އުމްރާއަށް މީހުން ގެންދިޔުމުގެ އުސޫލާ ހިލާފުވާ ކުންފުނިތަކާ މެދު ފިޔަވަޅު އަޅަމުންގެންދާނެކަމަށް އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ސޯޝަލް މިޑިއާގައި ހިއްސާކުރެއްވި ޕޯސްޓެއްގައި މިނިސްޓަރު ވިދާޅުވީ އިސްލާމިކް މިިނިސްޓަރީ އާއި ކުންފުނިތަކާ ދެމެދުވެފައިވާ އެއްބަސްވުންތަކާ ހިލާފްވާ ފަރާތްތަކަށް ނުވަތަ އެއަށް އަމަލު ނުކުރާ ފަރާތްތަކަށް ގަވައިދުގައިވާގޮތުގެ މަތިން ފިޔަވަޅު އަޅާނެކަމަށެވެ.
މިގޮތުން މިފަހަރު، އުސޫލާ ހިލާފަށް އަމަލުކޮށްފައިވާ ކުންފުނިތަކާ މެދު ފިޔަވަޅު އަޅާނެކަމަށާއި އޭގެތެރެއިން ބައެއް ޖަމާއަތްތަކުގެ ހުއްދަ ބާތިލުކުރުމަކީވެސް އެކަށީގެންވާކަމެއް ކަމަށް މިނިސްޓަރު ވިދާޅުވިއެވެ. މީގެ އިތުރުން މިނިސްޓަރު ވަނީ އުމްރާވެރިންގެ ހައްގުތައް ހިމާޔަތްކުރަން ޖެހޭ ކަންކަން އެ މިނިސްޓަރީން ކުރާނެކަމަށް ވިދާޅުވެފައެވެ.
އުމްރާއަށް މީހުން ގެންދިޔުމުގެ އުސޫލްގައިވާގޮތުން އިސްލާމީ ކަންތައްތަކާ ބެހޭ މިނިސްޓްރީން ހުއްދަދީފައިވާ ކުންފުންޏާ ދެމެދު ވެފައިވާ އެއްބަސްވުމާ ހިލާފު ވެއްޖެނަމަ ކުޑަ ބޮޑުމިނަށް ބެލުމަށްފަހު 1،000 ރުފިޔާއާއި 1،00،000 އާ ދެމެދުގެ އަދަދަކުން ޖޫރިމަނާ ކުރުމުގެ އިހްތިޔާރު މިނިސްޓްރީއަށް ލިބިގެންވެއެވެ. އަދި އުމްރާއަށް ގެންދިޔުމުގެ ހުއްދަ ނެތި އެއްވެސް އަމަލެއް ކޮށްފިނަމަ އެ ކުންފުންޏެއް 1،00،000 އާއި 5،00،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ.
މީގެ އިތުރުން ހުއްދަ ބާތިލުކުރުމާ، ހިފެހެއްޓުމުގެ އިތުރަށް މައްސަލައިގެ ކުޑަބޮޑުމިނަށް ބެލުމަށްފަހު އެ މައްސަލައަކީ ޖިނާއީ މައްސަލައެއް ނަމަ މައްސަލަ ތަހުގީގުކޮށް ޝަރީއަތަށް ފޮނުވުމަށްޓަކައި ދިވެހި ފުލުހުންގެ ހިދުމަތަށް ފޮނުވުމުގެ ބާރުވެސް މިނިސްޓްރީއަށް ލިބިގެންވެއެވެ.
