ޑޮމެއިންގެ ހިދުމަތަށް އަލަށް ތައާރަފްކުރި ޑޮމެއިން ރަޖިސްޓްރީ ސެޓްފިކެޓާ އެކު، ޑޮމެއިން ނަންބަރުތަކުގެ މައްސަލަ ހައްލުކުރެވިއްޖެ ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެއެވެ.
އަމީން މީގެ ކުރިން ވިދާޅުވީ، ޒަމާނަށް ފެތޭގޮތަށް ސަލާމަތީ ކަންކަން ވަރުގަދަކޮށް ސަރުކާރުން ޑޮމެއިން ދޫކުރަން އަލުން ފަށާނެ ކަމަށެވެ.
'އެކްސް'ގައި ފޮޓޯ ހިއްސާކުރައްވައި މިނިސްޓަރު ލިޔުއްވި ގޮތުގައި:
- ސަލާމަތީ ކަންކަން ވަރުގަދަކޮށް ޑޮމެއިން ސެޓްފިކެޓު މިއަދު ވަނީ ދޫކުރަން ފަށައިފަ
- މިއީ ދެފުށްފެންނަ ގޮތަށް މިކަން ކޮށް އާންމުންގެ އިތުބާރު ހޯދުމަށް ކުރިއަށް އެޅުނު ފިޔަވަޅެއް
ޓްރާންސްޕޯޓް މިނިސްޓްރީން ބުނީ، ޑޮމެއިން ސެޓްފިކެޓް ތައްޔާރުކުރެވިފައި ވަނީ ޑޮމެއިން ރަޖިސްޓްރޭޝަންގެ ސައްހަކަން ކަށަވަރުކުރެވޭ ގޮތަށް ސަލާމަތީ ފީޗާތައް ހިމެނޭ ގޮތަށް ކަމަށެވެ.
މިނިސްޓްރީގެ ރެކޯޑުތަކުން ދައްކާ ގޮތުގައި 700 އަށް ވުރެ ގިނަ ވަގު ޑޮމެއިން ވިއްކާފައިވެއެވެ. މިދިޔަ އޮކްޓޯބަރު މަހުގެ ފަހުކޮޅު ނެރުނު ނޫސްބަޔާނެއްގައި މިނިސްޓްރީން ބުނީ، ޑޮމެއިން ނަންބަރުތައް ވިއްކުމުގެ ހިދުމަތް އަލުން ފެށުމަށްޓަކައި ކުރިމަތިވެފައިވާ އެންމެ ބޮޑު ދައްޗަކީ ވޭތުވެދިޔަ ތަނުގައި ޑޮމެއިންގެ ރެކޯޑުތައް ހަރުދަނާ ގޮތެއްގައި ބެލެހެއްޓިފައި ނެތުމާއި ހިދުމަތް ފޯރުކޮށްދިނުމުގައި އަމަލުކުރާނެ އުސޫލުތައް އެކުލަވާނުލާ އޮތުން ކަމަށެވެ
އެހެންކަމުން ޑޮމެއިންގެ ހިދުމަތް ދޭން އަލުން ފަށާއިރު ރެކޯޑުތައް ބަލަހައްޓާނެ ހަރުދަނާ ނިޒާމެއް ގާއިމްކޮށް، އެކަށީގެންވާ ހަރުދަނާ ގަވައިދެއް އެކުލަވާލައި، އެ ގަވައިދާ އެއްގޮތަށް ކަންކަން ބަދަލުވެގެން ދާނެ ކަމަށް ޓްރާންސްޕޯޓް މިނިސްޓްރީން ބުންޏެވެ. މީގެ އިތުރުން ޑޮމެއިންގެ ހިދުމަތް ފޯރުކޮށްދިނުމުގައި ދޫކުރެވޭ ލިޔުންތަކަކީ ސަލާމަތީގޮތުން ވަރުގަދަ ފީޗާތައް އެކުލެވޭ ލިޔުންތަކަކަށް ބަދަލުވެގެން ދާނެ ކަމަށް ވެސް އެ މިނިސްޓްރީން ބުންޏެވެ.
