މިދިޔަ ހޮނިހިރު ދުވަހު މާލެއަށް ކުރި ވިއްސާރައިގައި މާލޭގެ 30 ގެއަކަށް ގެއްލުންވެފައިވާ ކަމަށާއި، 304 ތަނެއްގައި ވެލި ބަސްތާ ޖަހާފައިވާ ކަމަށް ނޭޝަނަލް ޑިޒާސްޓާ މެނޭޖްމެންޓް (އެންޑީއެމްއޭ) އިން ބުނެފިއެވެ.
އެންޑީއެމްއޭ އިން ބުނީ މިދިޔަ ހޮނިހިރު ދުވަހު ވާރޭވެހި މާލޭގައި ފެންބޮޑުވުމުގެ ހާދިސާ އާއި ގުޅިގެން އެންޑީއެމްއޭ، ސިފައިން، ފުލުހުން އަދި ދިވެހި ރެޑްކްރެސެންޓު ހޮޓްލައިންތަކަށް 98 ކޯލް ލިބިފައިވާ ކަމަށެވެ. އޭގެތެރެއިން 21 ކޯލަކީ ގެއްލުންތައް ރިޕޯޓުކުރުމަށް އަދި 7 ކޯލަކީ ސީދާ ޒަރޫރީ އެހީތެރި ކަމަށް އެދި ކުރި ކޯލުތައް ކަމަށާއި 70 ކޯލަކީ ވެލި ބަސްތާ ޖަހައިދިނުމަށް އެދި ކުރި ކޯލުތައް ކަމަށް ވެސް އެންޑީއެމްއޭ އިން ބުނެއެވެ.
މީގެއިތުރުން ވަގުތުން އެހީތެރިކަން ބޭނުންވާ ކަމަށް ފާހަގަވި 12 ގޭބީސީއެއްގެ ރެޕިޑް އެސެސްމެންޓު ރެޑް ކްރެސެންޓުގެ އެހީގައި ހަދާފައިވާ ކަމަށް ވެސް އެންޑީއެމްއޭ އިން ވަނީ ބުނެފައެވެ. އަދި 8 ގޭބީސީއެއްގެ 32 މީހުންނަށް ވަގުތީ ބޯހިޔާވަހިކަމާއި، ކެއިންބުއިން ހަމަޖައްސައިދިން ކަމަށް ވެސް އެންޑީއެމްއޭ އިން ވަނީ ބުނެފައެވެ.
އެންޑީއެމްއޭ އިން ބުނީ ޑިސެމްބަރު 17 ވަނަ ދުވަހު ކުރި ވިއްސާރައިގައި 3 ރަށަކަށް ބޯކޮށް ވާރޭވެހި ފެންބޮޑުވުމާ ގުޅިގެން ރިޕޯޓުކޮށްފައިވާ ކަމަށާއި އެއީ ނ. ހެނބަދޫ، ނ. ކެނދިކުޅުދޫ އަދި ޅ. ކުރެންދޫ ކަމަށެވެ.
ނ. ހެނބަދޫގެ 80 ވަރަކަށް ގެއަކަށް ފެންވަދެގެން ރިޕޯޓުކޮށްފައިވާ ކަމަށާއި، ނަމަވެސް މި ހާދިސާގައި އެއްވެސް ގެއަކުން މީހަކު ބަދަލު ކުރަން ޖެހިފައިނުވާ ކަމަށް ވެސް އެންޑީއެމްއޭ އިން ބުނެއެވެ.
ހެނބަދޫގެ ޑެމޭޖް އެސެސެމެންޓު ހެދުމަށްފަހު 27 ގެއެއްގެ ފޯމު އެންޑީއެމްއޭއަށް ލިބިފައިވާކަން ފާހަގަކުރަމުން ބުނީ، މި ފޯމުތައް ވެރިފައިކޮށް ޕްރޮސެސް ކުރުމުގެ މަސައްކަތް މިހާރު ކުރަމުން އަންނަ ކަމަށެވެ. އަދި ހެނބަދޫ ފިޔަވާ އިތުރު ރަށަކުން ވިއްސާރައިގެ ގެއްލުން ލިބިގެން ޑެމޭޖް އެސެސެމެންޓު ފޮނުވާފައި ނުވާ ކަމަށްވެސް އެންޑީއެމްއޭ އިން ބުނެއެވެ.
