އާ އަހަރުގެ ފެށުން ފާހަގަކުރުމަށް ހަވާ އެރުވުމަށް ވާ ތައްޔާރީގެ ތެރެއިން މިރޭގެ ވަގުތެއްގައި ހުޅުމާލެ ފޭސް 3 ގައި ހަވާ އަރުވާނެ ކަމަށް އެމްއެންޑީއެފް އިން ބުނެފިއެވެ.
އެމްއެންޑީއެފް އިން ބުނީ، އާ އަހަރުގެ ފެށޭ ރޭ ހަވާ އެރުވުމަށް ތައްޔާރުވުމުގެ ގޮތުން ސިފްކޯއިން ކުރިއަށްގެންދާ ފަރިތަކުރުންތަކެއްގައި، މިރޭ 8 ޖަހާއިރު ހަވާ އަރުވާނެ ކަމަށެވެ. ހަވާ އަރުވާނީ ހުޅުމާލެ ފޭސް 3 ސަރަހައްދުގައި ކަމަށް އެމްއެންޑީއެފް އިން ބުނެއެވެ.
މި ފަރިތަކުރުންތަކުގައި 2 މިނެޓްގެ ތިން ޝޯވްއެއް ކުރިއަށް ގެންދާނެ ކަމަށް އެމްއެންޑީއެފް އިން ބުނެއެވެ.
ސިފްކޯއިން މީގެ ކުރިން ވެސް ވަނީ ވިޔަފާރި އުސޫލުން އަމިއްލަ ފަރާތްތަކަށް، ހަވާ އަރުވައިދީފައެވެ. އެގޮތުން ކައިވެނި ހަފްލާތަކާ ގުޅިގެން ވެސް މީގެ ކުރިން ވަނީ މާލެގައި ހަވާ އަރުވާފާވެއެވެ. އަދި އެކި ރަސްމިއްޔާތުތަކާއި އާ އަހަރު ފާހަގަ ކުރުމުގެ ގޮތުން ވެސް މީގެ ކުރިން ހަވާ އަރުވާފައިވާއިރު އީދުތަކާ ދިމާކޮށް ރަށް ރަށަށް ގޮސްވެސް ވިޔަފާރި އުސޫލުން ހަވާއަރުވަދެއެވެ.
