ރައީސުލްޖުމްހޫރިއްޔާއަށް ވަޒީރުންގެ މަޖިލީހަށް ގެންނެވި ބަދަލާއެކު އެ ވުޒާރާތަަކަށް ދިވެހިބަހުން ކިޔާނޭ ނަންތައް ރައީސް ޑރ. މުހައްމަދު މުއިއްޒު ހަމަޖައްސަވައިފިއެވެ.
މިގޮތުން މިއަދު ރައީސް އޮފީހުން ވަނީ ވުޒާރާތަކަށް ކިޔާނެ ނަންތައް އާންމުކޮށްފައެވެ. އެގޮތުން މިނިސްޓްރީ އޮފް ފިނޭންސް އެންޑް ޕްލޭނިން އަށް، ދިވެހިބަހުން ކިޔާނޭ ނަމެއްގެ ގޮތުގައި ހަމަޖައްސާފައިވަނީ، މާލީކަންކަމާއި ތަރައްގީގެ ރޭވުންތެރިކަމާ ބެހޭ ވުޒާރާއެވެ. އަދި މިނިސްޓްރީ އޮފް ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗަ އަށް ދިވެހިބަހުން ކިޔާނޭ ނަމެއްގެ ގޮތުގައި ހަމަޖައްސަވާފައިވަނީ، އިމާރާތްކުރުމާއި، ގެދޮރުވެރިކަމާއި ބިނާރާ ބެހޭ ވުޒާރާއެވެ.
މި މަހުގެ 26 ވަނަ ދުވަހު ރައީސް ވަނީ ވަޒީރުންގެ މަޖިލީހަށް ބަދަލުތަކެއް ގެންނަވައި، ބައެއް ވުޒާރާތުގެ ނަން ބަދަލުކުރައްވާފައިވެއެވެ. އެގޮތުން މިނިސްޓްރީ އޮފް ހައުސިން، ލޭންޑް އެންޑް އާބަން ޑިވެލޮޕްމަންޓް އުވާލައްވައި އެ މިނިސްޓްރީގެ މަސައްކަތްތައް މިނިސްޓްރީ އޮފް ފިނޭންސް އަށާއި މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗާއަށް ވަނީ ބަދަލުކުރައްވާފައެވެ. އަދި އެ ދެ ވުޒާރާގެ ނަން ވަނި ބަދަލުކުރައްވާފައެވެ.
އިދާރީ އޮނިގަނޑަށް ގެނައި ބަދަލުތަކާއެކު، ސަރުކާރުގެ ވުޒާރާތަކަށް ދިވެހިބަހުން ކިޔާނެ ނަންތަކެއް އެންމެ ފުރަތަމަ ހަމަޖައްސާފައިވަނީ މި ސަރުކާރުން ވެރިކަމާއި ހަވާލުވެ 2023 ވަނަ އަހަރުގެ ނޮވެމްބަރު މަސްތެރޭގައެވެ.
މިއީ ފަހުގެ ތާރީހުގައި ސަރުކާރުގެ މިނިސްޓްރީތަކަށް ދިވެހި ނަންތަކެއް ހަމަޖެއްސި ފުރަތަމަ ފަހަރުކަން ފާހަގަކޮށްލެވެއެވެ.
