ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) މެދުވެރިކޮށް މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ސީއީއޯ މުހައްމަދު ވަޖީހު އިބްރާހިމްގެ ދަރިފުޅަށް ބިމެއް ލިބުނުކަމަށް ދެކެވޭ ވާހަކަތައް ދޮގުކޮށްފިއެވެ.
"ބިންވެރިޔާ" ސްކީމުގެ ސްކީމުގެ ދަށުން ގޯތި ނުލިބޭ ބަޔަކަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ގޯތިިތަކެއް ދިން މައްސަލަ ހޫނުވެފައިވާ މި ދަނޑިވަޅު ވަޖީހުގެ ދަރިފުޅު އިސްމާއިލް ހާތިމް ވަޖީހު، އެޗްޑީސީން ބިމެއް ގަނެފައިވާ ކަމަށް ބުނާ ވާހަކަތަކެއްވެސް ވަނީ ފެންމަތިވެފައެވެ. އަދި އެޗްޑީސީން މިފަދަ އެތައް ކޮރަޕްޝަނަށް މަގު ފަހިވާ އަމަލުތަކެއް ހިންގާފައިވާކަމަށް ބުނެ ގިނަ ބަޔަކު އަންނަނީ ފާޑުކިޔަމުންނެވެ.
މި ވާހަކަތަކާއި ގުޅިގެން ރޭ ވަޖީހު ވިދާޅުވީ އޭނާގެ ދަރިފުޅު ހާތިމް އެޗްޑީސީން ބިމެއް ގަނެފައިވާ ކަމަށް ބުނެ މީސް މީޑިއާގައި ފަތުރަނީ އެއްވެސް ހަގީގަތެއް ނެތް ކަނޑައެޅިގެން ދޮގު ވާހަކަތަކެއް ކަމަށެވެ. އަދި އެފަދަ އެއްވެސް އެއްބަސްވުމެއް އެއްވެސް ފަރާތަކާ އެކު ހަދާފައި ނުވާނެ ކަމަށް ވަޖީހު ވިދާޅުވިއެވެ.
މީގެ އިތުރުން ވަޖީހު ވިދާޅުވީ ކަންތައްތަކުގެ ހަގީގަތް ނުބަލައި މީހުންގެ އަބުރު ނަގާލުމަށް މަސައްކަތް ކުރަމުން ދިއުމަކީ ހިތާމަ ކުރަން ޖެހޭ ކަމެއް ކަމަށެވެ. އަދި މިފަދަ އަސްލެއް ނެތް ވާހަކަތައް ފެތުރުމުން ކޮންމެވެސް އެއްބަޔަކު އެވާހަކަ ގަބޫލު ކޮށް އަދި އެވާހަކަ އިތުރަށް ފަތުރައި އާއިލާތަކުގެ އަބުރު ނަގާލުމަށް މަސައްކަތް ކުރަމުން ގެންދާކަމަށް ވަޖީހު ވިދާޅުވިއެވެ.
އެޗްޑީސީގެ ލިޔެކިޔުންތަކެއް ފޯޖުކޮށް ބިންވެރިޔާ ސްކީމުގެ ދަށުން ގޯއްޗަށް ޝަރުތު ހަމަނުވާ ބަޔަކަށް ހުޅުމާލެ އިން ގޯތިތަކެއް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ދޫކޮށްފައިވާ މައްސަލަ ބަލަމުން އަންނައިރު ރައީސް ވަނީ ކޮރަޕްޝަނުގެ އަމަލު ހިންގާ ވެރިންނާއި މެދު ހަރުކަށި ފިޔަވަޅު އަޅުއްވާނެކަމުގެ އިންޒާރު ދެއްވާފައެވެ.
