ރާއްޖޭގެ ތާރީހުގައިވެސް މިހާތަނަށް އެންމެ ގިނަ މުދާ އެތެރެކޮށްފައިވަނީ މިދިޔަ އަހަރުކަމަށް މޯލްޑިވްސް ޕޯޓްސް ލިމިޓެޑްގެ ޗީފް އެގްޒެކެޓިވް އޮފިސަރު މުހައްމަދު ވަޖީހު އިބްރާހިމް ވިދާޅުވެއްޖެއެވެ.
ރައީސް ޑރ މުހައްމަދު މުއިއްޒުގެ ވެރިކަމުގެ ފުރަތަމަ އަހަރުވެސް ރާއްޖޭގެ އިގުތިސާދަށް ދިރުން އައިސްފައިވާކަން ފާހަގަކޮށް ވަޖީހު ވިދާޅުވީ ނިމިދިޔަ އަހަރު ރާއްޖެ އައި ކާގޯގެ އަދަދު އެހެން އަހަރު ތަކާ އަޅާ ބަލާއިރު ބޮޑުތަނުން އިތުރުވެފައިވުމަކީ މިކަމުގެ ހެއްކެއް ކަމަށެވެ. އެމްޑީޕީގެ ސަރުކާރުގައި ހޭދަވި 5 އަހަރުގެ ތަފާސްހިސާބަށް ބަލާއިރު، ކޮންޓެއިނަރު ރާއްޖެއަށް އެތެރެކުރެވޭ މިންވަރުހުރީ އެވްރެޖް މިންވަރެއްގައިކަން ފާހަގަކޮށް ވަޖީހު ވިދާޅުވީ އެހެންކަމުން ގައުމުގެ އިގުތިސާދަށް މާބޮޑު ކުރިއެރުމެއް މިދިޔަ ސަރުކާރުގައި އައިސްފާނުވާކަމަށެވެ.
އެމްޕީއަލްގެ މިދިޔަ އަހަރުގެ ތަފާސް ހިސާބުތައް އާންމުކޮށް ވަޖީހު ވިދާޅުވީ މިދިޔަ އަހަރު 66،387 ކޮންޓެއިނަރުގެ ކާގޯ ރާއްޖެ އެތެރެކޮށްފައިވާކަމަށެެވެ. އަދި ކޮންޓެއިނަރުގައި ބަންދުކޮށްގެންނާ، ނުކުށް ގެންނަ ލުއި މުދަލު (ޖެނެރަލް ކާގޯ)ގެ ގޮތުގައި 131،262 ފްރައިޓް ޓަނުގެ ކާގޯ އެތެރެކޮށްފައިވާކަމަށެވެ.
2023 ވަަނަ އަހަރާއި އަޅާބަލާއިރު 2024 ވަނަ އެތެރެކުރި ކޮންޓެއިނަރުތަކުގެ އަދަދު 7 ޕަސެންޓު އިތުރުވެފައިވާއިރު، އެތެރެކުރި ޖެނެރެލް ކާގޯގެ ވޮލިޔުމް 29 އިންސައްތަ ފްރެއިޓް ޓަން އިތުރުކަމަށް އެމްޕީއެލްގެ ތަފާސް ހިސާބުތަކުން ދައްކައެވެ. އެ ގޮތުން 2023 ވަނަ އަހަރުގެ ތަފާސް ހިސާބަށް ބަލާއިރު، ރާއްޖެ އެތެރެކޮށްފައިވަނީ 62،092 ކޮންޓެއިނަރެވެ. އަދި 117،068 ފްރެއިޓް ޓަނުގެ ޖެނެރަލް ކާގޯއެވެ.
މިއަހަރު ރާއްޖޭގެ އިގްތިސާދު ވަރަށް ބޮޑަށް ރަނގަޅުވެގެންދާނެކަން ފާހަގަކޮށް ވަޖީހު ވިދާޅުވީ ރައީސްގެ ރިޔާސީ ވައުދުތަކުގެ ގިނަ ޕޮރޮޖެކުޓު ތަކެއް 2025 ވަނަ އަހަރު ފެށިގެން ދިއުމުން ރާއްޖޭގެ އިގުތިސާދަށް ދުވަހަކުވެސް ނުލިބޭވަރުގެ ކުރި އެރުމެއް މިއަހަރު ލިބިގެން ދާނެކަމަށެވެ.
