ބޮންޑެޑް ވެއާހައުސްއެއްގައި ބަހައްޓާފައި ހުރި ގިނަ އަދަދެއްގެ ސިނގިރޭޓުތަކެއް ގެއްލުނު މައްސަލައެއް ފުލުހުން ބަލަން ފަށައިފިއެވެ.
މިޑީއާއަކުން ވަނީ ރިޕޯޓްކޮށްފައިވާ ގޮތުގައި ބޮންޑެޑް ވެއާހައުސް އެއްގައި ހުރި 34،500 ކާޓޫނުގެ ސިނގިރޭޓް ވަނީ ގެެއްލިފައެވެ.
މިކަމާ ގުޅިގެން އެކްސްގައި ކުރެއްވި ޕޯސްޓެއްގައި ހޯމް މިނިސްޓަރު އަލީ އިހްސާން ވިދާޅުވީ މިކަން ހިނގާފައި ވަނީ މާލޭގެ ގެއެއްގައި ހަދާފައި ހުރި ވެއާ ހައުސްއެއްގައި ކަމަށެވެ.
އިހްސާން ވިދާޅުވީ މި ތަނަކީ 2 ތަޅު ހަރުކޮށް އެއް ތަޅުގެ ތަޅުދަނޑި ކަސްޓަމްސްގެ ފަރާތުން ބަލަހައްޓަމުންދާ ތަނެއް ކަމަށެވެ. އެހެން ނަމަވެސް ވެރި ފަރާތުން ވެއާހައުސް ހިންގި ތަން ދޫކޮށް އެތަނުގައި އެހެން މަސައްކަތް ކުރަމުން އަންނަ މައުލޫމާތު ކަސްޓަމްސްއަށް ލިބުމުން އެކަން ޔަގީންކޮށްފައިވާ ކަމަށެވެ.
ވެއާހައުސްގައި ހުރި ކަމަށް ކަސްޓަމްސްގެ ރެކޯޑްތަކުން ދައްކާ މުދަލަށް ޑިއުޓީ ދެއްކުމަށް އަންގާފައިވާނެ ކަމަށް މިނިސްޓަރު އަލީ އިހްސާން ވިދާޅުވިއެވެ. އަދި މިކަން ހިނގި ގޮތް ބަލާ ގާނޫނީ ފިޔަވަޅު އެޅުމަށް ކަސްޓަމްސް އަދި ފުލުހުން ތަހުގީގު ކުރަމުންދާ ކަމަށް އިހްސާން ވަނީ ވިދާޅުވެފައެވެ.
އިހްސާން ވިދާޅުވީ މި ގޮތަށް ގޭގެތަކުގައި ބޮންޑެޑް ވެއާހައުސް ހިންގުމަކީ ސަލާމަތީގޮތުން އަދި ކޮންޓްރޯލް ކުރުމަށް އެންމެ ރަނގަޅު ގޮތް ކަމަށް ނުފެންނާތީ ބޮންޑެޑް ވެއާ ހައުސް ހިންގޭނީ ހަމައެކަނި "ކަސްޓަމްސްގެ ފުލް ކޮންްޓްރޯލް" އޮންނަ ސަރަހައްދުތަކުގައި އެކަނި ކަމަށް އަދުގެ ސަރުކާރުން ކަނޑައަޅައި އެ ސިޔާސަތު ތަންފީޒު ކުރަން ފަށާފައިވާ ކަމަށެވެ.
މީގެ ކުރިން "ބޮންޑެޑް ވެއާހައުސް"ތައް މާލޭގެ އެކި ގެތަކުގައި އަދި އެޕާޓްމެންޓްތަކުގައި އައީ ހިންގާފައިވެއެވެ.
