ހއ. ކެލާގެ ކަރަންޓު ހާލަތު ރަނގަޅުކުރުމަށް 400 ކިލޯވޮޓްގެ ޖެންސެޓެއް އިންސްޓޯލްކޮށްފިއެވެ.
ފެނަކައިން ބުނީ އެ ކުންފުނިން ދަނީ ދެމެހެއްޓެނިވި ގޮތެއްގައި ކަރަންޓުގެ ހިދުމަތް ދިނުމަށް ގިނަ މަސައްކަތްތަކެއް ކުރަމުންކަމަށާއި، އެގޮތުން ކެލާގައި 400 ކިލޯވޮޓްގެ ޖެންސެޓެއް އިންސްޓޯލްކޮށް މިހާރު ބޭނުން ކުރަން ފަށާފައިވާކަމަށެވެ.
ފާހަގަކޮށްލެވޭ ގޮތުގައި އެކި ރަށްރަށައް ދިމާވެފައިވާ ކަރަންޓުގެ މައްސަލަ ހައްލުކުރުމަށް ފެނަކައިން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން މި އަހަރުގެ އޭޕްރީލް މަހުވެސް ވަނީ 12 ރަށަކަށް 600 ކިލޯވޮޓުގެ ޖެންސެޓް ތަކެއް ފޮނުވާފައެވެ.
ކެލާގެ އިތުރުން ފެނަކައިން ޖެންސެޓް ފޮނުވާފައިވަނީ މ. ދިއްގަރު، ލ. ހިތަދޫ، ބ. ކަމަދޫ، ރ. ހުޅުދުއްފާރު، ބ. ކިހާދޫ، ނ. މާފަރު، ބ. މާޅޮސް، ރ. މާކުރަތު، ނ. ހެނބަދޫ، ރ. އަލިފުށި އަދި ށ. މަރޮއްޓަށެވެ.
ރައީސް ޑރ. މުހައްމަދު މުއިއްޒުވެސް ވަނީ ރާއްޖޭގެ ރަށްތަކަށް ދިމާވެފައިވާ ކަރަންޓުގެ މައްސަލައަށް ދާއިމީ ހައްލެއް ގެނެސްދެއްވާނެ ކަމަށް ވިދާޅުވެފައެވެ. އެގޮތުން ރައީސް ވިދާޅުވީ ވެރިކަމާ ހަވާލުވެވަޑައިގެންނެވިއިރު ރާއްޖޭގެ އެކި ކަންކޮޅުތަކުގައި ހުރި ފެނަކައިގެ ބްރާންޗްތަކުގެ ހާލަތު ހުރީ ވަރަށް ދައްކޮށް ކަމަށާއި ހަމައެކަނި ކުންފުނި އެތައް ސަތޭކަ މިލިއަން ރުފިޔާއިން ދަރާފައި އޮތީ އެކެނި ނޫންކަމަށެވެ.
ރައީސް ވިދާޅުވީ ވެރިކަމާ ހަވާލުވެވަޑައިގެންނެވިއިރު ފެނަކައިގެ ޖެންސެޓް ތަކާއި އެކި އާލާތްތްތައް ހުރީ އެއްވެސް ވަރަކަށް މެއިންޓެނެސްގެ މަސައްކަތް ނުކޮށްކަމަށެވެ.
