ގާތްގަނޑަކަށް 5.5 މިލިއަން ރުފިޔާގެ މަސްތުވާތަކެއްޗާ އެކު ދެ ދިވެހި ފިރިހެނުން ހިފަހައްޓައިފިއެވެ.
ކަސްޓަމުން ބުނީ، އުމުރުން 21 އަހަރުގެ ދިވެއްސަކާއި 41 އަހަރުގެ ދިވެއްސެއް މިދިޔަ ބުރާސްފަތި ދުވަހު 2.4 ކިލޯގެ މަސްތުވާތަކެއްޗާ އެކު ހިފަހައްޓާފައި ވަނީ އެ ތަކެތި ތައިލޭންޑު މަގުން އެތެރެކުރަން އުޅެނިކޮށް ކަމަށެވެ.
އެ ދެ މީހުންގެ އަމަލުތައް ހުރިގޮތުން އެ މީހުންނާ މެދު ޝައްކުކުރެވިގެން އިތުރަށް ބެލިބެލުމުން ދެ މީހުންގެ ހަށިގަނޑުގައި މަސްތުވާތަކެތި ރައްކާކޮށްފައި ހުއްޓާ ފެނުނު ކަމަށް ކަސްޓަމުން ބުންޏެވެ.
ދެ މީހުންގެ ހަށިގަނޑުގައި ރައްކާކޮށްފައި ހުރި މަސްތުވާތަކެތި ފުރަތަމަ މަރުހަލާގައި ތަހުލީލުކުރިއިރު، މަސްތުވާތަކެތީގެ ދެ ބާވަތެއް ކަމަށްވާ މެފެޑްރޯނަށާއި ހެރޮއިނަށް އެ ތަކެތި ޕޮޒިޓިވް ކަމަށާއި، އެ ތަކެތީގެ ބަރުދަނުގައި ޕެކިން އާ އެކު ޖުމްލަ 2.4 ކިލޯ ހުރި ކަމަށް ކަސްޓަމުން ބުންޏެވެ. ކަސްޓަމުން މައުލޫމާތުދިން ގޮތުގައި އެ ތަކެތީގެ މަގުމަތީ އަގު 5.5 މިލިއަން ރުފިޔާ އަށް އަރައެވެ.
މި މައްސަލަ އިތުރަށް ތަހްގީގުކުރުމަށްޓަކައި މަސްތުވާތަކެއްޗާ އެކު ދެ ދިވެހިން ފުލުހުންނާ ހަވާލުކޮށްފައިވާ ކަމަށް ވެސް ކަސްޓަމުން ބުންޏެވެ.
ކަސްޓަމުން މިފަދައިން ބުނީ، މި މަހުގެ 13 ވަނަ ދުވަހު ކެނަބިހާ އެކު އިންޑިއާ މީހަކު ވެލާނާ އެއާޕޯޓުން ހިފަހައްޓާފައި ވަނިކޮށެވެ.
