3054 ފަތުރުވެރިންނާއެކު ދެ ކްރޫޒް ޝިޕް މާލެއަށް ބަނދަރު ކޮށްފައިވާ ކަމަށް މޯލްޑިވްސް އެސޯސިއޭޝަން ފޯ ޔޮޓް އޭޖެންޓްސް (މާޔާ) އިން ބުނެފިއެވެ.
މާލޭގައި ބަނދަރުކޮށްފައިވާ 2 ކްރޫޒްގެ ތެރެއިން، ފުރަތަމަ ކްރޫޒް ޝިޕް އެމްއެސް ނޯވީޖިއަން ސްކައި ރާއްޖެ އައީ މިދިޔަ އާދިއްތަ ދުވަހުގެ ހެނދުނެވެ. މި ކްރޫޒްގައި ރާއްޖެއަށް 1872 ފަތުރުވެރިން އައިސްފައިވާ އިރު، ދެވަނައަށް އައި ކްރޫޒް ޝިޕް، އެމްއެސް ރިވިއޭރާ މާލެއަށް ބަނދަރުކޮށްފައި ވަނީ ހޯމަ ދުވަހުގެ ހެނދުނެވެ. އެ ކްރޫޒްގައި ޖުމްލަ 1182 ފަތުރުވެރިން ރާއްޖެ އައިސްފައި ވެއެވެ. މިއާއެކު ދެ ކްރޫޒް ޝިޕްއިން މުޅި އެކު 3054 ފަތުރުވެރިން ރާއްޖެ ވަނީ އައިސްފައެވެ.
މި ދެ ކްރޫޒް ޝިޕް ރާއްޖޭގައި 2 ދުވަސް ހޭދަ ކުރާނެ ކަމަށް މާޔާ އިން ބުނާ އިރު، މި ދެ ކްރޫޒް ވެސް ރާއްޖެ އައީ ސީޝެލްސްއިންނެވެ. ރާއްޖެއަށްފަހު އެމްއެސް ނޯވިޖިއަން ދެން ދަތުރުކުރާނީ ތައިލޭންޑަށެވެ. އެމްއެސް ރިވިއޭރާ ދެން ދަތުރު ކުރާނީ ލަންކާއެވެ.
މާޔާއިންއިން ވިދާޅުވީ، ފަތުރުވެރިކަމުގެ ހައި ސީޒަން ފެށުނު ފަހުން މިހާރު ރާއްޖެއަށް 3 ކްރޫޒް ޝިޕް އައިސްފައިވާ ކަމަށެވެ. އަދި ޖެނުއަރީ މަހު އިތުރު އެއް ކްރޫޒް ޝިޕް އައުމަށް ހަމަޖެހިފައިވާ ކަމަށާއި ހައި ސީޒަން ނިމުމުގެ ކުރިން އިތުރު 12 ކްރޫޒް ޝިޕް ރާއްޖެ އައުމަށް ތާވަލްކޮށްފައިވާ ކަމަށެވެ.
