ކެންސަރު ބައްޔަށް ފަރުވާ ހޯދާ، އަތޮޅުތަކުގެ ރަށްތަކުގެ މީހުން "ކެންސަރު ދަފުތަރު"ގައި ރަޖިސްޓްރީ ކުރުމުގެ މަސައްކަތްތައް އަންނަ އަހަރު ފަށާނެކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.
މާލެ ސަރަޙައްދުގައި ކެންސަރު ޖެހިފައި ތިބި މީހުންގެ ތަފާސްހިސާބުތައް އެއްކުރުމުގެ މަސައްކަތް އެޗްޕީއޭއިން ކުރަމުން އަންނައިރު އެޗްޕީއޭއިން ބުނީ މާލެ ސަރަހައުދުން މިހާތަނަށް 1474 މީހަކު ކެންސަރު ދަފްތަރުގައި ރަޖިސްޓަރީކޮށްފައިވާ ކަމަށެވެ. އަދި އަހަރު ނިމުމުގެ ކުރިން މާލެ ސަރަޙައްދުގެ މަސައްކަތްތައް ނިންމާލެވޭނެކަމަށް އެޗްޕީއޭއިން ވަނީ ބުނެފައެވެ. އެޗްޕީއޭއިން ބުނީ މާލެ ސަރަހައްދުގައި އެންމެ ގިނައިން ފާހަގަވެފައިވަނީ އުރަމަތީގެ ކެންސަރާއި ފުއްޕާމެ އާއި ތައިރޮއިޑް އަދި ލޭގެ ކަންސަރު ކަމަށެވެ.
މީގެ އިތުރުން އެޗްޕީއޭއިން ބުނީ ރަށްރަށުގެ މައުލޫމާތުތައް އެއްކުރުމުގެ މަސައްކަތް އަންނަ އަހަރުގެ ތެރޭގައި ފަށާނެކަމަށެވެ. އެގޮތުން އެމަސައްކަތް ފުރަތަމަ ފެށުމަށް ހަމަޖެހިފައިވަނީ އަތޮޅުތެރޭގެ ބޮޑެތި ހޮސްޕިޓަލްތަކުން ކަމަށާއި އެއަށްފަހު މުޅި ރާއްޖޭގައި އެމަސައްކަތް ކުރިއަށް ގެންދާނެކަމަށް އެޗްޕީއޭއިން ވަނީ ބުނެފައެވެ.
ރާއްޖޭގައި ކެންސަރު ބަލިޖެހޭ އަދަދު އިތުރުވަމުން އަންނައިރު، ރާއްޖޭގައި ކެންސްރުގެ ހާލަތު ދެނެގަތުމަށް އެކަށީގެންވާ ސާވޭއެއް ހެދިފައި ނެތްކަން ފާހަގަކޮށްލެވެއެވެ.
