އަންނަ އަހަރު ފެށުމަށް ހަމަޖެހިފައިވާ ނަމާދު މަތިވެރިކުރުމުގެ ޕްރޮގްރާމްގެ ދަށުން އާއިލާއިން ބޭނުންވާނަމަ ޝެއިހުން ގެއަށް ޒިޔާރަތް ކޮށްގެން ވެސް ނަސޭހަތް ދިނުން ކުރިއަށް ގެންދާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެެވެ.
ޝަހީމް މިފަދައިން ވިދާޅުވީ އިސްލާމީ މިނިސްޓްރީގެ 2025 އަހަރުގެ އެކްޝަން ޕްލޭން، އެކްޓިވިޓީ ކަލަންޑަރު، ރިސާލަތު ޕްރޮގްރާމް 2025، އަދި ނަމާދު މަތިވެރިކުރުމުގެ ޕްރޮގްރާމް ލޯންޗުކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
ޝަހީމް ވިދާޅުވީ ނަމާދުގެ މަޝްރޫއަކީ ހަމައެކަނި ފިގުހީ ވާހަކަތަކެއް ކިޔައިދިނުމެއް ކުރިއަށް ގެންދާ ޕްރޮގްރާމެއް ނޫން ކަމަށާއި މި ޕްރޮގްރާމް ގާއިމްކޮށްފައި ވަނީ ތަފާތު ގޮތަކަށް ކަމަށެވެ.
އެގޮތުން ނަމާދު ކުރަން ހަނދާންކޮށްދިނުމާއި ނަމާދުގައި ހިމެނޭ ދުއާތަކުގެ މާނަތައް މީހުންނަށް ދަސްކޮށްދިނުމާއި ނަމާދާ ބެހޭ ގޮތުން ވާރިދުވެފައިވާ ހަދީޘްފުޅުތައް ކިޔައިދިނުމާއި ދަރުސްތަކާއި ރޯޑިއޯ ޕްރޮގްރާމްތަކުގެ އިތުރުން ނަމާދަށް ލޯބި ޖެއްސުމުގެ މަސައްކަތް މި ޕްރޮގްރާމްގެ ތެރެއިން ކުރިއަށް ގެންދާނެ ކަމަށް ޝަހީމް ވިދާޅުވިއެވެ.
މި ޕްރޮގްރާމްގެ ދަށުން "އާއިލާތަކަށް ވިޒިޓްކުރަން ޝެއިހުން ނުވަތަ އިލްމުވެރިން ވެސް ފޮނުވާނަން، ހަމައެކަނި ބަލިވީމަ ޑޮކްޓަރުންނެއް ނޫން ދެއްތޯ ގެއަށް ޒިޔާރަތް ކުރަންޖެހޭނީ، ގޭގެ އަހުލުވެރިންނަށް ފެމެލީއަށް ނަސޭހަތްތެރިވުމަށް އިލްމުވެރިއަކު ވެސް ހަމަ ގެންނަންޖެހޭނެ، އެހެންވީމާ އަޅުގަނޑުމެންގެ އިލްމުވެރިން ޒިޔާރަތް ކުރާނެ އާއިލާއަކުން ބޭނުންވެއްޖެ ހިނދެއްގަ ނަސޭހަތް ދިނުމަށް" ޝަހީމް ވިދާޅުވިއެވެ.
ޝަހީމް ވިދާޅުވީ ނަމާދު މަތިވެރިކުރުމުގެ ޕްރޮގްރާމްގެ އަމާޒަކީ މުޅި މުޖުތަމައަށް ނަމާދުކުރަން ހަނދާންކޮށްދިނުން ކަމަށެވެ.
