަރު 31 ވަނަ ދުވަހުއެވެ. ރަވިންދުރަ އަމިއްލައަށް ފާހާނާތެރޭގައި މަރުވެފައިވާކަން އެ އާއިލާއަށް އަންގާފައި ވަނީ އޭނާއާ އެކު އެއް ކޮޓަރިއެއްގައި އުޅޭ މީހެއްކަމަށް އާއިލާއިން ވަނީ ބުނެފައެވެ.
ރަވިންދުރަގެ ބައްޕަ ބުނީ ދަރިފުޅުގެ މަރުގެ ހަބަރު ލިބުމުން އާއިލާގެ ތިން މީހަކު ރާއްޖެއަށް އައިސް ހަށިގަނޑު އިންޑިއާއަށް ގެންދިއުމަށް މަސައްކަތްކުރި ނަމަވެސް، ރާއްޖޭގެ ސަރުކާރުން ހަށިގަނޑު އާއިލާ އާ ހަވާލުކޮށްފައި ނުވާކަމަށެވެ. މީގެ އިތުރުން އޭނާގެ އާއިލާއިން ވަނީ އޭނާ އަމިއްލައަށް މަރުނުވާނެ ކަމަށާއި އެތަނުގައި ހުރި މީހަކު އޭނާ މަރާލީކަމަށް ކަމަށް ބުނެފައެވެ. އަދި މި މައްސަލައިގައި ޑީސީ ކެޕްޓަން މަނޯޖް ކުމާރާ ބައްދަލުކޮށް ހަށިގަނޑު ހޯދުމަށް އެހީތެރިވުމަށް ދިވެހި ސަރުކާރާއެކު މަސައްކަތް ކޮށްދިނުމަށް އެދިފައިވާނެ ކަމަށްވެސް ރަވިންދަރުގެ ބައްޕަ ވަނީ ބުނެފައެވެ.
"ދަ ޕްރެސް" އަށް މައުލޫމާތު ދެމުން ފުލުހުން ބުނީ ރަވިންދުރަގެ މަރާ ގުޅިގެން ބަލަންޖެހޭ ކަންތައްތައް ބަލަމުން އަންނަކަމަށެވެ. އަދި މިމައްސަލަ އިތުރަށް ތަހުގީގު ކުރަމުން އަންނައިރު، އާއިލާއާ ހަށިގަނޑު ހަވާލުކުރުމުގެ މަސައްކަތްވެސް ކުރިއަށްދާ ކަމަށް ފުލުހުން ވަނީ ހާމަކޮށްފައެވެ.
