އަންނަ އަހަރުން ފެށިގެން ވޭސްޓް މެނޭޖްމަންޓް ކޯޕަރޭޝަން (ވެމްކޯ)އިން އަތޮޅު ތެރޭގެ ރަށްތަކަށް ވެސް ބިލްކުރާނީ ކަރަންޓުބިލާ އެއްކޮށް ކަމަށް އެ ކުންފުނިން ބުނެފިއެވެ.
އެންމެ ފުރަތަމަ، ކުނި ބިލު ކަރަންޓު ބިލާ އެއްކޮށްލައިގެން މާލެ ސަރަޙައްދުގައި ފޮނުވަން ފަށާފައިވާއިރު، މިހާރު ވެމްކޯ އިން ވަނީ ލ. ފޮނަދޫއާއި ކ. މާފުށީގައިވެސް މި ހިދުމަތް ފަށާފައެވެ.
ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވެމްކޯގެ އެސިސްޓެންޓް މެނޭޖަރު ސޭލްސް އެންޑް ޕްރޮޖެކްޓް މުހައްމަދު އަކްރަމް ވިދާޅުވީ ކުނި ބިލު ކަރަންޓު ބިލާ އެއްކޮށްލުމުން ބިލްދައްކާ މީހުންނަށް ފަސޭހަ ވާނެކަމަށެވެ.
އަންނަ އަހަރުން ފެށިގެން ވެމްކޯއިން އަތޮޅު ތެރޭގެ ސަރަހައްދުތަކުގައި ހިދުމަތްދޭ އުސޫލަށް ބަދަލުތަކެއް ގެނައުމަށް ހަމަޖެހިފައިވާއިރު ވެމްކޯ އިން ބުނީ އަންނައަހަރުގެ ޖެނުއަރީމަހުން ފެށިގެން، ރަށްރަށުގައި ވެސް ވެމްކޯގެ ބިލު، އެ ތަނެއްގެ ކަރަންޓު ބިލާ މާޖުކުރާނެ ކަމަށެވެ. އަދި ގިނަ ދުވަހަށް ރަށުން ބޭރަށް ދާ ހާލަތްތަކުގައި، ކަރަންޓު ބިލަށް 34 ޔުނިޓު ނާރާނަމަ، އެ މަހެއްގައި ވެމްކޯއިން އެ ގޭބިސީއަކަށް ބިލުނުކުރާނެކަމަށް ވެމްކޯ އިން ވަނީ ބުނެފައެވެ.
މީގެ އިތުރުން ވެމްކޯގެ ސަދަން އޮޕަރޭޝަންސްގެ މެނޭޖިން ޑިރެކްޓަރު އަހުމަދު ޝާފިއު ވިދާޅުވީ 2025ވަނަ އަހަރު ވެސް ވެމްކޯގެ ހިދުމަތް އިތުރު ރަށްތަކަށް ފުޅާކުރުމުގެ މަސައްކަތް ކުރިޔަށްދާނެކަމަށެވެ. އެހެން ނަމަވެސް މި ވަގުތު އެ ކުންފުނިން އަލަށް ރަށެއްގައި ޚިދުމަތް ފެށުން ބިނާވެފައި އޮތީ ކައުންސިލުން އެކަމަށް އެދޭ މިންވަރަކުން ކަމަށް އޭނާ ވިދާޅުވިއެވެ. އަދި ރަށްތަކުގައި ވެމްކޯގެ ހިދުމަތް ފަށަނީ، ކުނި މެނޭޖުކުރުމުގެ ހިދުމަތް ފަށަން އެ ރަށެއްގެ ކައުންސިލުން ވެމްކޯއާއެކު ޕާޓްނާޝިޕް އުސޫލުން ކުރާނެ އިންވެސްޓަށް ބެލުމަށް ފަހު ކަމަށް ޝާފިއު ވިދާޅުވިއެވެ.
މީގެ އިތުރުން ޝާފިއު ވިދާޅުވީ މީގެ ކުރިން ކޮންމެ ދުވަހަކު ކުނި ނެގުމުގެ ހިދުމަތް ނުދިންނަމަވެސް އަންނަމަހުން ފެށިގެން ކޮންމެ ދުވަހަކުވެސް ވެމްކޯގެ ހިދުމަތް ދޭ ރަށްތަކުގައި އެހިދުމަތް ދެމުން ގެންދާނެ ކަމަށެވެ.
